མདོ་ལའི་ཁྱད་ལྡན་ཞིང་ཕྱུགས་ཐོན་རྫས་སླར་ཡང་ཕྱི་ནང་ཀུན་ལ་བྲིན།

དགུན་ཟུག་དུས་མཚམས་སུ་ཡུལ་ལྗོངས་ལྟ་ན་སྡུག་ལ་ཟས་མཆོག་གི་དགའ་སྟོན་བཤམས། ཟླ11པའི་ཚེས7ནས10ཉིན་བར་ཀྲུང་གུང་མདོ་ལ་རྫོང་ཨུ་དང་མདོ་ལ་རྫོང་མི་དམངས་སྲིད་གཞུང་གིས་གཙོ་གཉེར་བྱས་པའི2024ལོའི་དགུན་དུས་གནས་སྐོར་དང“དགུན་ཤའི་ཟས་མཆོག”དུས་སྟོན་ཨ་མྱེས་སྟོང་སོའི་ནགས་ཀློང་དུ་རྒྱལ་ཁའི་ངང་འཚོགས། ཡུལ་དངོས་ནས་གན་རྒྱ་བཞག་པའི་དངུལ་འབོར་སྒོར་ཁྲི1450ཟིན་ཞིང་། ནོར་ལུག་ཤ་སོགས་ཞིང་ཕྱུགས་ཐོན་རྫས་འཛད་སྤྱོད་བྱེད་ཚད་སྒོར་ཁྲི251ལ་ཟིན་པས་གྲོང་གསེབ་དར་སྤེལ་དང་རོང་འབྲོག་པའི་འབབ་འཕར་ལ་སྒུལ་ཤུགས་ཆེན་པོ་བསྣན་པ་དང་འཛད་སྤྱོད་པར་སེམས་ཀྱི་གཏིང་སར་ཟུག་པའི་དགུན་དུས་ཀྱི་དགའ་སྟོན་ཞིག་བཤམས་པ་ཡིན།

སྲིད་གཞུང་གིས་མཚམས་སྦྱོར་སྟེགས་བུ་བསྐྲུན་ནས་ཁེ་ལས་མཉམ་ལས་དང་གཉིས་ཕན་ཡོང་བ་བྱས།

ད་ལོའི་ཚུན་དུ་མདོ་ལ་རྫོང་ཞིང་ཕྱུགས་ཆུ་བེད་དང་ཚན་རྩལ་ཅུ་ཡིས་ཞིང་ཕྱུགས་ལས་ཀྱི་ཐོན་ལས་འཁོར་འབྲེལ་ཧྲིལ་བོའི་སྤུས་ཚད་དང་ཕན་འབྲས་ཆེ་རུ་གཏོང་རྒྱུར་དམིགས་ནས་ཁེ་ལས་ཀྱི་དགོས་མཁོ་དང་གནད་སྨིན་སྦྲེལ་མཐུད་དང་། སྤེལ་རེས་ཀྱི་ལས་སྟེགས་ཧུར་ཐག་གིས་བསྐྲུན་པ། མཁོ་སྤྲོད་སྦྲེལ་མཐུད་དམ་འཛིན་བྱ་གཞིར་བྱས་ཏེ་ཁེ་ལས་ལ་མངགས་ཐོ་མང་དུ་གཏོང་བ་དང་ཁྲོམ་ར་རྒྱ་ཆེར་གཏོང་རོགས་བྱས་ཏེ་མདོ་ལའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་སྔོན་ལ་སྤུས་ཚད་མཐོ་བའི་འཕེལ་རྒྱས་གཏོང་བར་གསོན་ཤུགས་བར་མ་ཆད་པར་བསྣན།

རྒྱུས་ལོན་བྱུང་བར་གཞིགས་ན། མདོ་ལ་རྫོང་ཞིང་ཕྱུགས་ཆུ་བེད་དང་ཚན་རྩལ་ཅུ་ཡིས་ཐེངས་འདིའི་དགུན་ཤ་དུས་སྟོན་ལས་སྟེགས་སུ་བྱས་ནས་ཁེ་ལས་མང་པོ་དེའི་ནང་ཞུགས་པར་བཀུག་སྟེ་ཁྱད་ལྡན་ཞིང་ཕྱུགས་ཐོན་རྫས་ཕྱིར་ཚོང་བྱ་རྒྱུར་དཀྱེལ་ཡངས་ཀྱི་ལས་སྟེགས་ཤིག་བསྐྲུན་པ་དང་། རྫོང་ནང་ཁུལ་དང་ཞིང་ཆེན་ཕྱི་ནང་གི་ཁེ་ལས16མཉམ་དུ་འཛོམས་ནས་རྣམ་གྲངས8ལ་མིང་རྟགས་བཀོད་ཅིང་། གན་འཇོག་དངུལ་འབོར་སྒོར་ཁྲི1450ཟིན་པ། ནོར་ལུག་ཉོ་ཚོང་བྱེད་ཚད་ཏུན302ཟིན་ནས་མདོ་ལའི་ཁྱད་ལྡན་ཐོན་ལས་སྔར་བས་གཞི་ཁྱོན་ཅན་དང་ཆེད་ལས་ཅན། སྤུས་རྟགས་ཅན་ཕྱོགས་སུ་མགྱོགས་མྱུར་གྱིས་བསྐྱོད་པར་སྐུལ་འདེད་བཏང་།

