མཚོ་བྱང་ཁུལ་མི་དམངས་སྲིད་གཞུང་དང་སི་ཁྲོན་ཞིང་ཆེན་རང་བྱུང་ཐོན་ཁུངས་མ་འཇོག་ཚོགས་པ་གཉིས་ཀྱིས་བཞུགས་མོལ་སྤེལ་རེས་བྱས་པ།

ཀྲང་ཧྲིང་ཡོན་གྱིས་ཁུལ་ཨུ་དང་ཁུལ་སྲིད་གཞུང་གི་ཚབ་བྱས་ནས་སི་ཁྲོན་ཞིང་ཆེན་རང་བྱུང་ཐོན་ཁུངས་མ་འཇོག་ཚོགས་པའི་སྤྱི་ཁྱབ་བདག་གཉེར་བ་ཅང་ཐའོ་དང་བཅས་པ་ཕེབས་པར་སྤྲོ་སེམས་འཁོལ་བའི་དགའ་བསུ་བྱས་པ་དང་། དུས་ཡུན་རིང་པོའི་ནང་མཚོ་བྱང་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རོགས་རམ་བྱས་པར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་འབྲེལ་མཚོ་བྱང་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཞི་རྩའི་གནས་ཚུལ་ངོ་སྤྲོད་ཞིབ་ཕྲ་བྱས། ཁོང་གིས་ཉེ་བའི་ལོ་ཤས་རིང་མཚོ་བྱང་ཁུལ་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དང་མཚོ་བྱང་ལ་རྟོག་ཞིབ་བྱེད་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ཁྱོན་ཡོངས་ནས་དོན་འཁྱོལ་བྱས་ཏེ། ཞིང་ཨུ་དང་ཞིང་ཆེན་སྲིད་གཞུང་གིས་མཚོ་བྱང་འཕེལ་རྒྱས་གཏོང་རྒྱུའི་གནས་གཏན་འཁེལ་གྱི་བླང་བྱ་དང་དམ་པོར་བསྟུན་པ་དང་། མདོ་ལ་རིང་མོ་དང་མཚོ་སྔོན་པོ་གཉིས་ཀྱི་རྒྱལ་ཁབ་སྤྱི་གླིང་འཛུགས་རྒྱུར་གཞི་ཚུགས་ནས། སྐྱེ་ཁམས་སྔོན་ལ་འཛིན་པའི་འདུ་ཤེས་མཐའ་འཁྱོངས་དང་། རྒྱལ་ཁབ་ཀྱི་ནུས་རྒྱུ་གཙང་མའི་ཐོན་ལས་ཀྱི་མཐོ་ས་གཏོད་པ་དང་རྒྱལ་སྤྱིའི་སྐྱེ་ཁམས་གནས་སྐོར་གྱི་དམིགས་ས་འཛུགས་སྐྲུན། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་བསྐྲུན་པ་བཅས་མགྱོགས་སུ་བཏང་བས། འཕེལ་རྒྱས་ཀྱི་འཕེལ་ཕྱོགས་ཆེན་པོ་དང་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད། སི་ཁྲོན་ཞིང་ཆེན་རང་བྱུང་ཐོན་ཁུངས་མ་འཇོག་ཚོགས་པ་དང་གཏེར་རྫས་ཐོན་ཁུངས་གསར་སྤེལ་བེད་སྤྱོད་དང་སྐྱེ་ཁམས་ཁོར་ཡུག་སྲུང་སྐྱོང་དང་ཉམས་གསོ། སྨན་རྫས་བཟོ་སྐྲུན་ཐོན་ལས་འཕེལ་རྒྱས། གསར་བརྗེའི་ཞིབ་འཇུག་སློབ་སྦྱོང་གསོ་སྦྱོང་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་སྔར་བས་ཤུགས་སྣོན་རྒྱག་པ་དང་འཐབ་ཇུས་མཉམ་ལས་འབྲེལ་བ་མགྱོགས་སུ་བཏང་ནས། ས་གནས་དང་ཁེ་ལས་ཀྱིས་ཁྱབ་ཁོངས་སྔར་ལས་རྒྱ་ཆེ་བ་དང་གཏིང་ཚད་སྔར་ལས་ཟབ་པའི་གཉིས་ཕན་མཉམ་ཁེ་མངོན་འགྱུར་ཡོང་བར་སྐུལ་འདེད་གཏོང་རྒྱུའི་རེ་བ་ཡོད་ཅེས་གསུངས། ཁོང་གིས་མཚོ་བྱང་གིས་ཁེ་ལས་ཀྱི་དགོས་མཁོར་གཞི་ཚུགས་ནས་ཚོང་གཉེར་ཁོར་ཡུག་བཟང་པོ་དང་སྤུས་ལེགས་ནུས་ཆེའི་ཞབས་ཞུར་བརྟེན་ནས། རྒྱུ་རྐྱེན་གཙོ་བོའི་འགན་སྲུང་དང་རྣམ་གྲངས་ཀྱི་ས་ཆ་སོགས་ཀྱི་ཐད་རྗེས་འདེད་ཞབས་ཞུའི་ལས་དོན་ཡག་པོ་བསྒྲུབས་ཏེ། ཁེ་ལས་ལ་འཕེལ་རྒྱས་ཀྱི་ཁོར་ཡུག་བཟང་པོ་གཏོད་རྒྱུ་ཡིན་ཞེས་གསུངས།

