མདོ་ལ་རྫོང་གིས2025ལོའི་ལོ་སར་བསུ་བའི་ཇ་སྟོན་ཚོགས་འདུ་བསྡུས།

ཟླ1པོའི་ཚེས13ཉིན། རང་རྫོང་གིས2025ལོའི་ལོ་སར་བསུ་བའི་ཇ་སྟོན་ཚོགས་འདུ་བསྡུས། རྫོང་ཨུའི་ཧྲུའུ་ཅི་ཀང་ཧྥུའུ་ཡིས་ཤིས་ཚིག་ཕུལ།

རྫོང་ཨུའི་ཧྲུའུ་ཅི་གཞོན་པའམ་རྫོང་སྲིད་གཞུང་གི་རྫོང་དཔོན་གཞོན་པ། རྫོང་དཔོན་ཚབ་མ་དམེ་རྒྱལ་མཚན་དང་། རྫོང་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ལི་ཁྲེང་ཞང་སོགས་ཁྱིམ་སྡོད་རྫོང་རིམ་པའི་འགོ་ཁྲིད་ཇ་སྟོན་ཚོགས་འདུ་ལ་ཞུགས།

རྫོང་སྲིད་གྲོས་ཀྱི་ཀྲུའུ་ཞི་ཨན་ཧྲིན་ཧུའེ་ཡིས་ཇ་སྟོན་ཚོགས་འདུར་གཙོ་སྐྱོང་གནང་།

ཀང་ཧྥུའུ་ཡིས་ཤིས་ཚིག་ཁྲོད་རྫོང་ཨུ་དང་རྫོང་དམངས་ཆེན། རྫོང་སྲིད་གཞུང་། རྫོང་སྲིད་གྲོས་བཅས་ཀྱི་ཚབ་བྱས་ནས་རྫོང་ཡོངས་ཀྱི་ལས་བྲལ་ངལ་གསོ་གནང་བའི་ལས་བྱེད་རྒན་པ་དང་བློ་མཐུན་རྒན་པ། ཏང་ཕྱིའི་མི་སྣ། རིགས་ཁག་གི་མང་ཚོགས་དང་མདོ་ལའི་འཕེལ་རྒྱས་ལ་དོ་ཁུར་རྒྱབ་སྐྱོར་གནང་མཁན་ཡོངས་ལ་ཟོལ་མེད་ཀྱི་འཚམས་འདྲི་དང་ཡིད་འོང་གི་སྨོན་འདུན་ཞུས།

ཀང་ཧྥུའུ་ཡིས་འདས་སོང་གི2024ལོ་ནི་མདོ་ལའི་དཔལ་འབྱོར་སྤྱི་ཚོགས་འཕེལ་རྒྱས་གཏོང་བའི་འོས་འགན་ཆེས་ལྕི་བའི་ལོ་ཞིག་ཡིན་ལ། རྫོང་ཡོངས་ཀྱིས་མཉམ་གཅིག་དཀའ་ཁག་ལ་གདོང་གཏད་ཅིང་ཉམས་སད་ཆེན་པོ་ཐེག་པའི་ལོ་ཞིག་ཀྱང་ཡིན། ལྷག་ཏུ་རྫོང་ཡོངས་ཏང་ཡོན་ལས་བྱེད་དང་མང་ཚོགས་ཀྱིས་བློ་གཅིག་སེམས་གཅིག་དང་མཉམ་གཅིག་མདུན་སྐྱོད་སྒོས་ཕྱོགས་ཡོངས་ནས་རྒྱལ་ཁ་བླངས་པའི་ལོ་ཞིག་ཡིན་ཞེས་བསྟན།