ཐེངས་འདིའི་བྱེད་སྒོས་མདོ་ལའི་ཁྱད་ལྡན་ཐོན་རྫས་ཕྱིར་ཚོང་ཐབས་ལམ་རྒྱ་ཆེར་བཏང་བ་མ་ཟད། མདོ་ལའི་ཁྱད་ལྡན་ཞིང་ཕྱུགས་ཐོན་རྫས་དེ་བས་ཡངས་པའི་ཁྲོམ་རར་བསྐྱོད་དེ་ཐོན་ལས་སྦྲེལ་ཐག་གི་སྟོད་སྨད་དུ་ཁེ་ལས་ཀྱིས་ཕན་ཚུན་རོགས་འདེགས་དང་སྤུས་རྟགས་གཏོད་པ། མངགས་ཐོ་བརྩོན་ལེན་བྱས་ནས་རོང་འབྲོག་པར་ཡོང་འབབ་སྨར་རྗེན་སྤྲད།

ཞིང་ཕན་འཛད་སྤྱོད་ཟུང་འབྲེལ་གྱིས་མདོ་ལའི་ཁྱད་ཆོས་མངོན་པར་བྱས།

དགུན་ཤའི་དུས་སྟོན་ཐོག་ཤ་ཤེད་རྒྱས་པའི་ནོར་ལུག་གི་ཤ་ནི་བྱེད་པོ་གཙོ་བོ་ཡིན། རླངས་པ་ཐོ་ལོ་ལོ་ཡི་ལུག་ཤ་རྩིབས་མ་དང་དྲི་བསུང་ཕྱོགས་བཞིར་མཆེད་པའི་ལུག་ཤ་སྲེག་མ། དགུན་དུས་གྲང་རེག་ཁྲོད་ལུས་དྲོད་རབ་ཏུ་རྒྱས་པའི་སྐམས་ཤ་རྒྱ་ཁོག་གང་ཡིན་རུང་། རྒྱ་ཆེའི་གནས་སྐོར་བ་དང་འཛད་སྤྱོད་པར་ཁ་བསོད་དང་མིག་བསོད་གྱ་ནོམ་པ་བཤམས། དེ་དང་ཆབས་ཅིག རྫོང་ཁོངས་ཀྱི་ཁེ་ལས་དང་མཉམ་ལས་ཁང10ལྷག་གིས་ས་གནས་ཀྱི་ཁྱད་ལྡན་ཞིང་ཕྱུགས་ཐོན་རྫས་འགྲེམས་སྟོན་བྱས་ཤིང་། དཀར་ཆུའི་ཐོན་རྫས་དང་འཕྲོད་སྦྱོར་སྐྱུར་ཁུ། ཤྭ་བའི་ཐོན་རྫས། སྔོན་བཟོའི་སྔོ་ཚལ་བཅས་ཚང་མར་འཛད་སྤྱོད་པའི་བསྔགས་བརྗོད་ཐོབ།

ཚོང་སྐུལ་གྱི་ཐད་ནས། མདོ་ལ་རྫོང་ཞིང་ཕྱུགས་ཆུ་བེད་ཚན་རྩལ་ཅུ་དང་རྫོང་འཕེལ་རྒྱས་བཅོས་སྒྱུར་དང་བཟོ་ལས་ཆ་འཕྲིན་ཅན་ཅུ་ཡིས་ནོར་སྲིད་ཁ་གསབ་བརྒྱུད་སྒོར་ཁྲི10ཡི་ཉུང་འཕྲི་དངུལ་འཛིན་དང་འཛད་སྤྱོད་འཛིན་ཤོག་སྤྲད་པས། སྐམས་ལུག་ཤའི་རིན་གོང་སྔར་བས་དམངས་ལ་འཚམས་པའི་སྒོ་ནས་འཛད་སྤྱོད་ཀྱི་འདུན་པ་ཆེ་རུ་བསྐྱེད་པ་དང་། འཛད་སྤྱོད་པས་མཐོ་སྒང་གི་ཟས་མཆོག་དེ་ལོངས་སུ་སྤྱོད་ཐུབ་པར་གྱུར་ཡོད། བསྡོམས་རྩིས་བྱས་པར་གཞིགས་ན། བྱེད་སྒོ་སྤེལ་རིང་རྫོང་ཡོངས་ཀྱིས་ལུག1335དང་། ནོར་གནག95 སྐམས་ལུག་ཤ་གསར་བ་ཏུན24 ཞིང་ཕྱུགས་ཐོན་རྫས་སྒོར་ཁྲི75བཅས་བཙོངས་པར་ཁྱོན་སྒོར་ཁྲི251ཟིན།

