ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ།

བརྩེ་ལྡན་གྱི་ཀློག་པ་པོ་རྣམ་པ་ལགས།《སྦྲང་ཆར》རྩོམ་སྒྲིག་ཁང་གིས་ཉེ་བའི་ལོ་ངོ་འདི་དག་གི་རིང་ལ།《སྦྲང་ཆར》དུས་དེབ་སྒྲུབ་པའི་ཞོར་དུ། 1980ལོ་ནས2019ལོའི་བར་གྱི་དེང་རབས་རྩོམ་རིག་བརྩམས་ཆོས་ལས་ཆེས་ལེགས་གྲས་ཕྱོགས་བསྒྲིགས་བྱས་ཏེ། པོད40ཡི་བདག་ཉིད་ཅན་གྱི《ཀྲུང་གོའི་བོད་ཀྱི་དེང་རབས་རྩོམ་རིག་གཅེས་བཏུས》པར་སྐྲུན་ལེགས་གྲུབ་བྱུང་། 2020ལོ་ནས་བཟུང་སྟེ། སྔ་མའི་ལས་དོན་བཟང་བོ་དེའི་རྒྱུན་བསྐྱངས་ནས། བོད་འབྲེལ་ས་ཁུལ་གྱི་དུས་དེབ་དང་ཚགས་པར་ཚད་ལྡན་དག་ལས་ལོ་གཅིག་རིང་གི་འཐུས་ཚབ་ལྡན་ངེས་ཀྱི་སྒྲུང་ཐུང་དང་། སྒྲུང་འབྲིང་། སྙན་ངག ལྷུག་རྩོམ་དག་བདམས་ཏེ། 《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》པར་སྐྲུན་བྱེད་བཞིན་ཡོད།

《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》（2022ལོའི་སྒྲུང་ཐུང）ལ་མཚོན་ནའང་། བོད་འབྲེལ་ས་ཁུལ་གྱི་དུས་དེབ་དག་ལས། ལོ་དེའི་སྒྲུང་ཐུང་ཆེས་ལེགས་པའི་ལེགས་པ་དག་བདམས་ཡོད་དེ། སྤེན་པ་ཡི《སྐྱེ་ཁུངས》 ཀླད་ཀོར་གྱི《ཚངས་དབྱངས་རྒྱ་མཚོ》དང་། ཡར་ཀླུང་སྙན་པོ་དབྱངས་གྲོལ་གྱི《ཉི་མའི་ལུག་རྫི》 འོད་སྡེ་ཡི《ཁ་བའི་སྲང་ལམ》 བཀྲ་བྷ་ཡི《སྙིང་སྡུག་མ། ཁྱེད་གང་དུ་བཞུགས》 སྒར་བ་ཚེ་བཀྲའི《ལས་འཕྲོའི་མདུད་པ》 བོན་སྐོར་དོན་གྲུབ་ཚེ་རིང་གི《མེ་ཏོག》 ཏིང་འཛིན་སྒྲོལ་མའི《རྒྱུན་ལྡན་གྱི་ཉིན་མོ》 སྙན་བུའི《རྨི་ལམ་གྱི་བུ་མོ》སོགས་སྒྲུང་ཐུང13བསྡུས་ཡོད། སྒྲུང་ཐུང་དེ་དག་ལ་མཚོན་ནའང་བརྗོད་བྱ་དང་མཚོན་ཐབས། ཚིག་སྦྱོར་གང་རུང་གི་ཐད་ནས་ལོ་དེའི་སྒྲུང་ཐུང་རྩེ་གྲ་ཡི་གྲས་སུ་ཚུད་པར་སེམས།

《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》（2022ལོའི་སྒྲུང་འབྲིང）ཏུ་བོད་ཀྱི་རྩོམ་པ་པོ་གྲགས་ཅན་སྟག་འབུམ་རྒྱལ་གྱི《འཚོ་བའི་རོལ་རྩེད》དང་མི་ལ་ཙི་ཙིའི《སྟག་མོ་ཁའི་ཟམ་པ》སོགས་སྒྲུང་འབྲིང5བདམས་ཡོད། སྒྲུང་འབྲིང་འདི་དག་ནི་ལོ་དེའི་ནང་གི་བོད་ཡིག་སྒྲུང་འབྲིང་གི་འཐུས་ཚབ་བརྩམས་ཆོས་སུ་བགྲང་བར་རུང་། འདིར་བཀོད་པའི་བརྩམས་ཆོས་གང་ཡིན་ཡང་རྗོད་བྱེད་མཛེས་ཤིང་བབ་ཆགས་ལ། བརྗོད་བྱ་ཟབ་ཅིང་དུས་རབས་ཀྱི་འགྲོས་དང་མཐུན་པར་མ་ཟད། བྱུང་རིམ་མཚར་ཞིང་མི་སྣའི་སྣང་བརྙན་གསོན་ཉམས་དོད་པས། བརྩམས་ཆོས་སོ་སོར་ཚད་མཐོ་བའི་བསམ་བློའི་རང་བཞིན་དང་སྒྱུ་རྩལ་གྱི་རང་བཞིན་ལྡན་ངེས་སོ། །

