གཡང་ལུང་ཡུལ་ཚོ།

གཡང་ལུང་ཡུལ་ཚོ།

གཡང་ལུང་ཡུལ་ཚོ་ནི་མདོ་ལ་རྫོང་གི་ནུབ་བྱང་རྒྱུད་དུ་གནས་པ་དང་། རྫོང་མི་དམངས་སྲིད་གཞུང་གནས་ཡུལ་གྱི་སྟོང་སྨི177གྱི་སར་གནས་ཡོད། ནུབ་ཕྱོགས་སུ་མདོ་ལ་རིང་མོ་དང་ཀན་སུའུ་ཞིང་ཆེན་སུའུ་ནན་ཡུས་ཀུའུ་རིགས་རང་སྐྱོང་རྫོང་དང་འབྲེལ་ཡོད་ལ། ལྷོ་ངོས་སུ་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཐེམ་ཆེན་རྫོང་དང་འབྲེལ་བ་དང་། བྱང་ཤར་དུ་འབྲོང་ལུང་ཡུལ་ཚོ་དང་འབྲེལ་ཡོད། “གཡང་ལུང”ནི་བོད་སྐད་ཡིན་ལ། ཡངས་ཤིང་ཆེ་བའི་ལུང་ཤུར་གྱི་དོན་ཡིན། 1955ལོའི་ཟླ6པར་མཚོ་སྔོན་ཞིང་ཆེན་ཕྱུགས་ལས་ཐིང་གིས་གནས་འདིར་ཐོ་ལེ་ཕྱུགས་ར་བཙུགས། 1970ལོར་མཚོ་བྱང་བོད་རིགས་རང་སྐྱོང་ཁུལ་ཐོ་ལེ་ཕྱུགས་རར་བསྒྱུར། 2002ལོའི་ཟླ12པའི་ཚེས17ཉིན། མཚོ་སྔོན་ཞིང་ཆེན་མི་དམངས་སྲིད་གཞུང་གི་མཚོ་སྔོན་སྲིད་ཡིག(2002)ཨང103པའི་མཆན་བཀོད་བཀའ་ལན་ལས་ཐོ་ལེ་ཕྱུགས་ར་དོར་ནས་ཡུལ་ཚོ་འཛུགས་རྒྱུར་མོས་མཐུན་ཐོབ་པ་ལྟར་གཡང་ལུང་ཡུལ་ཚོ་ཞེས་པའི་མིང་འདི་བཏགས། 2017ལོར་སྤྱིའི་མི་གྲངས2902ཡོད་པའི་ནང་བོད་རིགས་དང་། ཧུའེ་རིགས། རྒྱ་རིགས། སོག་རིགས། ཧོར་རིགས། ས་ལར། ཏུང་ཞང་། ཡུས་ཀུའུ་སོགས་མི་རིགས8ཡོད། སྤྱིའི་རྒྱ་ཁྱོན་ལ་སྟོང་སྨི་གྲུ་བཞི་མ2551.17ཡོད་པའི་ནང་རྩྭ་སའི་རྒྱ་ཁྱོན་ལ་སྤྱི་ཆིངས188595.04ཡོད། ཡུལ་ཚོ་མི་དམངས་སྲིད་གཞུང་ཀུང་ཀྲོང་དུ་བཅའ་སྡོད་བྱས་ཡོད་ལ། མཚོ་འཕགས་ལ་སྨི3364ཡོད། མངའ་ཁོངས་སུ་གཡང་ལུང་སྡེ་ཁུལ་སྡོད་དམངས་ཨུ་ཡོན་ལྷན་ཁང་དང་ཐོ་ལེ། ཞལ་དཀར། ཆུ་ཁོལ། ཨ་དཀར་བཅས་འབྲོག་དམངས་ཨུ་ཡོན་ལྷན་ཁང་བཞི་ཡོད། རང་བྱུང་སྡེ་བ4ཡོད་པ་དང་འབྲོག་པའི་ཚོ་ཆུང13བཙུགས་ཡོད། ཁྱམས་རིང་ལྷོ་རི་དང་ཐོ་ལེ་རི་བོའི་བར་གྱི་ནུབ་ཕྱོགས་ཀྱི་ལུང་གཞུང་དུ་གནས་ཡོད། མཐོ་སྒང་ཐན་སྐམ་མིན་པའི་ས་ཁུལ་ཆེ་མོར་གཏོགས་པ་དང་། མཚོ་སྔོན་ཞིང་ཆེན་གྱི་གནམ་གཤིས་ཁུལ་ལ་གཞིགས་ནས་དབྱེ་ན། མཐོ་སྒང་དྲོད་གྲང་ཐན་སྐམ་ཕྱེད་མའི་གནམ་གཤིས་ཁུལ་ཡིན། མཐོ་སྒང་གྲང་ངར་ཆེ་བའི་སར་གནས་ཡོད་པ་དང་། ནུབ་བྱང་རླུང་འཁོར་རྒྱུག་དང་རི་མཐོའི་ཤུགས་རྐྱེན་གྱིས་རླུང་མང་ཞིང་ཆེ་བ་དང་། གྲང་ངར་ཆེ་ལ་ཐན་པའང་ཆེ། གྲང་ངར་ཆེ་བའི་དུས་ཚིགས་རིང་ལ། དྲོ་བའི་དུས་ཚིགས་ཐུང་བས་བད་གཏན་ནས་མེད་པའི་དུས་སྐབས་མེད། ཡུལ་ཚོའི་མངའ་ཁོངས་ཀྱི་མདོ་ལ་རིང་མོའི་ལྷོ་འདབས་ནི་མདོ་ལ་རིང་མོའི་རྒྱལ་ཁབ་སྤྱི་གླིང་དུ་དབྱེ་ཡོད། ལོ་རེའི་ཆ་སྙོམས་ཀྱི་དྲོད་ཚད-3.2℃ཡིན་པ་དང་། ལོ་རེའི་ཆར་ཆུ་འབབ་ཚད་ལ་ཧའོ་སྨི270~310ཡིན། རྩྭ་སའི་རིགས་ནི་མཐོ་འཁྱགས་རྩྭ་ཐང་དང་མཐོ་འཁྱགས་སྤང་ཐང་། རི་ཁུལ་སྤང་ཐང་། སྡོང་ཚོམ་སྤང་ཐང་། ན་འདམ་སྤང་ཐང་བཅས་ལས་གྲུབ་ཡོད་ལ། ཕྱུགས་རྩྭ་སྐྱེས་ཡུན་ཉིན135ཡས་མས་ཡིན། དཔལ་འབྱོར་གྱི་ཡོང་ཁུངས་ནི་ཕྱུགས་ལས་གཙོ་བོ་ཡིན་ལ། བོད་ལུག་དང་། ནོར་གནག རྟ་སོགས་འཚོ་སྐྱོང་བྱེད། ཕྱུགས་རིགས་སྣ་ཚོགས་ཁྱོན་སྡོམ103842ཡོད་པའི་ནང་ནས་ལུག67297དང་། ནོར་གནག35970དང་། རྟ575བཅས་ཡོད། འབྲོག་པའི་ཆ་སྙོམས་ཀྱི་ཡོང་འབབ་སྒོར13500ཟིན་ཡོད། ལོ་རེའི་ཟླ6པར་འབྲོག་པ་རྣམས་དབྱར་སྟོན་སར་ཕྱུགས་འཚོ་རུ་འགྲོ་བ་དང་། ཟླ10བར་དགུན་དཔྱིད་སར་ལོག་ནས་གཏན་སྡོད་ཕྱུགས་འཚོ་བཞིན་ཡོད།

ཡུལ་ཚོ་ཡོངས་སུ་མི་རིགས་བཅའ་སྡོད་སློབ་ཆུང1ཡོད་ཅིང་། དེར་དགེ་རྒན་དང་ལས་བཟོ་བ21དང་སློབ་མ90ལྷག་ཡོད། འཕྲོད་བསྟེན་ཁང་དང་མི་གྲངས་དང་འཆར་ལྡན་བུ་སྐྱེའི་ཞབས་ཞུའི་ས་ཚིགས། སྤྱི་བདེ་མངགས་གཏོང་ཁང་། ཕྱུགས་སྨན་ས་ཚིགས་སོགས་ཀྱི་ལས་ཁུངས་ཡོད། ཞིང་ལམ301ལམ་ཐིག་བརྒྱུད་ཡོད་ལ། འགྲུལ་སྐྱེལ་རེས་འཁོར་ཤར་གཏོང་བྱས་ཡོད།