ཟླ་སྒྲོན་བདག་ལ་ཡང་བསྐྱར་སྙན་ངག་ཅིག་གྱེར་རོགས།
ནག་ཤོད་ང་རོའི་འཚེར་སྒྲ། | ནག་ཆུ།
གློ་བུར་དུ་ང་ལ་སེམས་གཅོང་མང་པོ་ཞིག་ཡོང་དོན་ཅི།
ཕྱིན་ཟིན་པ་དག་བག་ཕེབས་ངང་ཕྱིན་ཟིན་རྗེས།
ཅི་ཞིག་ལ་འགོར་ནས་ཕྱི་འབྱོར་དུ་ལུས་སོང་བའི་ང་རང་ནི།
ལོ་རྒྱུས་ཀྱི་གླེགས་བམ་དམ་དུ་འཛིན་པ་ལས།
ཁྱེད་ཀྱི་དཀའ་སྡུག་གི་མི་ཚེ་ང་ཡི་ཐེག་ནུས་ཤིག་ག་ལ་ཡོད།
ཀྱེ། ཚངས་དབྱངས་རྒྱ་མཚོ་དོ་ནུབ་ང་ཡིས་ཁྱེད་རང་ལྷག་པར་དྲན།
ཁྱེད་མ་གཞི་བདག་གི་རྗེ་ཡིན་རུང་།
དོ་ནུབ་ང་ཡི་གྲོགས་སུ་འབོད་པ་འདོད།
ངས་སྙན་ཚིག་རིང་མོ་ལ་ངའི་ཁེར་གདུངས་ཀྱི་ལོ་ཆང་མཆོད་རྗེས།
གྲོགས་པོ་ཁྱེད་དང་མཉམ་འཛོམས་ཐེངས་ཤིག་བྱེད།
དོ་ནུབ་འདི་ག་རུ་ཆོས་ཁྲིམས་དང་སྲིད་ཁྲིམས་གང་ཡང་མེད་པས།
རང་དབང་ཆེན་པོས་མཛའ་གཞས་སྙན་མོ་ཞིག་གཏོང་ཡང་ཆོག
ཡང་ན། ཁྱེད་ཀྱིས་སྙན་ངག་ཅིག་བྲིས་ཀྱང་ཆོག
བྲིས་ནས་བྲིས་མ་ཚར་བའི་མ་སྐྱེས་ཨ་མར་ཕུལ་བའི་མཛའ་འཕྲིན་ཅིག་ཡིན་ཆོག་ལ།
ད་ལྟའི་གནས་དུས་ནས་མཐོང་བའི་སྲིད་ཕྱོགས་ཀྱི་མཐོང་སྣང་ཡང་ཡིན་ཆོག
དེ་མིན་གྱི་བདག་ཀྱང་དམ་པའི་ལྷ་ཆོས་སུ་འགྲིམ་པའི་ལུང་བསྟན་ཞིག་ཀྱང་ཡིན་ཆོག
འོན་ཀྱང་སྒྲ་ཅི་ཡང་མེད་པར་ཁུ་སིམ་མེར་དང་ལྷོད་ཤིག་གེའི་ངང་གཏན་དུ་མ་བཞུགས་རོགས།
མཚན་ལམ་གྱི་སྒེའུ་ཁུང་འདི་ནས།
གདོད་མའི་རླུང་བུ་ཞིག་དལ་གྱིས་ལྡང་ཡོང་།
མཁའ་དབྱིངས་ཀྱི་དཀར་གསལ་ཟླ་བ་དེ་ཁོ་ནས།
ངའི་དྲན་པ་ལ་གདུངས་བའི་མཚོ་མོ་འཕྱོ།
ཟླ་སྒྲོན་དོ་ནུབ་གནས་འདི་ནས་ངས་ཚངས་དབྱངས་རྒྱ་མཚོ་ལྷག་ཏུ་དྲན་པས།
ཁྱེད་ཀྱིས་ངའི་དྲན་གདུངས་འཇོམས་ཕྱིར་ཚངས་མགུར་ཞིག་དབྱངས་སུ་གྱེར་རོགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注