དྲུག་པའི་ལྷ་རྩེ་རུ་ལ་གཞས་ལ་ཉན་པ།

སྣང་བ་ཞིག་ལ།
སྤྲིན་དཀར་དང་ལུག་ཁྱུ་གཅིག་ཏུ་འདྲེས་བྱུང་།
ལྷུང་ལྷུང་དུ་འབབ་པའི་ཆུ་ཕྲན།
གླུ་སྒྲའི་ལྷུམས་སུ་འཁྱིལ་བའི་དྲན་གདུང་ལ་སིམ་སྟེ།
རྨིག་རྗེས་ཀྱི་ཚ་གདུག་ཀློང་ནས།
ཉིན་སྲིབ་ཀྱི་གཏམ་རྒྱུད་ལ་གཤོག་པ་འབྲི།

ད་དུང་། ནམ་མཁའ་དང་རྣང་ཞིང་འདྲེས་མཚམས་སུའང་།
སྟེ་མའི་རླབས་ཕྲེང་གིས་ལང་ཚོ་ཡང་ཡང་བཀྲུས་ནས།
སྐྱ་ཀ་ཁྲ་མོར་སེམས་འདུན་ཁྱོར་བ་གང་འདེགས་པའི།
རླུང་འཚུབ་དང་ཐོག་ཆར་གྱིས་མ་གཏོར་བའི་རེ་ལྕག་མེ་ཏོག
སྐབས་དང་སྐབས་སུ།
མིག་ལམ་དུ་བཞད་ཅིང་སེམས་ཁོང་དུ་འཛུམ་ཡོང་།

མི་ལོ་སུམ་ཅུའི་སྣང་བས་ཤད་པའི་སྐྲ་ལོ།
དུང་སེམས་ཀྱི་དབང་གིས་ཡང་ཞིང་འཕྱོ།
རྨ་ཆུའི་དྭངས་གཙང་དང་ལྷིང་འཇགས་ཀྱང་།
གླུ་ཚིག་གི་ནང་དུ་བསྐུངས་པའི།
བུ་མོའི་ཞེ་མདངས་ཀྱི་ཀློང་དུ་བཞུར།

ཟུར་མིག་དང་ཟུར་མིག་འཕྲད་དེ།
འཇིག་རྟེན་གྱི་སྲང་ལམ་དོག་པོར་བྱས།
ལྗོན་པའི་བསིལ་གྲིབ་འོག་གི་སེམས་པའི་ཚོགས།
ར་བཟི་བའི་ཕྱེ་ལེབ་ཁྱུ་ཞིག་ཏུ་གྱུར་པས།
ལས་ཐུག་ལམ་འཕྲད་ཀྱི་ཟླ་བ་དྲུག་པར།
སྡེ་ཆེན་རྩེད་ར་ནི།
སྣང་བའི་འཇིག་རྟེན་འཛོམས་པོ་ཞིག

རྫ་མགོར་སྨུག་པ་འཐིབས་ཀྱང་མི་སྐྱོན་ཟེར།
གཙང་བོར་འགྲམ་དར་ཆགས་ཀྱང་མི་སྐྱོན་ཟེར།
སྨུག་ལང་ལོང་དང་ཆར་ཟམ་ཟིམ་གྱི་ཀློང་དུ།
མདངས་བརྩེ་གཅིག་པུས་སེམས་དང་སེམས་པ་སྦྲེལ་གྱིན་འདུག
མནའ་ཚིག་ཁོ་ནས་ལམ་གྱི་སྨག་རུམ་སེལ་གྱིན་འདུག

མགོ་དཀྲིས་དམར་པོའི་འོག་གི་ཟིལ་བ།
ཁ་འབྲལ་མི་ཕོད་པའི་སེམས་ལྗོངས་སུ་ཐོར་བས།
མཛུབ་རྩེ་ནས་ཨུ་ཚུགས་ཀྱིས་འདེད་དགོས་པའི།
ནམ་འཕྲད་ཆ་མེད་ཀྱི་ཉིན་མཚན་མང་བོ།
མུན་པ་ཞིག་ཡིན་སྙམ་པའི་མུར།
ཤིན་ཏུ་གདུང་བའི་སེམས་པ་འདིའང་།
རང་ལ་མི་དབང་བའི་སྟོན་མཇུག་གི་ལོ་མ་བཞིན།

དྲུག་པའི་ལྷ་རྩེའི་ལྗོན་གསེབ་ཏུ།
ལན་རེར་སྨུག་པ་འཐིབས།
སྐབས་རེར་ཉི་འོད་འཕྲོ།
ལན་རེར་ཆར་ཟིམ་ཡང་འཇོ་བར་བྱེད།