ཀང་ཧྥུའུ་ཡིས་ལོ་འདིའི་ནང་ང་ཚོས་ཏང་ཀྲུང་དབྱང་དང་ཞིང་ཆེན། ཁུལ་ཨུའི་སྟོབས་ལྡན་གྱི་འགོ་ཁྲིད་འོག རྫོང་ཡོངས་ཀྱི་རིགས་ཁག་ལས་བྱེད་མང་ཚོགས་རྣམས་ལ་མཐུན་སྒྲིལ་དང་སྣེ་ཁྲིད་དེ་ཞུམ་མེད་མདུན་སྐྱོད་དང་དཀའ་ཁག་ངང་གིས་སེལ་ཏེ་དོན་ཆེན་དོན་བཟང་རབ་དང་རིམ་པ་སྒྲུབ་ནས་འགྲུབ་སྟེ་ལས་སླ་མོ་མིན་ཞིང་འབྲས་བཟང་སྨིན་པའི་རྒྱུགས་ལན་ཞིག་སྤྲད། ལོ་གཅིག་གི་རིང་། ང་ཚོས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ཤིང་། ཏང་གི་ཚོགས་ཆེན་ཐེངས་ཉི་ཤུ་བ་དང་སྐབས་ཉི་ཤུ་བའི་ཚང་འཛོམས་གྲོས་ཚོགས་ཐེངས་གཉིས་པ། ཐེངས་གསུམ་པ་བཅས་ཀྱི་དགོངས་དོན་ལ་ཁྱོན་ཡོངས་ནས་སློབ་སྦྱོང་དང་ལག་བསྟར་བྱས། ཏང་ལ་དོ་དམ་དང་ཏང་བཅོས་སྐྱོང་གི་ཆབ་སྲིད་འགན་འཁྲི་དམ་པོར་འཁུར་ཞིང་། ཏང་གི་སྒྲིག་ཁྲིམས་སློབ་སྦྱོང་སློབ་གསོ་ཏན་ཏིག་གིས་སྤེལ་ཏེ་རྫོང་ཡོངས་གོང་འོག་ཚང་མས་བསམ་བློའི་རྨང་རྩ་རྒྱུན་མཐུད་སྲ་བརྟན་དང་ཆབ་སྲིད་ལྟ་སྐུལ་ཁྱོན་ཡོངས་ནས་དྲག་པོ། ལས་སྒྲུབ་རྣམ་པ་སྔར་བས་ལེགས་པོ་བྱུང་། ལོ་གཅིག་གི་ནང་ང་ཚོས་འཕེལ་རྒྱས་ཀྱི་འདུ་ཤེས་གསར་བ་ཆ་ཚང་དང་ཡང་དག ཁྱོན་ཡོངས་ནས་དོན་འཁྱོལ་བྱས། འཕེལ་རྒྱས་ཀྱི་རྣམ་པ་གསར་བའི་ནང་ཧུར་ཐག་གིས་ཞུགས་ཤིང་། གསར་དར་ཐོན་ལས་སྣ་མང་གསོ་སྐྱོང་བྱས། ཐོན་ལས་དང་པོ་གཉིས་པ་གསུམ་པའི་མཉམ་འདྲེས་འཕེལ་རྒྱས་མགྱོགས་མྱུར་གྱིས་སྐུལ་འདེད་བཏང་། རྒྱལ་ཡོངས་དཔལ་ཡོན་གྲོང་ཁྱེར་བསྐྲུན་པ་ལ་མདོག་དང་ལྡན་ཞིང་། སྐྱེ་ཁམས་དཔལ་ཡོན་བཙན་ས་བསྐྲུན་པ་ལ་ཤུགས་དང་ལྡན་པ། དཔལ་འབྱོར་གྱི་ཚད་གཞི་ཁག་མཐོར་འདེགས་ཡོང་བ་མངོན་གསལ་ཡིན། ལོ་གཅིག་གི་རིང་། ང་ཚོས་མི་དམངས་བླ་ན་མེད་པ་རྒྱུན་འཁྱོངས་སྒོས་ལས་ཞུགས་དང་འབབ་འཕར། སློབ་གསོ། སྨན་བཅོས། “རྒན་གཅིག་ཆུང་གཅིག”སོགས་དམངས་འཚིས་བྱ་བ་དངོས་རྒྱུན་མཐུད་དམ་འཛིན་བྱས་ཤིང་། གཞི་རྩའི་དམངས་འཚིས་ཀྱི་མ་རྩ་གཏོང་སྒོ་ལ་ཤུགས་བསྣན་པ་དང་། རྫོང་ཡོངས་ནོར་སྲིད་ལས་དམངས་འཚིས་གཏོང་སྒོ80%ཡན་དུ་ཁག་ཐེག་བྱས། མང་ཚོགས་ཀྱི་ཁེ་ཕན་དངོས་ལ་འབྲེལ་བའི་གནད་དོན་མང་ཤོས་ཤིག་ལ་ཐག་གཅོད་ནུས་ལྡན་ཐོབ་སྟེ་དམངས་འཚིས་བདེ་རྩ་སྔར་བས་དངོས་ཡོད་དུ་སོང་ཞེས་བསྟན།

