མཚོ་སྔོན་ཞིང་ཆེན་གྱི་མི་རིགས་སྐད་ཡིག་ལོ་ཙཱའི་རིག་གཞུང་བགྲོ་གླེང་ཐེངས་བཅུ་གཉིས་པ་མཚོ་ཤར་གྲོང་ཁྱེར་དུ་ཚོགས་པ།

མཚོ་སྔོན་ཞིང་ཆེན་གྱི་མི་རིགས་སྐད་ཡིག་ལོ་ཙཱའི་རིག་གཞུང་བགྲོ་གླེང་ཐེངས་བཅུ་གཉིས་པ་མཚོ་ཤར་གྲོང་ཁྱེར་དུ་ཚོགས་པ།

2023ལོའི་ཟླ10པའི་ཚེས24ཉིན། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་བའི་མཐུན་ཚོགས་ཀྱིས་གཙོ་སྒྲུབ་བྱས་ཤིང་། མཚོ་ཤར་གྲོང་ཁྱེར་མི་རིགས་ཆོས་ལུགས་ལས་དོན་ཨུ་ལྷན་གྱིས་འགན་སྒྲུབ་བྱས་པའི་མཚོ་སྔོན་ཞིང་ཆེན་གྱི་མི་རིགས་སྐད་ཡིག་ལོ་ཙཱའི་རིག་གཞུང་བགྲོ་གླེང་ཐེངས་བཅུ་གཉིས་པ་མཚོ་ཤར་གྲོང་ཁྱེར་གྱི་རྒྱལ་སྤྱིའི་གསོལ་མགྲོན་ཁང་དུ་གཟབ་རྒྱས་ངང་ཚོགས། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་བའི་མཐུན་ཚོགས་ཀྱི་དྲུང་ཆེ་འབྲུག་བྱམས་ཚེ་རིང་གིས་བགྲོ་གླེང་ཚོགས་འདུ་གཙོ་སྐྱོང་གནང་། མཚོ་ཤར་གྲོང་ཁྱེར་འཐབ་ཕྱོགས་གཅིག་གྱུར་པུའི་རྒྱུན་ལས་པུའུ་ཀྲང་གཞོན་པའམ་གྲོང་ཁྱེར་མི་རིགས་ཆོས་ལུགས་ལས་དོན་ཨུ་ལྷན་གྱི་ཀྲུའུ་རིན་ཀླུ་རྒྱལ་དོན་འགྲུབ་ཀྱིས་ཤིས་ཚིག་ཕུལ། མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ལྷན་གྱི་ཏང་ཙུའི་ཁོངས་མིའམ་ཀྲུའུ་རིན་གཞོན་པ་ཟླ་བ་ཚེ་རིང་གིས་གཏམ་བཤད་གལ་ཆེན་གནང་། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་བའི་མཐུན་ཚོགས་ཀྱི་ཚོགས་གཙོ་རྒྱ་ཡེ་བཀྲ་བྷོས་བྱ་དགའ་ཐོབ་པའི་དཔྱད་རྩོམ་ཁྱབ་བསྒྲགས་བྱས།

ཐེངས་འདིའི་རིག་གཞུང་བགྲོ་གླེང་ཚོགས་འདུའི་བརྗོད་དོན་ནི“མི་རིགས་སྐད་ཡིག་ལོ་ཙཱའི་བྱ་བ་ཡག་པོར་བསྒྲུབས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བ”ཞེས་པ་ཡིན་ཞིང་། དམིགས་ཡུལ་ནི་གོམ་གང་མདུན་སྤོས་ཀྱིས་རང་ཞིང་གི་མི་རིགས་སྐད་ཡིག་ལོ་ཙཱ་བའི་གཞུང་ལུགས་ཞིབ་འཇུག་གི་བྱང་ཚད་མཐོར་འདེགས་དང་། དུས་རབས་གསར་པའི་མི་རིགས་སྐད་ཡིག་ལོ་ཙཱའི་བྱ་བ་མདུན་ནས་མདུན་དུ་འཕེལ་བར་བྱ་ཆེད་ཡིན།

བགྲོ་གླེང་སྐབས་སུ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་ལག་བསྟར་བྱེད་པ་གཙོ་ཐིག་ཏུ་བཟུང་སྟེ། མི་རིགས་སྐད་ཡིག་ལོ་ཙཱ་དང་ཀྲུང་ཧྭ་མི་རིགས་བར་འབྲེལ་སྤེལ་འདྲིས་གསུམ་བྱེད་པ་དང་། ཏང་སྲིད་གཞུང་ཡིག་ལོ་ཙཱའི་ལག་ལེན་དང་གཞུང་ལུགས་ཞིབ་འཇུག བསྟན་བཅོས་ལོ་ཙཱ་དང་རིག་གནས་ཁྱབ་སྤེལ་སོགས་ཀྱི་ཐད་རིག་གཞུང་བགྲོ་གླེང་བྱ་རྒྱུ་ཡིན་ཞིང་། བགྲོ་གླེང་ཚོགས་འདུར་རིག་གཞུང་དཔྱད་རྩོམ15ལྷག་འབྱོར་ཡོད་པ་དག་ལ་དཔྱད་བསྡུར་བྱས་ཏེ་བྱ་དགའ་སྤྲད།

བགྲོ་གླེང་ཚོགས་འདུ་ལ་གྲོང་ཁྱེར་དང་ཁུལ་མི་རིགས་སྐད་ཡིག་ལས་དོན་ལྟེ་གནས་ཀྱི་འགན་འཁུར་བློ་མཐུན་དང་། མཉམ་འདྲེས་སྨྱན་སྦྱོར་ལྟེ་གནས་ཀྱི་རྐང་འཛིན་མི་སྣ། ཞིང་ཆེན་རིམ་པའི་སྨྱན་སྦྱོར་ལས་ཁུངས། མཚོ་སྔོན་མི་རིགས་སློབ་ཆེན་སོགས་ཀྱི་ཆེད་མཁས་པ་སོགས་མི་སྣ40ཙམ་ཞུགས་ཡོད།