ཉེ་བའི་ལོ་ཤས་རིང་། མདོ་ལ་རྫོང་གིས་ལྗང་མདོག་འཕེལ་རྒྱས་ལ་ཤུགས་སྣོན་དང་། སྤུས་ཚད་ལ་བརྟེན་ནས་ཞིང་ལས་དར་སྤེལ་གཏོང་བ། སྤུས་རྟགས་ལ་བརྟེན་ནས་ཞིང་ལས་སྟོབས་ལྡན་དུ་གཏོང་བ་བཅས་ཀྱི་འཕེལ་རྒྱས་འདུ་ཤེས་ལ་ཤུགས་སྣོན་བརྒྱབ་སྟེ། བསྟུད་མར་ལོ་དགུར་སྐྱེ་ལྡན་ཐོན་རྫས་ཀྱི་ར་སྤྲོད་འཕར་མ་ཐོབ་པ་དང་། ཞིང་ཕྱུགས་ཐོན་ལས་འཕེལ་རྒྱས་སུ་འགྲོ་བར་རྨང་གཞི་ལེགས་པོ་མཁོ་འདོན་བྱས་ཡོད། དེ་དང་ཆབས་ཅིག མདོ་ལ་རྫོང་གིས་མུའུ་ཁྲི142.52ཡི་སྐྱེ་ལྡན་རྩྭ་ར་དང་ནོར་ལུག་ཁས་ལེན་ཁྱོན་ཡོངས་ནས་བྱེད་འགོ་བཙུགས་ཤིང་། མདོ་ལ་རིང་མོའི་ས་ཁོངས་ཡོངས་སུ་ལྗང་མདོག་སྐྱེ་ལྡན་ར་སྤྲོད་མངོན་འགྱུར་ཐུབ་པའི་བརྩོན་ལེན་བྱས།

གནས་སྐོར་དང་འཛད་སྤྱོད་མཉམ་འགུལ་གྱིས་ཁྲོམ་རའི་གསོན་ཤུགས་འཕེལ་བར་བྱས།

མདོ་ལ་རྫོང་ཨུའི་ཧྲུའུ་ཅི་ཀང་ཧྥུའུ་ཡིས། “མདོ་ལ་རྫོང་གིས་ཞིང་ཆེན་དང་ཁུལ་གྱི་བཀོད་སྒྲིག་བླང་བྱ་ལག་བསྟར་དོན་འཁྱོལ་གཏིང་ཟབ་བྱས་ཏེ་སྲིད་གཞུང་གིས་གཙོ་ཁྲིད་དང་། སྤྱི་ཚོགས་མཉམ་ཞུགས། ཁྲོམ་རའི་འཁོར་རྒྱུག་བྱེད་སྟངས་བཅས་བརྒྱུད་དགུན་དུས་ཀྱི་གནས་སྐོར་ཁྱད་ལྡན་ཐོན་རྫས་སྤྱི་འདོམས་འཆར་འགོད་བྱས་ཤིང་། རྒྱ་ཆེའི་གནས་སྐོར་བར་སྔར་བས་ཕུན་སུམ་ཚོགས་པའི་དགུན་དུས་ཀྱི་ལོངས་སྤྱོད་མཁོ་འདོན་བྱས། ས་གནས་རང་གི་ཁྱད་ལྡན་ཞིང་ཕྱུགས་ཐོན་རྫས་ཕྱིར་ཚོང་ལ་སྔར་བས་ཡངས་པའི་གཞི་རྟེན་ལས་སྟེགས་བསྐྲུན་ནས། རྫོང་ཡོངས་ཀྱི་རོང་འབྲོག་མང་ཚོགས་འབབ་འཕར་ཕྱུག་འགྱུར་གྱི་ཐབས་ལམ་གསར་བ་བཏོད་ཡོད”ཅེས་ནན་གྱིས་བསྟན།

