ཏེན་ཞུའེ་ཞང་རྒྱལ་སྤྱིའི་ཐཱན་མེད་གླིང་ཕྲན་གྱི་མཉམ་ལས་གྲོས་འགོའི་སྒྲོག་སྤེལ་ཚོགས་འདུར་ཞུགས་པར་མ་ཟད་ཤིས་ཚིག་ཕུལ།
ཟླ11པའི་ཚེས13ཉིན། ཞི་ཅིན་ཕིང་གི་དམིགས་བསལ་སྐུ་ཚབ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏེན་ཞུའེ་ཞང་ཨ་སེད་པེད་ཅང་གི་རྒྱལ་ས་པ་ཁོ་རུ་ཀྲུང་གོས་གཙོ་སྒྲུབ་མཛད་པའི་རྒྱལ་སྤྱིའི་ཐཱན་མེད་གླིང་ཕྲན་གྱི་མཉམ་ལས་གྲོས་འགོའི་སྒྲོག་སྤེལ་ཚོགས་འདུར་ཞུགས་པར་མ་ཟད་ཤིས་ཚིག་ཕུལ།
ཏེན་ཞུའེ་ཞང་གིས་ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་འཇལ་བར་ཚད་མཐོན་པོས་མཐོང་ཆེན་བྱེད་ཀྱིན་ཡོད་ལ། གླིང་ཕྲན་ཆུང་བའི་རྒྱལ་ཁབ་ཀྱི་གནམ་གཤིས་འགྱུར་ལྡོག་གནད་དོན་ཐད་ཀྱི་དམིགས་བསལ་གནས་བབ་དང་སེམས་ཁུར་ལ་རྒྱུས་ལོན་གང་ལེགས་བྱེད་ཀྱིན་ཡོད། ཀྲུའུ་ཞི་ཞི་ཅིན་ཕིང་གིས་བསྟན་དོན། ཀྲུང་གོའི་ཕྱོགས་ཀྱིས་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་མཉམ་ལས་སྒྲོམ་གཞིའི་འོག གླིང་ཕྲན་ཆུང་བའི་རྒྱལ་ཁབ་ཀྱིས་གནམ་གཤིས་འགྱུར་ལྡོག་ལ་ཁ་གཏད་འཇལ་བར་རང་ནུས་ཅི་ལྕོགས་ཀྱིས་རྒྱབ་སྐྱོར་བྱ་རྒྱུ་ཡིན། ཉེ་བའི་ལོ་འགའི་རིང་། ཀྲུང་གོས་གླིང་ཕྲན་ཆུང་བའི་རྒྱལ་ཁབ་དང་མཉམ་དུ་ཐཱན་དམའི་དཔེ་སྟོན་ཁུལ་མཉམ་སྐྲུན་བྱས་པ་དང་། ལས་གཞི་འོས་འཚམ་གསར་སྤེལ་དང་ལག་བསྟར་བྱས་ཏེ། ཀྲུང་གོ་དང་ཞི་བདེ་རྒྱ་མཚོའི་གླིང་ཕྲན་རྒྱལ་ཁབ་ཀྱི་གནམ་གཤིས་འགྱུར་ལྡོག་མཉམ་ལས་ལྟེ་གནས་བསྐྲུན་ཞིང་། གླིང་ཕྲན་ཆུང་བའི་རྒྱལ་ཁབ་ཀྱི་གནམ་གཤིས་འགྱུར་ལྡོག་ལ་ཁ་གཏད་འཇལ་བ་དང་དམངས་ཚིས་བདེ་སྐྱིད་ལེགས་སྒྱུར་བྱེད་པར་རོགས་ཤུགས་བཏོན་ཡོད་ཅེས་གསུངས།
ཏེན་ཞུའེ་ཞང་གིས་གླིང་ཕྲན་གྱི་འཚོ་གནས་ཉམས་ཉེན་ཐག་གཅོད་པ་ནི་མིའི་རིགས་ཀྱི་ཐུན་མོང་འགན་འཁྲི་རེད། ང་ཚོས་ལག་རྡང་སྦྲེལ་ནས་གླིང་ཕྲན་གྱི་གནམ་གཤིས་འགྱུར་ལྡོག་ལ་འཚམ་པའི་ནུས་པ་མཐོར་འདེགས་གཏོང་བ་དང་། གླིང་ཕྲན་གྱི་རྨང་གཞིའི་སྒྲིག་ཆས་འཛུགས་སྐྲུན་ལ་ཤུགས་བསྣན་ནས