《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》（2022ལོའི་སྙན་ངག）ཏུ་ཁྱུང་གཤོག་གི《མཚན་མོའི་ཁེར་རྐྱང》དང་།  རང་གྲོལ་སྒྲོལ་མའི《སྙིང་སྡུག》 བན་ཤུལ་དཔའ་མཁར་རྒྱལ་གྱི《མདའ་དང་འཕང་གི་བྱུང་བ》   འབྲོང་ཕྲུག་གི《གཡུ་ཆུང་དྲུག་དཀར》 ཁ་བ་ལྷ་མོའི《ས་སྨྱུག་གི་ཁ་དོག་འགྱུར་བ་ནས》 མདའ་བཙན་པོའི《སྡུག་བསྔལ་ལས་བཞུར་བའི་མཛེས་པ》 ཅོ་བྱང་སྐར་གྱི《འཇིག་རྟེན་གྱི་བག་མ》སོགས་ཚིག་སྦྱོར་དང་བསམ་བློའི་མཛེས་པ་ཉིས་ཆར་ཕུལ་དུ་བྱུང་བའི་སྙན་ངག83བདམས་ཡོད། སྙན་རྩོམ་འདི་དག་གིས་འཕེལ་རྒྱས་ལ་ཁ་ཕྱོགས་པའི་བོད་ཀྱི་དེང་རབས་སྙན་ངག་གི་གནས་བབ་བཟང་བོ་མཚོན་ཐུབ་པར་མ་ཟད། ད་དུང་དུས་མཚམས་ཤིག་གི་བོད་ཀྱི་དེང་རབས་སྙན་ངག་གི་ཟབ་ཚད་དང་ལྕི་ཚད་ཀྱང་རྟོགས་ཐུབ།

《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》（2022ལོའི་ལྷུག་རྩོམ）ཏུ་རྣམ་གླིང་རིན་ཆེན་གྱི《བྱེ་ཐང་གི་ཕོ་རྒོད》དང་། སེང་གཤོང་སྙིང་བྱམས་རྒྱལ་གྱི《རོང་བོ་དགུ་ཆུ》 ཚྭ་རྡེའུ་ཡི《ཨ་ཁུ་ལོ་ལོན། འཇིག་རྟེན་སོ་རྙིང་མཚམས་ཀྱི་ཐོ་ཡོར》སོགས་ལྷུག་རྩོམ19བདམས་ཡོད། ལྷུག་རྩོམ་གྱི་བརྗོད་བྱའི་ཆ་ནས་མི་ཚེ་ཡི་མྱོང་བ་སྟོན་པའི་ལྷུག་རྩོམ་དང་འཚོ་བ་ཡི་ཆོས་ཉིད་བརྗོད་པའི་ལྷུག་རྩོམ། རིག་གནས་ཀྱི་བྲོ་བ་བསྐྱེད་པའི་ལྷུག་རྩོམ་སོགས་ཡོད་ལ། འབྲི་ཐབས་ཀྱི་ཆ་ནས་ཚོར་བ་རླབས་ལྟར་འཕྱོ་བའི་ཡིད་འགྱུར་དང་། བྱུང་རིམ་ཆུ་བཞིན་བཞུར་བའི་དོན་བརྗོད། ཞིབ་འབྲི་ཀླུང་ལྟར་མེར་བའི་སྤྲོས་པ་ཡང་ཡོད། མདོར་ན་རྩོམ་པ་པོའི་མྱོང་བ་ངོ་མ་དང་བརྩེ་བ་རྣལ་མ། ཚོར་བ་དག་མ་ཞིག་གིས་བདེན་པའི་འཚོ་བ་དང་གདོད་མའི་ཆོས་ཉིད་དེ་རྩོམ་རིག་གི་ལམ་ནས་གསལ་བར་བསྟན་ཡོད།《ཀྲུང་གོའི་བོད་ཀྱི་དེང་རབས་རྩོམ་རིག་ལོ་དེབ》（2022ལོ）དཔེ་ཚོགས་འདི་ཀློག་པ་པོ་རྣམས་ལ་བསམ་བློའི་རྒྱགས་ཕྱེ་རུ་ཕུལ་བ་ལགས་ན། ཀློག་མཁན་དག་གིས་དགྱེས་བཞིན་དཔེ་ཀློག་གནང་བར་ཞུ།