མཚོ་བྱང་ཁུལ་གྱི2023ལོའི་ལས་རིགས་སློབ་གསོའི་བྱེད་སྒོའི་གཟའ་འཁོར་ཏེ། ཤར་ནུབ་རྒྱུད་ཀྱི་ལས་རིགས་སློབ་གྲྭའི་དབར་གྱི་མཉམ་ལས་བརྗེ་རེས་ཚོགས་འདུ་སྐབས་དང་པོ་དང་ཧྲན་ཏུང་དང་མཚོ་སྔོན་གྱི་སློབ་གསོ་གླེང་སྟེགས་སྐབས20པ་འཚོགས།

ཡོང་ཁུངས། གངས་ལྗོངས་འཕྲིན་གསར། རྩོམ་སྒྲིག་པ། དབང་ཆེན་དོན་འགྲུབ། 2023-05-21 21:49:24 ཀློག་གྲངས།299

ཟླ5པའི་ཚེས19ཉིན་གྱི་སྔ་དྲོར། མཚོ་བྱང་ཁུལ་སློབ་གསོ་ཅུས་དང་ཧྲན་ཏུང་མཚོ་སྐྱོར་ལས་བྱེད་པའི་དོ་དམ་ཚན་ཆུང་གིས་ཐུན་མོང་ཐོག་གཙོ་སྒྲུབ་དང་མཚོ་བྱང་ཁུལ་ལས་རིགས་ལག་རྩལ་སློབ་གྲྭས་འགན་སྒྲུབ་བྱས་པའི་མཚོ་བྱང་ཁུལ་གྱི2023ལོའི་ལས་རིགས་སློབ་གསོའི་བྱེད་སྒོའི་གཟའ་འཁོར་ཏེ། ཤར་ནུབ་རྒྱུད་ཀྱི་ལས་རིགས་སློབ་གྲྭའི་དབར་གྱི་མཉམ་ལས་བརྗེ་རེས་ཚོགས་འདུ་སྐབས་དང་པོ་དང་ཧྲན་ཏུང་དང་མཚོ་སྔོན་གྱི་སློབ་གསོ་གླེང་སྟེགས་སྐབས20པའི་མགོ་རྩོམ་མཛད་སྒོ་ནུབ་མཚོ་གྲོང་རྡལ་དུ་འཚོགས།

མཚོ་བྱང་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་དང་། མཚོ་སྔོན་ཞིང་ཆེན་སློབ་གསོ་ཐིང་གི་ཐིང་ཀྲང་གཞོན་པ་ཧོ་ཞུང་ཧྥེ། ཧྲན་ཏུང་ཞིང་ཆེན་སློབ་གསོ་ཐིང་སློབ་གསོ་ཚན་རིག་གླིང་གི་ཏང་ཨུའི་ཧྲུའུ་ཅིའམ་ཡོན་ཀྲང་ཧྲིན་ཕེ་ཞོན་བཅས་མགོ་རྩོམ་མཛད་སྒོར་ཕེབས་ཤིང་ཤིས་ཚིག་ཕུལ་ལ། ཚོགས་ཞུགས་ལས་རིགས་སློབ་གླིང་གི་འཐུས་མིས་ཤིས་ཚིག་ཕུལ། ཁུལ་དཔོན་གཞོན་པ་ཧ་ཝུན་ཞུག་གིས་མགོ་རྩོམ་མཛད་སྒོ་གཙོ་སྐྱོང་གནང་།

