ཉིང་རྡུལ་མཚོན་ཆ་ཞིབ་བཟོ་རྟེན་གཞི་སྟེ་རྒྱལ་གཉེར་གཉིས་གཉིས་གཅིག་བཟོ་གྲྭ་རྒྱལ་ཁབ་ཀྱི“བཟོ་ལས་ཤུལ་བཞག་སྲུང་སྐྱོང་བེད་སྤྱོད་ཀྱི་དཔེ་མཚོན་གྱོད་དཔེའི”མིང་ཐོའི་ནང་ཚུད་པ།

ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་མཐར་ཕྱིན་གཏིང་ཟབ་བྱེད་པ་དང་། རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་དང་བཟོ་ལས་ཅན་གསར་གྲས་སུ་འགྱུར་བར་སྐུལ་འདེད་གཏོང་རྒྱུའི་སྐོར་གྱི་ཏང་གི་ཚོགས་ཆེན་ཉི་ཤུ་པའི་འཐབ་ཇུས་ཀྱི་བཀོད་སྒྲིག་ཕྱོགས་ཡོངས་ནས་ལག་ལེན་མཐར་ཕྱིན་བྱེད་པ། སྤྱི་མཐུན་རྒྱལ་ཁབ་ཀྱི་བཟོ་ལས་འཕེལ་རྒྱས་ཀྱི་གཏམ་རྒྱུད་ཡག་པོར་བཤད་པ། བཟོ་ལས་ཀྱི་རིག་གནས་དང་བཟོ་ལས་ཀྱི་སྙིང་སྟོབས་རྒྱུན་འཛིན་དང་དར་སྤེལ་གཏོང་བ་བཅས་དང་། བྱ་སྤྱོད་དངོས་ཀྱི་ཐོག་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ75འཁོར་བར་རྟེན་འབྲེལ་ཞུ་བའི་ཆེད་དུ། རྒྱལ་ཁབ་རིག་དངོས་ཅུ་དང་། བཟོ་ལས་དང་ཆ་འཕྲིན་ཅན་པུ་གཉིས་ཀྱིས“སྤྱི་མཐུན་རྒྱལ་ཁབ་ཀྱི་རྟགས་ཐམ—བཟོ་ལས་ཀྱི་གཟི་འོད་ཀྲུང་ཧྭ་རུ་འཕྲོ”ཞེས་པའི་བརྗོད་བྱ་གཙོ་བོའི་བྱེད་སྒོ་སྤེལ། མཚོ་བྱང་ཁུལ་གྱིས་ད་ཐེངས་ཀྱི་རེ་ཞུའི་ལས་དོན་ལ་ཚད་མཐོའི་མཐོང་ཆེན་བྱས་ནས། མཚོན་བྱེད་རང་བཞིན་ཆེ་བ་དང་བྱ་ཐབས་ནུས་ལྡན། ཕན་འབྲས་མངོན་གསལ་ཡོད་པ། དཔེ་སྟོན་སྣེ་ཁྲིད་ཀྱི་ནུས་པ་ལྡན་པ་བཅས་ཀྱི་སྒོ་ནས་བཟོ་ལས་ཤུལ་བཞག་སྲུང་སྐྱོང་བེད་སྤྱོད་ཀྱི་གྱོད་དཔེ་བསྡུ་རུབ་དང་རེ་ཞུའི་ལས་དོན་ཧུར་ཐག་གིས་སྤེལ།

མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་གསེར་དངུལ་ཐང་རྩྭ་ཐང་དུ་ཡོད་པའི་མ་རྡུལ་མཁར་ནི་དེ་སྔོན་གྱི་འཕྲུལ་ཆས་བཟོ་ལས་པུ་གཉིས་པའི་རྒྱལ་གཉེར་གཉིས་གཉིས་གཅིག་བཟོ་གྲྭ་ཡིན། འདི་ནི་ཀྲུང་གོ་གསར་བའི་ཉིང་རྡུལ་མཚོན་ཆ་དང་པོ་ཞིབ་འཇུག་དང་བཟོ་སྐྲུན་བྱེད་པའི་གནས་གཞི་ཡིན་ལ། ཀྲུང་གོའི་ཉིང་རྡུལ་མཚོན་ཆ་འཕེལ་རྒྱས་འགྲོ་སའང་ཡིན། འདི་རུ་རང་རྒྱལ་གྱི་མ་རྡུལ་འགད་མདེལ་དང་ཆིང་མདེལ་དང་པོ་འཁྲུངས་ཤིང་། རླབས་ཆེ་བའི“མདེལ་གཉིས་སྐར་གཅིག”གི་སྙིང་སྟོབས་གསོ་སྐྱོང་བྱས་ཡོད་ལ། “ཚན་རིག་པའི་”སྙིང་སྟོབས་ཀྱི་འབྱུང་ཁུངས་ཀྱང་ཡིན། གོམ་སྟབས་རྗེས་མར་མཚོ་བྱང་ཁུལ་གྱི་དོན་དངོས་དང་ཟུང་འབྲེལ་གྱིས་མཚོ་བྱང་གི་བཟོ་ལས་རིག་གནས་དང་གསར་བརྗེའི་རིག་གནས་ཀྱི་ནང་དོན་སྔོག་འདོན་གཏིང་ཟབ་བྱེད་པ་དང་། གསར་བརྗེའི་ཐོན་ཁུངས་བེད་སྤྱོད་ཡག་པོ་བྱས་ནས་གསར་བརྗེའི་ཁྲག་རྒྱུད་རྒྱུན་མཐུད་བྱེད་པ།  མཚོ་བྱང་གི་རིག་གནས་ཤུལ་བཞག་སྲུང་སྐྱོང་དང་བེད་སྤྱོད་ལ་ཤུགས་སྣོན་རྒྱག་རྒྱུ་དེ་རིག་གནས་དང་གནས་སྐོར་མཉམ་འདྲེས་དང་རིག་གནས་སྲོག་རྩ་རྒྱུན་འཛིན་ལ་སྐུལ་འདེད་གཏོང་བའི་གོ་སྐབས་གལ་ཆེན་ཞིག་ཏུ་བརྩི་བ། གསར་བརྗེའི་རིག་གནས་ཐོན་ཁུངས་སྲུང་སྐྱོང་དང་བེད་སྤྱོད། རྒྱུན་འཛིན་བཅས་ཀྱི་ལས་དོན་ལ་ཆུ་ཚད་མཐོ་བའི་ངང་སྐུལ་འདེད་བཏང་ནས་རྒྱལ་སྤྱིའི་སྐྱེ་ཁམས་གནས་སྐོར་དམིགས་ས་ཧུར་ཐག་གི་གཏོད་དགོས།