ཀང་ཧྥུའུ་ཡིས2025ལོ་ནི“ལྔ་ཚན་བཅུ་བཞི་བ”མཇུག་སྒྲིལ་བའི་ལོ་ཡིན་ལ། མདོ་ལའི་སྤུས་ཚད་མཐོ་བའི་འཕེལ་རྒྱས་དངོས་ཡོད་དུ་སྒྲུབ་པའི་ལོ་ཡང་ཡིན། ལོ་གསར་བའི་ནང་ང་ཚོས་བརྟན་ཐོག་ཡར་བརྩོན་དང་འཕེལ་རྒྱས་ཁྲོད་བརྟན་ལྷིང་ལ་སྐུལ་འདེད། སྔོན་འཛུགས་རྗེས་གཏོད་སྒོས་སྲིད་གཙང་སྲོལ་དག་གི་ཆབ་སྲིད་སྐྱེ་ཁམས་དང་དར་རྒྱས་མཉམ་བསྐྱེད་ཀྱི་ཐོན་ལས་སྐྱེ་ཁམས། སྡོད་བདེ་ལས་བརྩོན་གྱི་གྲོང་ཤང་སྐྱེ་ཁམས། འཆམ་མཐུན་བརྟན་ལྷིང་གི་སྤྱི་ཚོགས་སྐྱེ་ཁམས་མགྱོགས་མྱུར་གྱིས་བསྐྲུན་ཞིང་། ཀུན་གྱིས་མདོ་ལ་ཤེས་པ་དང་མདོ་ལར་དགའ་བ། མདོ་ལ་སྤེལ་བའི་འོས་འགན་ཕྲག་ཏུ་འཁུར་བའི་རེ་བ་བཅངས་ཡོད་ལ། སྤྱི་ཚོགས་ལས་རིགས་སོ་སོའི་སྟོབས་ཤུགས་གཅིག་ཏུ་བསྒྲིལ་ནས་རྫོང་ཡོངས་སུ་བསམ་པ་གཅིག་ཏུ་བགོ་བ་དང་ཤེད་ཤུགས་གཅིག་ཏུ་འདོན་པ། སྒྲུབ་སེམས་གཅིག་ཏུ་འདུས་པའི་རྣམ་པ་གྲུབ་ནས“ཐོན་ལས་དར་བ་དང་སྐྱེ་ཁམས་མཛེས་པ། མང་ཚོགས་ཕྱུག་པ”ཡི་མདོ་ལའི་དཔེ་རིས་ཧུར་ཐག་གིས་འབྲི་དགོས་ཞེས་ནན་གྱིས་བསྟན།

རྫོང་ཨུའི་ཧྲུའུ་ཅི་གཞོན་པའམ་རྫོང་སྲིད་གཞུང་གི་རྫོང་དཔོན་གཞོན་པ། རྫོང་དཔོན་ཚབ་མ་དམེ་རྒྱལ་མཚན་གྱིས2024ལོའི་རྫོང་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་གནས་ཚུལ་ཡོངས་བསྒྲགས་བྱས།

དགའ་སྤྲོ་ཞི་ལྷོད་ཀྱི་རྣམ་པའི་ཁྲོད་ཚོགས་ཞུགས་མི་སྣ་ཡོངས་གདན་གཅིག་ལ་འཛོམས་ནས་དུས་སྟོན་ལ་རོལ་ཞིང་འབབ་ཡོན་གླེང་ལ། འཕེལ་རྒྱས་ཀྱི་འཆར་འགོད་གླེང་། ལས་འཁྱུར་ལས་བྱེད་རྒན་པ་དང་སྡེ་བའི་ལས་བྱེད་དགོངས་ཞུ་ཅན་གྱི་འཐུས་ཚབ། ཏང་ཕྱིའི་ཕུལ་བྱུང་མི་སྣའི་འཐུས་ཚབ། ངལ་རྩོལ་དཔེ་བཟང་འཐུས་ཚབ། “མདོ་ལའི་ཆེས་མཛེས་པའི་མི”ཡི་འཐུས་ཚབ། སྡེ་བའི“ཨུ་ལྷན་གཉིས”ཀྱི་འགན་ཁུར་འཐུས་ཚབ། ཡུལ་གྲོང་ཁག་དང་སྡེ་ཚན་སོ་སོའི་འགན་ཁུར་བའི་འཐུས་ཚབ་ཇ་སྟོན་ཚོགས་འདུ་ལ་ཞུགས།

ཇ་སྟོན་ཚོགས་འདུའི་སྟེང2024ལོའི་རྫོང་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་གློག་བརྙན་ལ་བལྟས་ནས་ཀུན་གྱིས་གྲུབ་འབྲས་ལ་གདེང་འཇོག་ཐོབ་ཅིང་མདོ་ལའི་མ་འོངས་འབྱུང་འགྱུར་ལ་རེ་ལྟོས་ཀྱིས་ཁེངས། རྫོང་མི་རིགས་སྒྱུ་རྩལ་ཚོགས་པའི་འཁྲབ་སྟོན་གྱ་ནོམ་པའི་ཁྲོད་ཇ་སྟོན་ཚོགས་འདུ་མཇུག་བསྒྲིལ།