ཀྲང་ཧྲིང་ཡོན་གྱིས་ཤིས་ཚིག་ཕུལ་སྐབས་ཉེ་བའི་ལོ་ཤས་རིང་མཚོ་བྱང་ཁུལ་གྱི་ལས་རིགས་སློབ་གསོས་སྤྱི་ཁོག་དཔལ་འབྱོར་གྱི་དུས་བབ་དང་མཚོ་བྱང་བྱ་བའི་སྤྱི་ཡོངས་ལ་དམ་པོར་དམིགས་ནས། “3+2”དང“3+3”སོགས་འབྲིང་རིམ་དང་མཐོ་རིམ་ལས་རིགས་ཀྱི་སློབ་རིམ་འཕར་བའི་ཐབས་ལམ་རྒྱ་ཆེར་བཏང་སྟེ། ཁྱད་ལྡན་ལེགས་ཆའི་ཆེད་ལས་འགུལ་རྣམ་ལེགས་སྒྲིག་དང་འཛུགས་སྐྲུན་བྱས་པ་དང་། ལྷག་པར་དུ“ལྔ་བཅུ་བཞིའི”ཚུན་མཚོ་བྱང་ཁུལ་གྱིས་ཐོན་ལས་ཀྱི“གནས་བཞི”འཛུགས་སྐྲུན་དང་ཁྲོམ་རའི་དཔལ་འབྱོར་འཕེལ་རྒྱས་དང་ཐོན་ལས་ཕྱོགས་སྒྱུར་རིམ་སྤོར་ལ་དམིགས་ནས་ཆེད་ལས་བཀོད་སྒྲིག་དང་ཆེད་ལས་གྲུབ་ཆ་ཤུགས་ཆེན་སྒོས་ཇེ་ལེགས་སུ་བཏང་བ་དང་། སློབ་ཁྲིད་སྤུས་ཚད་ལྟ་ཞིབ་ཚད་ལེན་དང་ལྟ་སྐུལ་སློབ་སྟོན་མ་ལག་འཐུས་ཚང་དུ་བཏང་བ། གྲངས་འཛིན་ཅན་གྱི་སློབ་ཁྲིད་ཐོན་ཁུངས་འཛུགས་སྐྲུན་དང་བཀོལ་སྤྱོད་ལ་སྐུལ་འདེད་བཏང་སྟེ། དེང་རབས་ལས་རིགས་སློབ་གསོ་སྔར་བས་འཕེལ་རྒྱས་གཏོང་བར་བར་སྟོང་ཆེན་པོ་འདོན་སྤྲོད་བྱས་ཡོད་པར་བསྟན།

ཀྲང་ཧྲིང་ཡོན་གྱིས་ཐེངས་འདིའི་བྱེད་སྒོ་བདེ་བླག་ངང་སྒྲུབ་པ་དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཤར་ནུབ་མཉམ་ལས་དང་ལས་རིགས་སློབ་གསོའི་བྱ་བའི་སྐོར་གྱི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་པའི་དངོས་སྒྲུབ་བྱ་ཐབས་ཤིག་ཡིན་ཞིང་། ལས་རིགས་སློབ་གསོའི་ཁྱབ་ཁོངས་བཅོས་སྒྱུར་ལ་སྐུལ་འདེད་ཏན་ཏིག་གཏོང་བའི་དམ་འཛིན་བྱ་གཞི་ནུས་ལྡན་ཞིག་ཀྱང་ཡིན་པར་མ་ཟད། མཚོ་བྱང་གི་ལས་རིགས་སློབ་གསོའི་བྱ་བའི་ཕན་འབྲས་ལ་ཁྱོན་ཡོངས་ནས་ཞིབ་བཤེར་དང་གཅིག་སྡུད་ཐོག་འགྲེམས་སྟོན་བྱས་པ་ཞིག་ཀྱང་ཡིན། ཞིང་ཆེན་ཕྱི་ནང་གི་ལས་རིགས་སློབ་གླིང་སོ་སོས་ཐེངས་འདིའི་ལས་སྟེགས་ལ་བརྟེན་ནས་ཕན་ཚུན་བར་རྒྱུས་ལོན་ཟབ་ཏུ་གཏོང་བ་དང་འབྲེལ་གཏུག་ལ་ཤུགས་སྣོན་པ། མཉམ་ལས་ཀྱི་ལམ་སྲོལ་སྔར་བས་གསར་གཏོད་བྱེད་པ། མཉམ་ལས་ཀྱི་ཁྱབ་ཁོངས་རྒྱ་ཆེར་གཏོང་བ། མཉམ་ལས་ཀྱི་གཞི་ཁྱོན་ཆེ་རུ་གཏོང་བ། མཉམ་ལས་ཀྱི་ཕན་འབྲས་ཆེ་རུ་གཏོང་བ་བཅས་བྱས་ནས་ཤར་ནུབ་རྒྱུད་ཀྱི་ལས་རིགས་སློབ་གསོའི་མཉམ་ལས་འབྲེལ་བ་དེ་ཁྱབ་ཆེ་བ་དང་རིམ་པ་མཐོ་བ། ཕྱོགས་མང་བ། རྣམ་པ་མང་བ་བཅས་ཀྱི་ཕྱོགས་སུ་བསྒྱུར་རྒྱུར་རྒྱུན་ཆད་མེད་པར་སྐུལ་འདེད་བཏང་སྟེ་ལས་རིགས་སློབ་གསོའི་མཉམ་ལས་ཀྱི་རྣམ་པ་གསར་པ་ཧུར་ཐག་གིས་གཏོད་དགོས་པ་ནན་གྱིས་བསྟན།

