རྨ་ལྷོ་ཁུལ་གྱིས་གསལ་ཁྲ་གསུམ་བརྒྱུད་དེ་ཞིང་པ་ཞོར་ལས་པའི་ཁེ་དབང་ལ་སྲུང་སྐྱོབ་བྱས།

རྨ་ལྷོ་ཁུལ་གྱིས་གསལ་ཁྲ་གསུམ་བརྒྱུད་དེ་ཞིང་པ་ཞོར་ལས་པའི་ཁེ་དབང་ལ་སྲུང་སྐྱོབ་བྱས།

རྨ་ལྷོ་བོད་རིགས་རང་སྐྱོང་ཁུལ་གྱིས་བཟོ་སྐྲུན་འཛུགས་སྐྲུན་ལས་གཞིའི་དོ་དམ་ལ་ཤུགས་སྣོན་པ་དང་གླ་ཕོགས་ཆད་འཇོག་གི་ཉེན་ཁར་གྲལ་བཤེར་བྱེད་པ། བྱ་བའི་ལས་འགན་གཙོ་བོ་གཙིགས་སུ་འཛིན་པ་བཅས་ཀྱི་གསལ་ཁྲ་གསུམ་བརྒྱུད་དེ། སྟོབས་ཤུགས་ཡོད་རྒུས་ཞིང་པ་ཞོར་ལས་པའི་ཁེ་དབང་ལ་སྲུང་སྐྱོབ་བྱས། ཟླ11པའི་ཚེས20ཉིན་བར་དུ། ཞིང་པ་ཞོར་ལས་པའི་གླ་ཕོགས་ཆད་འཇོག་ཐད་ཀྱི་ཞུ་གཏུག་གྱོད་གཞི234ཐག་བཅད་པ་དང་། ཞིང་པ་ཞོར་ལས་པ1141ལ་ཕན་བཏགས་ལ། གྱོད་གཞི་བསྒྲུབས་ཚད་བརྒྱ་ཆའི་བརྒྱར་སླེབས།

བཟོ་སྐྲུན་འཛུགས་སྐྲུན་ལས་གཞིའི་གསལ་ཁྲ་དོ་དམ་ཕྱོགས་ནས། རྨ་ལྷོ་ཁུལ་གྱིས་ལྟ་སྐུལ་དོ་དམ་མ་ལག་བཙུགས་ནས་འཐུས་ཚང་དུ་བཏང་སྟེ། ལས་གཞི་བཀོད་སྒྲིག་དང་མ་དངུལ་གཏོང་བ་སོགས་ཀྱི་བྱ་བར་ལྟ་སྐུལ་དོ་དམ་ནན་མོ་བྱས་པ་དང་། ཞིང་པ་ཞོར་ལས་པའི་གླ་ཕོགས་དུས་ལྟར་དང་ཚད་ལོངས་པའི་སྒོ་ནས་སྟེར་ཐུབ་པར་ཁག་ཐེག་བྱས་ནས། འགོ་ཁུངས་ནས་གླ་ཕོགས་ཆད་འཇོག་གི་སྣང་ཚུལ་འབྱུང་བར་བཀག་འགོག་བྱས།

གླ་ཕོགས་ཆད་འཇོག་གི་ཉེན་ཁར་གྲལ་བཤེར་བྱེད་པའི་བྱ་བའི་ཁྲོད། རྨ་ལྷོ་ཁུལ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུའུ་ཡིས་འབྲེལ་ཡོད་སྡེ་ཁག་དང་མཉམ་འབྲེལ་བྱས་ནས། ཡུལ་དངོས་རྟོག་ཞིབ་དང་གཞི་གྲངས་དབྱེ་ཞིབ་སོགས་ཀྱི་བྱེད་ཐབས་བརྒྱུད་དེ་མི་མངོན་པའི་ཉེན་ཁ་འཚོལ་ཞིབ་བྱས་པར་མ་ཟད། ཉེན་ཁར་ཁ་ཕྱོགས་ནས་ཁ་གཏད་བྱེད་ཐབས་གཏན་འབེབས་བྱས། ཁེ་ལས་དང་དངུལ་རྩའི་ལས་ཁུངས་བར་གྱི་བརྗེ་རེས་མཐུན་སྦྱོར་ལ་ཤུགས་བསྣན་པ་དང་། ཕྱོགས་མང་མཉམ་འབྲེལ་གྱི་ཐབས་ལམ་བཙུགས་ནས། གླ་ཕོགས་ཆད་འཇོག་གི་སྣང་ཚུལ་འབྱུང་སྲིད་པའི་གནད་དོན་སྔ་མོ་ནས་མེད་པར་བཟོས།

འབྲེལ་ཡོད་སྡེ་ཁག་སོ་སོས་བྱ་བའི་ལས་འགན་གཙོ་བོར་དམིགས་ནས། ཞིང་པ་ཞོར་ལས་པའི་ཁེ་དབང་ལ་འགན་སྲུང་གང་ལེགས་བྱས། རྨ་ལྷོ་ཁུལ་ངལ་རྩོལ་འགན་སྲུང་ལྟ་ཞིབ་རུ་ཁག་གིས་ཉིན་རྒྱུན་གྱི་སྐོར་ཞིབ་དང་ཆེད་དོན་བརྟག་བཤེར་བྱེད་ཤུགས་ཆེར་བཏང་ནས། གླ་ཕོགས་ཆད་འཇོག་གི་ཁུངས་སྣེ་ཐད་མྱུར་དུ་བྱེད་ཐབས་བཟང་བོ་སྤྱད། འཛུགས་སྐྲུན་གཙོ་འགན་སྡེ་ཁག་གིས་འཛུགས་སྐྲུན་བཟོ་སྐྲུན་ཁྱབ་ཁོངས་ཀྱི་ཚོང་རའི་སྒྲིག་ལམ་ཚད་ལྡན་དུ་གཏོང་བར་ཤུགས་བསྣན་པ་དང་། ཁེ་ལས་ཀྱིས་གླ་ཕོགས་སྟེར་བའི་གཙོ་གཞིའི་འགན་འཁྲི་ལག་བསྟར་བྱེད་པར་སྐུལ་འདེད་བཏང་། ཁྲིམས་འཛིན་སྡེ་ཁག་གིས་ཞིང་པ་ཞོར་ལས་པར་བཅའ་ཁྲིམས་ཀྱི་རོགས་སྐྱོར་འདོན་སྤྲོད་བྱས་ནས། ཁོ་ཚོའི་ཁྲིམས་མཐུན་ཁེ་དབང་ལ་སྲུང་སྐྱོབ་གང་ལེགས་བྱས།