མདོ་ལ་རྫོང་གིས་དོ་དམ་ཚད་ལྡན་གྱིས་སྤུས་ཚད་མཐོ་བའི་སློབ་གསོའི་འཕེལ་རྒྱས་ལ་སྐུལ་འདེད་བཏང་།

མདོ་ལ་རྫོང་གིས་དོ་དམ་ཚད་ལྡན་གྱིས་སྤུས་ཚད་མཐོ་བའི་སློབ་གསོའི་འཕེལ་རྒྱས་ལ་སྐུལ་འདེད་བཏང་།

ད་ལོ་ནས་བཟུང་། མདོ་ལ་རྫོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“མི་དམངས་ཀྱིས་ཡིད་ཚིམས་པའི་སློབ་གསོ་ལེགས་པོར་སྒྲུབ་པ”ཡི་གལ་ཆེའི་མཛུབ་སྟོན་དགོངས་དོན་ནན་ཏན་གྱིས་ལག་བསྟར་བྱས་ཤིང་། སློབ་གསོ་སློབ་ཁྲིད་སྤུས་ཚད་མཐོར་འདེགས་དང་སློབ་གསོ་ཁོར་ཡུག་ལེགས་པོ་སྲུང་སྐྱོང་། སློབ་ཁྲིད་བྱེད་ཐབས་རྒྱུན་མཐུད་ཚད་ལྡན་དུ་བཏང་ནས་མི་དམངས་མང་ཚོགས་ཀྱིས་སློབ་གསོ་ལ་བཅངས་པའི་ཡིད་ཚིམས་ཚད་དང་ཁས་ལེན་ཚད་མུ་མཐུད་མཐོ་རུ་བཏང་།

སློབ་སྒྲུབ་བྱེད་ཐབས་ཁྱོན་ཡོངས་ནས་ཚད་ལྡན་དུ་བཏང་། རྫོང་ཡོངས་འགན་འཁྲི་སློབ་སྐུལ་གྱི་འགན་འཁྲི་ཁུལ་ལ་ལེགས་སྒྱུར་བྱས་ཤིང་། སློབ་སྐུལ་འགན་འཁྲི་དང་འགན་འཁྲི་ཁུལ་གསལ་བོ་བྱས་པ་དང་། སློབ་སྐུལ་དང་འབྲེལ་ཡོད་སྡེ་ཚན་རྩ་འཛུགས་བྱས་ནས་རྫོང་ཡོངས་ཀྱི་སློབ་གྲྭ་ཆུང་འབྲིང་དང་། བྱིས་སྐྱོང་ཁང་བཅས་ལ་ཆེད་དོན་རྟོག་ཞིབ་དང“ཉིན་གཅིག་རྟོག་འདོམས”ཀྱི་ལས་ཀ་སྤེལ། སློབ་གྲྭའི་དོ་དམ་དང་སློབ་རའི་བདེ་འཇགས། གྲོན་དངུལ་གང་བྱུང་དུ་བསྡུ་བ། སློབ་རའི་བརྙས་བཅོས། འཚོ་བཅུད་ཟ་མ་སོགས་སྤྱི་ཚོགས་ཀྱིས་དོ་སྣང་དང་མང་ཚོགས་ཀྱིས་སེམས་ཁུར་བྱེད་བཞིན་པའི་ཚ་གནད་དང་དཀའ་གནད་ལ་རྟོག་འདོམས་ཞིབ་བཤེར་བྱས་ཏེ་སློབ་སྒྲུབ་བྱེད་ཐབས་སྔར་བས་ཚད་ལྡན་དུ་བཏང་།

འོས་འགན་སློབ་གསོའི་སློབ་བསྡུ་ཁྱོན་ཡོངས་ནས་ཚད་ལྡན་དུ་བཏང་བ། རང་རྫོང་གི་དངོས་ཡོད་དང་འབྲེལ་ནས《མདོ་ལ་རྫོང་འོས་འགན་སློབ་གསོའི་ཉི་འོད་སློབ་བསྡུ་ལས་དོན་ཇུས་གཞི》《མདོ་ལ་རྫོང་འོས་འགན་སློབ་གསོའི་སློབ་བསྡུ་སློབ་ཞུགས་བྱ་བའི་མཛུབ་སྟོན》གཏན་འཁེལ་བྱས་ཤིང་། བརྒྱུད་ལམ་མང་པོ་ནས་སྤྱི་ཚོགས་ལ་ཁྱབ་བསྒྲགས་བྱས་པ་དང་། འོས་འགན་སློབ་གསོའི་སློབ་བསྡུ“ཡོངས་བསྒྲགས་དང་འདྲ་མཉམ། དྲང་གཞག”དང“ཉི་འོད་སློབ་བསྡུ”“ཉི་འོད་འཛིན་གྲྭ་དབྱེ་བ”ཏན་ཏིག་གིས་སྒྲུབ་ནས་བསྡུ་རིགས་ཡོད་ཚད་བསྡུ་ཐུབ་པའི་ཁག་ཐེག་བྱས། 