། གནོད་འགོག་གནོད་སེལ་ཁྱབ་ཁོངས་ཀྱི་ཚན་རིག་གི་ཞིབ་འཇུག་དང་ལག་རྩལ་གསར་གཏོད་ལ་ཤུགས་སྣོན་དགོས། གླིང་ཕྲན་གྱི་ལྗང་མདོག་ཐཱན་དམའི་ཚུལ་སྒྱུར་འཕེལ་རྒྱས་ལ་སྐུལ་འདེད་གཏོང་བ་དང་། ཡུལ་བབ་དང་བསྟུན་ནས་དག་གཙང་ནུས་ཁུངས་ཀྱི་མ་ལག་འཛུགས་པ། ལྗང་མདོག་ཐོན་ལས་འཕེལ་རྒྱས་གཏོང་བ། མཚོ་ཐོག་གླིང་ཕྲན་གྱི་ཐོན་ཁུངས་ལ་སྲུང་སྐྱོབ་བཅས་བྱས་ཏེ། རྒྱ་མཚོའི་སྐྱེ་ཁམས་ལ་སྲུང་སྐྱོང་བྱེད་དགོས། གླིང་ཕྲན་གྱི་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་རྒྱལ་སྤྱིའི་མཉམ་ལས་ལ་ཤུགས་སྣོན་པ་དང་། རྒྱལ་སྤྱིའི་ཐཱན་མེད་གླིང་ཕྲན་གྱི་མཉམ་ལས་རྩ་འཛུགས་འཛུགས་པར་གྲོས་སྡུར་བྱེད་པ། ཐོན་ཁུངས་མཉམ་སྤྱོད་དང་ལག་རྩལ་བརྗེ་རེས། ཉམས་མྱོང་ཕན་ཚུན་དཔེ་ལྟོས་བྱེད་པ་བཅས་ལ་སྐུལ་འདེད་བཏང་སྟེ། གླིང་ཕྲན་ཆུང་བའི་རྒྱལ་ཁབ་ཀྱིས་གནམ་གཤིས་འགྱུར་ལྡོག་གི་འགྲན་སློང་ལ་ཁ་གཏད་ལེགས་པོ་འཇལ་བར་རོགས་རམ་བྱེད་དགོས། ཀྲུང་གོའི་ཕྱོགས་ཀྱིས་ཕྱོགས་སོ་སོ་དང་མཉམ་དུ་མཉམ་ལས་དམ་ཟབ་བྱེད་པ་དང་། ཐཱན་མེད་གླིང་ཕྲན་གྱི་དམིགས་འབེན་སྔ་ས་ནས་མངོན་འགྱུར་བྱེད་པར་མཉམ་དུ་སྐུལ་འདེད་བཏང་སྟེ། ལྗང་མདོག་གླིང་ཕྲན་དང་མཛེས་པའི་གླིང་ཕྲན། བདེ་འཇགས་གླིང་ཕྲན། བདེ་སྐྱིད་ལྡན་པའི་གླིང་ཕྲན་བཅས་འཛུགས་སྐྲུན་བྱེད་དགོས་ཞེས་བསྟན།
སྒྲོག་སྤེལ་ཚོགས་འདུ་དེ་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་ཚོགས་ཆེན་ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་འགྲེམ་སྟོན་ཁུལ་ཁོངས་ནས་སྤེལ། མར་ཏི་ཝེ་ཡི་ཙུང་ཐུང་མུའུ་དབྱི་ཙི་དང་། སོ་ཐོ་མེ་དང་ཕུ་རིན་སི་ཕེ་ཡི་ཙུང་ལི་ཐི་ལའོ་ཝ་ཏཱ། ཀེ་རེན་ན་ཏའི་ཙུང་ལི་མུས་ཆིས་འར། མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས་ཀྱི་དྲུང་ཡིག་ཁྲུའུ་ཡི་ལག་བསྟར་དྲུང་ཡིག་སི་ཏིས་འར་བཅས་ཚོགས་འདུར་ཞུགས་པར་མ་ཟད་ཤིས་ཚིག་ཕུལ།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注