ཝང་ཧུའུ་ཉིང་གིས་ཧ་སག་སི་ཐན་གྱི་དབྱི་ཧུའེ་གྲོས་ཚོགས་གོང་མའི་གྲོས་དཔོན་ཨ་ཞི་མུའུ་པ་ཡེ་ཧྥུའུ་ལ་ཐུག་འཕྲད་གནང་བ།

ཟླ1པོའི་ཚེས13ཉིན།　རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་པེ་ཅིན་དུ་ཧ་སག་སི་ཐན་གྱི་དབྱི་ཧུའེ་གྲོས་ཚོགས་གོང་མའི་གྲོས་དཔོན་ཨ་ཞི་མུའུ་པ་ཡེ་ཧྥུའུ་ལ་ཐུག་འཕྲད་གནང་བ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ1པོའི་ཚེས13ཉིན་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་པེ་ཅིན་དུ་ཧ་སག་སི་ཐན་གྱི་དབྱི་ཧུའེ་གྲོས་ཚོགས་གོང་མའི་གྲོས་དཔོན་ཨ་ཞི་མུའུ་པ་ཡེ་ཧྥུའུ་ལ་ཐུག་འཕྲད་གནང་།　

ཝང་ཧུའུ་ཉིང་གིས་བསྟན་དོན།　ཀྲུང་གོ་དང་ཧ་སག་སི་ཐན་གྱིས་ཐོག་མཐའ་བར་གསུམ་དུ་ཕན་ཚུན་བརྩི་འཇོག་དང་།　ཁྱིམ་མཚེས་མཛའ་མཐུན།　དཀའ་སྡུག་མཉམ་ཁུར།　གཉིས་ཕན་མཉམ་ཁེ་བཅས་ཀྱི་རྩ་དོན་རྒྱུན་འཁྱོངས་བྱས་ཏེ།　ཀྲུའུ་ཞི་ཞི་ཅིན་ཕིང་དང་ཙུང་ཐུང་ཐུའོ་ཁ་ཡེ་ཧྥུའུ་ཡི་འཐབ་ཇུས་སྣེ་ཁྲིད་འོག　ཀྲུང་གོ་དང་ཧ་སག་སི་ཐན་གྱི་འབྲེལ་བ་འཕེལ་རྒྱས“མྱུར་བགྲོད་གཞུང་ལམ”ནང་བསྐྱོད་ནས།　ཁྱབ་ཁོངས་ཁག་གི་མཉམ་ལས་སོ་སོ་འཕེལ་རྒྱས་གང་ལེགས་བྱུང་ཡོད།　ཀྲུང་གོ་ཕྱོགས་ཀྱིས་ཧ་སག་སི་ཐན་ཕྱོགས་དང་མཉམ་དུ་རྒྱལ་ཁབ་གཉིས་ཀྱི་གཙོ་བདག་གི་ཐུན་མོང་ངོས་འཛིན་སྣེ་ཁྲིད་དུ་བྱས་ནས།　ཀྲུང་གོ་དང་ཧ་སག་སི་ཐན་གྱི་འབྲེལ་བ་ལོ་གསར་པའི་ནང་སྐས་རིམ་གསར་པ་ཞིག་ཏུ་བསླེབས་པར་སྐུལ་འདེད་གཏོང་འདོད་ཡོད།　ཀྲུང་གོའི་རྒྱལ་ཡོངས་སྲིད་གྲོས་ཀྱིས་ཧ་སག་སི་ཐན་ཕྱོགས་ཀྱི་འབྲེལ་ཡོད་སྒྲིག་གཞི་དང་སྤེལ་རེས་དང་འགྲོ་འོང་ལ་ཤུགས་སྣོན་བརྒྱབ་ནས།　རང་སོ་སོའི་རྒྱལ་ཁབ་འཛུགས་སྐྲུན་དང་ཕྱོགས་གཉིས་ཀྱི་འབྲེལ་བ་འཕེལ་རྒྱས་གཏོང་བར་ཞབས་འདེགས་ཞུ་འདོད་ཡོད།

ཨ་ཞི་མུའུ་པ་ཡེ་ཧྥུའུ་ཡིས་བསྟན་དོན།　ཧ་སག་སི་ཐན་ཕྱོགས་ཀྱིས་མིའི་རིགས་ཀྱི་ལས་དབང་ཐུན་མོང་ཚོགས་པ་འཛུགས་པའི་འདུ་ཤེས་ལ་ཚད་མཐོའི་ངོས་ལེན་བྱེད་ཀྱིན་ཡོད་པ་དང་།　ཧ་སག་སི་ཐན་གྲོས་ཚོགས་གོང་མའི་གྲོས་ཁང་གིས་ཀྲུང་གོའི་རྒྱལ་ཡོངས་སྲིད་གྲོས་དང་སྤེལ་རེས་མཉམ་ལས་ལ་ཤུགས་སྣོན་བརྒྱབ་སྟེ།　གོ་ལ་ཧྲིལ་པོའི་འཕེལ་རྒྱས་གྲོས་གཞི་དང་།　གོ་ལ་ཧྲིལ་པོའི་བདེ་འཇགས་གྲོས་གཞི།　གོ་ལ་ཧྲིལ་པོའི་དཔལ་ཡོན་གྲོས་གཞི་བཅས་དོན་འཁྱོལ་བྱ་རྒྱུར་ཐུན་མོང་ཐོག་སྐུལ་འདེད་བཏང་སྟེ།　རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་ལ་སྐུལ་འདེད་གཏོང་བར་དགེ་མཚན་ལྡན་པའི་བྱས་རྗེས་འཇོག་འདོད་ཡོད།

ཧྲི་ཐའེ་ཧྥུང་དང་ཝང་ཏུང་ཧྥུང་སོགས་ཐུག་འཕྲད་ལ་ཞུགས་ཡོད།　།