“གཉིས་ཡང”སྲིད་ཇུས་ཁྱོན་ཡོངས་ནས་དངོས་འབེབས་བྱས། རྫོང་ཡོངས་ཀྱི་སློབ་གྲྭ་ཆུང་འབྲིང་གི“དོ་དམ་ཚན་པ་ལྔ”“གཉིས་ཡང”དང་སློབ་ཕྱིའི་ཞབས་ཞུའི་ཆེད་དོན་རྟོག་འདོམས་ཏན་ཏིག་གིས་སྐུལ་འདེད་བཏང་ལ། སློབ་གྲྭ་ཆུང་འབྲིང་གི་ལས་བྱ་དང་གཉིད་གསོ། ཁ་པར། དཔེ་ཀློག ལུས་གཞི་དོ་དམ་དངོས་ཡོད་ཀྱིས་ཇེ་དྲག་ཏུ་བཏང་བ་དང་། སློབ་གསོ་དང་ཁྲོམ་ར་ལྟ་སྐུལ། སྤྱི་བདེ་སོགས་འབྲེལ་ཡོད་ལས་ཁུངས་ཀྱི་མི་སྣ་སྒྲིག་འཛུགས་བྱས་ནས་རྫོང་ཡོངས་ཀྱི་སློབ་ཕྱིའི་ཚད་ལྡན་མ་ཡིན་པའི་གསོ་སྦྱོང་འཛིན་གྲྭ་ལ་གྲལ་བཤེར་བཅོས་སྒྲིག་བྱས་ཤིང་འོས་འགན་སློབ་གསོའི་སློབ་མཚམས་ཀྱི་ལས་བྱའི་ཁུར་བོ་དང་སློབ་ཕྱིའི་གསོ་སྦྱོང་ཁུར་བོ་ཇེ་ཡང་དུ་བཏང་སྟེ་སློབ་གྲུ་ཆུང་འབྲིང་གི་སྤུས་ཚད་མཐོ་བའི་ཚད་ལྡན་ཅན་དང་ཚན་རིག་ཅན་གྱི་མ་ལག་འཛུགས་སྐྲུན་ལ་ནུས་ལྡན་འགན་སྲུང་མཁོ་འདོན་བྱས།

དམིགས་བསལ་སློབ་གསོ་ལ་ཁྱོན་ཡོངས་སྐུལ་འདེད་བཏང་བ། རྫོང་ཡོངས་ཀྱི་ལོ་འཚམ་དབང་སྐྱོན་བྱིས་པ་ལ་ཁྱོན་ཡོངས་བཤེར་འབེབས་བྱས་ཤིང་། ཡུལ་གྲོང་ཁག་གི་སློབ་གསོ་དང་ལེན་ཐུབ་པའི་དབང་སྐྱོན་བྱིས་པ་སློབ་གྲྭར་ཞུགས་པར་རྟོག་འདོམས་བྱས་ལ། སློབ་གྲྭ་ལ་ཐོན་མི་ཐུབ་པའི་དབང་སྐྱོན་སློབ་མར་སློབ་ཁྲིད་སྒོ་སྐྱེལ་བྱས་པ་དང་། ཟླ་རེར་སློབ་ཁྲིད་སྐྱེལ་བའི་ཞབས་ཞུའི་ལས་དོན་ཉུང་མཐའ་ཡང་ཐེངས2ལ་སྤེལ་བ་ཡིན། 2024ལོར་རང་རྫོང་དུ་ལོ7-15བར་གྱི་དབང་སྐྱོན་བྱིས་པ་སྡོམ་པའི་མི58དང་། སློབ་གྲྭ་རུ་མི57ཡོད། འཛིན་གྲྭའི་རྗེས་དེད་ནས་འདོན་བཞིན་པ་མི46 སློབ་ཁྲིད་སྒོ་ཁར་སྐྱེལ་བ་མི11སྟེ་དབང་སྐྱོན་བྱིས་པའི་སློབ་ཞུགས་ཚད་ནི98.27%ཡིན།