ཉེ་བར་མཁོ་བའི་བསླབ་བྱ། གུང་ཐང་བསྟན་པའི་སྒྲོན་མེ།

ཡོང་ཁུངས། མཚོ་སྔོན་པོ་དྲ་བ། རྩོམ་སྒྲིག་པ། ཀླུ་མགོན་རྒྱལ། 2023-12-27 14:44:27 ཀློག་གྲངས།849

ཉེ་བར་མཁོ་བའི་བསླབ་བྱ།

གུང་ཐང་བསྟན་པའི་སྒྲོན་མེ།

སྐྱབས་གནས་བསླུ་མེད་མཆོག་གསུམ། །
སྙིང་ནས་གསོལ་བ་འདེབས་སོ། །
བྱང་ཆུབ་སྙིང་པོའི་བར་དུ། །
རྗེས་བཟུང་བྱིན་གྱིས་རློབས་ཤིག །

འདི་ཕྱིའི་ལེགས་ཚོགས་རྩ་བ། །
དུས་གསུམ་རྒྱལ་བའི་ཞལ་སྐྱིན། །
མཚན་ལྡན་བཤེས་གཉེན་དམ་པ། །
བསམ་སྦྱོར་དག་པས་སྟེན་ཅིག །

རྙེད་དཀའ་དོན་ཆེའི་དལ་འབྱོར། །
ལན་གཅིག་ཙམ་ཞིག་ཐོབ་པ། །
སྔོན་ཆད་སྟོང་པར་ཟད་པས། །
ཚེ་ལྷག་དོན་ལྡན་གྱིས་ཤིག །

སང་བྱ་གནངས་བྱའི་ངང་ལ། །
འཆི་བདག་དགྲ་བོས་འཁྱེར་བས། །
བྱ་བ་ཀུན་ལས་ཐོག་མར། །
ལྷ་ཆོས་གཙོ་བོར་མཛོད་ཅིག །

མཆོག་གསུམ་བསོད་ནམས་ཞིང་ལ། །
མཇལ་བ་ད་ལན་ཙམ་ཡིན། །
རློམ་སེམས་གཡོ་སྒྱུས་མ་བསླད། །
ཕྱག་མཆོད་ཚོགས་བསགས་རེམས་ཤིག །

བློ་རྩལ་སྟོབས་འབྱོར་འཛོམས་ཀྱང་། །
སྐྱིད་སྡུག་ལེགས་ཉེས་འཁྱེར་སོ། །
དབང་མེད་ལས་ཀྱིས་འཁྱེར་བས། །
དེ་ཉིད་དཔང་པོར་ཞོག་ཅིག །

སྲིད་འབྱོར་ཇི་ཙམ་བསྒྲུབས་ཀྱང་། །
རྡུལ་ཙམ་འཁྱེར་དབང་མེད་ལ། །
རྣམ་སྨིན་ཕྱི་བཞིན་འབྲང་བས། །
དོན་མེད་སྡིག་པ་མ་གསོག །

ཟབ་ཟབ་གདམས་པ་མང་ཡང་། །
ཡོན་ཏན་ཀུན་གྱི་གཞི་རྟེན། །
མི་བསྲུང་རང་དབང་མེད་པ། །
ཁས་བླངས་ཚུལ་ཁྲིམས་ཡིན་པས། །

དྲན་ཤེས་བག་ཡོད་སྒོ་ནས། །
ཉམས་ལེན་སྙིང་པོར་བྱས་ན། །
ལུང་རྟོགས་ཡོན་ཏན་ཐམས་ཅད། །
ཡར་ངོའི་ཟླ་བཞིན་འཕེལ་ལོ། །

འོན་ཀྱང་རྨོངས་པའི་མུན་སེལ། །
ཐོས་པའི་སྒྲོན་མེ་མེད་ན། །
བླང་དོར་བྱ་ཐབས་བྲལ་བས། །
སློབ་གཉེར་ནན་ཏན་གྱིས་ཤིག །

ཁ་བཤད་རླུང་ལ་བསྐུར་ན། །
ཆུ་ནང་རྡོ་བ་བཞིན་དུ། །
རང་རྒྱུད་སྐམ་པོར་ལྡུས་པས། །
གང་ཤེས་རྒྱུད་ལ་སྦྱོར་ཅིག །

མདོར་ན་སྒོ་གསུམ་སྤྱོད་པ། །
ཅི་བྱས་ཆོས་དང་སྦྱར་ཏེ། །
འཆི་བ་ཐོག་ཏུ་བབས་ཀྱང་། །
འགྱོད་པ་མེད་པ་གྱིས་ཤིག །

ཉེ་བར་མཁོ་བའི་བསླབ་བྱ། །
ཉུང་འདུས་སྨྲས་པ་འདི་ཡང་། །
སྙན་གོང་ཨུཏྤལ་མ་བྱེད། །
སྙིང་གི་དཔལ་བེའུར་ཆོངས་ཤིག །

དེ་སྐད་བསྙད་པའི་དགེ་ཚོགས། །
བློ་གསལ་དོན་གཉེར་ཅན་རྣམས། །
ཚུལ་གནས་ཐོས་བསམ་སྒོམ་ལ། །

འཇུག་པའི་རྒྱུ་རུ་གྱུར་ཅིག །

ཅེས་པ་འདི་ནི་དད་བརྩོན་ལྡན་པ་དཀོན་མཆོག་ཐབས་མཁས་དང་བློ་བཟང་དཀོན་མཆོག་གཉིས་ཀྱིས་བསྐུལ་ངོར༧བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ།།

རྩོམ་གོང་མ། > བསླབ་བྱ་ནོར་བུའི་ཕྲེང་བ། ཞང་སྟོན་བསྟན་པ་རྒྱ་མཚོ།
རྩོམ་གཞུག་མ། > བསླབ་བྱ་རིན་ཆེན་ཕྲེང་མཛེས་བཞུགས་སོ།། པཎ་ཆེན་བློ་བཟང་ཆོས་ཀྱི་རྒྱལ་མཚན།

དུ་བ་གནམ་ཐོན་ཡོད་ས་ཚང་མར་འཕྲིན་གཏོང་ལྕགས་སྒྲོམ་ཡོད།

《ཀྲུང་གོའི་ས་རྒྱུའི་བཅད་ཁའི་གྲངས་གཞི་ཕྱོགས་བསྒྲིགས》ཡོངས་བསྒྲགས་བྱས་པ།

སྐྱེ་ཁམས་ཤེས་དཔལ་སྒྲིག་གཞི་སྒྱུར་བཅོས་ཐད“མཚོ་སྔོན་གྱི་མ་དཔེ”བཏོན་པ།

བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།