ཐེངས་འདིའི་བྱེད་སྒོར་ཧྲན་ཏུང་ཞིང་ཆེན་དང་སི་ཁྲོན་ཞིང་ཆེན། ཀན་སུའུ་ཞིང་ཆེན། མཚོ་སྔོན་ཞིང་ཆེན་བཅས་ཀྱི་འབྲིང་རིམ་དང་མཐོ་རིམ་ལས་རིགས་སློབ་གླིང45དང་དངོས་སྦྱོང་རྟེན་གཞི12། སློབ་ཁྲིད་ལག་ལེན་རྟེན་གཞི་བཅས་ཀྱི་འཐུས་མི་ཞུགས་ཡོད་ཅིང་། མགོ་རྩོམ་མཛད་སྒོའི་ཐོག་མཚོ་བྱང་ཁུལ་ལས་རིགས་ལག་རྩལ་སློབ་གྲྭའི་དངོས་སྦྱོང་ལག་ལེན་རྟེན་གཞིར་སྒོ་བྱང་སྤྲོད་པའི་མཛད་སྒོ་འཚོགས་ནས་མཚོ་བྱང་ཁུལ་ལས་རིགས་ལག་རྩལ་སློབ་གྲྭའི་ཁྱད་ལྡན་ལེགས་ཆའི་ཆེད་ལས་སློབ་ཁྲིད་ཀྱི་གྲུབ་འབྲས་འགྲེམས་སྟོན་བྱས།

མཚོ་བྱང་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་གཞོན་པ་རུང་ཧུང་ཀྲི་དང་། ཁུལ་ཨུའི་རྒྱུན་ཨུའམ་འཐབ་ཕྱོགས་གཅིག་གྱུར་པུའི་པུའུ་ཀྲང་མགོན་པོ་ཚེ་བརྟན། ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རིན་གཞོན་པ་ལི་ཞུ་ཀྲེན། ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་ཁྲང་ལིན། ཧྲན་ཏུང་ཞིང་ཆེན་ཝེ་ཧའེ་གྲོང་ཁྱེར་སྲིད་གྲོས་ཀྱི་ཀྲུའུ་ཞི་གཞོན་པའམ་གྲོང་ཁྱེར་དགུ་གསུམ་སློབ་ཚོགས་ཀྱི་ཀྲུའུ་རིན་ཨུ་ཡོན། གྲོང་ཁྱེར་ལས་རིགས་འབྲིང་རིམ་ཆེད་ལས་སློབ་གྲྭའི་སློབ་གཙོ་ཀྲུའུ་ཝུན་ཅོན། ཧྲན་ཏུང་ཕྱུགས་ལས་སྨན་བཅོས་ལས་རིགས་སློབ་གླིང་གི་ཡོན་ཀྲང་ལི་ཞུའེ་ཐའེ། ཧྲན་ཏུང་རང་བྱུང་ཚན་རིག་དང་བཟོ་སྐྲུན་རིག་པའི་ལས་རིགས་སློབ་གླིང་གི་ཡོན་ཀྲང་ཀྲང་ལུང་ཧའེ། ཧྲན་ཏུང་ཞིང་ཆེན་ལིན་དབྱི་ལས་རིགས་སློབ་གླིང་གི་ཡོན་ཀྲང་ཨན་ཧྥིན་ཧི། ཧྲན་ཏུང་ཞིང་ཆེན་པིན་ཀྲིག་ལས་རིགས་སློབ་གླིང་གི་ཡོན་ཀྲང་ཧྲིན་པའོ་ཀྲུང་། ཧྲན་ཏུང་ཞིང་ཆེན་པིན་ཀྲིག་གྲོང་ཁྱེར་ལག་རྩལ་སློབ་གླིང་གི་ཏང་ཨུའི་ཧྲུའུ་ཅི་ཏིང་ཨའེ་ཅུན་བཅས་མགོ་རྩོམ་མཛད་སྒོར་ཞུགས།