དགུན་ཤའི་དུས་ཆེན་དང་དགུན་དུས་གནས་སྐོར་ཟུང་འབྲེལ་དམ་ཟབ་སྒོས་གནས་སྐོར་བར་གནས་སྐོར་གྱི་ལོངས་སྤྱོད་ཕུན་སུམ་ཚོགས་པ་མཁོ་འདོན་བྱས། བྱེད་སྒོ་སྤེལ་རིང་གནས་སྐོར་བས་མདོ་ལ་རྫོང་ཡོངས་ཀྱི་མཛེས་ལྗོངས་ཁུལ་དང་མཛེས་ལྗོངས་ཁུལ་ཁག་ཏུ་སྒོ་འཛིན་མི་དགོས་པར་ལྟ་སྐོར་བྱེད་ཆོག་པ་དང་། རྫོང་ཁོངས་ཀྱི་སྐར་མ་རིམ་པའི་གསོལ་མགྲོན་ཁང་ཚང་མར་ཞག་སྡོད་བྱེད་སྐབས་བཅུ་ཆའི་ལྔའི་ཕབ་གཅོག་གཟིགས་སྐྱོང་སྲིད་ཇུས་ཀྱི་རྨང་གཞིའི་ཐོག་སླར་ཡང་བཅུ་ཆའི་ལྔ་ཕབ་གཅོག་གི་གཟིགས་སྐྱོང་ལོངས་སུ་སྤྱད་ཆོག 2024ལོའི་ཟླ11པའི་ཚེས1ཉིན་ནས2025ལོའི་ཟླ3པའི་ཚེས31ཉིན་བར། རྫོང་ཁོངས་ཀྱི་མཛེས་ལྗོངས་ཁུལ་དང་མཛེས་ལྗོངས་གནས་ཁག་གིས་ད་དུང“ལྷ་ཁམས་མདོ་ལའི་མཛེས་ལྗོངས་ཁུལ་གྱི་སྒོ་འཛིན་ཉིན་གསུམ་ཤར་བགྲོད”དང་། “མཚོ་བྱང་གི་གནས་སྐོར་མཛེས་ལྗོངས་ཁུལ་ཆེན་པོ་བརྒྱད་ཀྱི་སྒོ་འཛིན་གཅིག་འཐུས་སྒོས་མཚོ་བྱང་ཤར་བགྲོད”བྱེད་པ། བཙུན་མོ་དམར་ཡག་མའི་ལྗོངས་ཁུལ། ཨ་མྱེས་སྟོང་སོའི་ལྗོངས་ཁུལ། ལྷ་ཁམས་མདོ་ལའི་ཆུའི་འཇིག་རྟེན་གྱི་སྒོ་འཛིན་རིན་གོང་ཕྱེད་ཀ་དང་བློན་པོ་བྱ་རྒོད་ལྗོངས་ཁུལ་གྱི་གནས་སྐོར་བའི་རང་སྐོར་ལྗོངས་རྒྱུ། “སྲིད་དངུལ་གཞོགས་འདེགས། གནམ་གྲུའི་པ་སེ་ཕབ་གཅོག”སོགས་གཟིགས་བཟོས་བྱེད་ཐབས་སྣ་ཚོགས་སྤྱད་དེ་གནས་སྐོར་བ་མང་པོ་བཀུགས་པ་དང་། དགུན་ཤའི་དུས་ཆེན་གྱི་འཛད་སྤྱོད་ལ་སྐུལ་འདེད་བྱས་པར་མ་ཟད། མདོ་ལའི་གནས་སྐོར་བྱ་གཞག་གི་འཕེལ་རྒྱས་ལའང་སྐུལ་འདེད་བཏང་།

དགུན་ཤའི་དུས་ཆེན་ནི་ཁྱད་ལྡན་སྤུས་རྟགས་བྱེད་སྒོ་ཞིག་ཡིན་པའི་ཆ་ནས། གནས་སྐོར་བ་མང་པོ་ཞིག་གི་ཡིད་དབང་བཀུག་ནས་མདོ་ལ་རྫོང་གི་སྐད་གྲགས་ཆོད་ཚད་དང་སྙན་གྲགས་ཆེ་རུ་ཕྱིན་པ་དང་། ས་གནས་དེ་གའི་གནས་སྐོར་ལས་རིགས་དང་འབྲེལ་ཡོད་ཐོན་ལས་གཞན་དག་རྒྱུན་མཐུད་ངང་འཕེལ་རྒྱས་སུ་འགྲོ་བར་རྨང་གཞི་བརྟན་པོ་བཏིང་ནས། གྲོང་གསེབ་དར་སྤེལ་གྱི་བགྲོད་ལམ་ཐོག་མདོ་ལ་རྫོང་གིས་སྔར་བས་བརྟན་བརླིང་གི་གོམ་སྟབས་སྤོས་ཡོད།