ཅང་ཐའོ་ཡིས་མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་དུས་ཡུན་རིང་པོའི་ནང་ཁེ་ལས་འཕེལ་རྒྱས་ལ་སེམས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། སི་ཁྲོན་ཞིང་ཆེན་རང་བྱུང་ཐོན་ཁུངས་མ་འཇོག་ཚོགས་པའི་ཐོན་ལས་བཀོད་སྒྲིག་དང་འཐབ་ཇུས་ཀྱི་འདུན་ཚུལ། ལས་སྒོའི་ཁྱབ་ཁོངས། མཉམ་ལས་ཀྱི་འདོད་ཚུལ་བཅས་ཕྱོགས་ཡོངས་ནས་ངོ་སྤྲོད་གནང་། ཁོང་གིས་མཚོ་བྱང་ས་ཁུལ་གྱི་གནས་བབ་ལེགས་ཆ་མངོན་གསལ་ཡིན་པ་དང་། ཐོན་ཁུངས་ཀྱི་སྐྱེས་སྟོབས་ལེགས་པ། ཐོན་ལས་སྒྲིག་གཞི་འཐུས་ཚང་བ། ཚོང་གཉེར་ཁོར་ཡུག་བཟང་བས། ཕྱོགས་གཉིས་པོས་ཐོན་ཁུངས་གསར་སྤེལ་བེད་སྤྱོད་དང་སྐྱེ་ཁམས་ཉམས་གསོ། རང་བྱུང་གནོད་སྐྱོན་འགོག་བཅོས་སོགས་ཀྱི་ཐད་སྤེལ་རེས་མཉམ་ལས་ལ་སྔར་བས་ཤུགས་སྣོན་རྒྱག་པ་དང་། འཕེལ་རྒྱས་ཀྱི་གོ་སྐབས་དམ་འཛིན་བྱེད་པ། ཁེ་ཕན་གྱི་ཐུན་མོང་གི་ཆ་བཙལ་བ། མཉམ་ལས་ཁྱབ་ཁོངས་རྒྱ་ཆེར་གཏོང་བ། ཕྱོགས་གཉིས་པོས་ལེགས་ཆ་གསབ་རེས་དང་འཕེལ་རྒྱས་གཉིས་ཕན་ཡོང་བར་སྐུལ་འདེད་གཏོང་རྒྱུའི་རེ་བ་ཡོད་ཅེས་བཤད།

ཁུལ་སྲིད་གཞུང་གི་དྲུང་ཡིག་ཆེ་མོ་དང་འབྲེལ་ཡོད་དྲུང་ཡིག་ཆེ་མོ་གཞོན་པ། ཁུལ་འཕེལ་རྒྱས་དང་སྒྱུར་བཅོས་ཨུ་ཡོན་ལྷན་ཁང་དང་། ཁུལ་བཟོ་ལས་ཚོང་དོན་དང་ཆ་འཕྲིན་ཅན་ཅུ། ཁུལ་རང་བྱུང་ཐོན་ཁུངས་དོ་དམ་ཅུ། ཁུལ་སྐྱེ་ཁམས་ཁོར་ཡུག་ཅུ། ཁུལ་ནགས་ལས་དང་རྩྭ་ཐང་ཅུ། ཁུལ་གཞུང་དབང་མ་རྩ་མ་འཇོག་གཉེར་སྐྱོང་ཚོགས་པ་ཚད་ཡོད་སྤྱི་གཉེར་བཅས་ཀྱི་འགན་འཁུར་བློ་མཐུན་གཙོ་བོ་དང་། འཇུ་ལག་རྫོང་སྲིད་གཞུང་གི་འགན་འཁུར་བློ་མཐུན། དེ་བཞིན་སི་ཁྲོན་ཞིང་ཆེན་རང་བྱུང་ཐོན་ཁུངས་མ་འཇོག་ཚོགས་པ་དང་ཁོངས་གཏོགས་སྤྱི་གཉེར་གྱི་འབྲེལ་ཡོད་མགོ་ཁྲིད་ཚོགས་འདུའི་ནང་ཞུགས་ཡོད།