ཞི་ཅིན་ཕིང་གིས་ཧན་གོའི་འགྲུལ་སྐྱེལ་གནམ་གྲུར་ཆག་སྒོ་བྱུང་བར་ཧན་གོའི་ཙུང་ཐུང་ཚབ་མ་ཚུའེ་ཞང་མུའུ་ལ་འཚམས་འདྲིའི་གློག་འཕྲིན་བཏང་།

ཟླ12པའི་ཚེས29ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧན་གོའི་ཅི་ཀྲིག་མཁའ་འགྲུལ་གནམ་གྲུར་ཆག་སྒོ་བྱུང་ནས་མི་སྣར་ཤི་རྨས་ཚབས་ཆེན་བྱུང་བའི་ཐད་ཧན་གོའི་ཙུང་ཐུང་ཚབ་མ་ཚུའེ་ཞང་མུའུ་ལ་འཚམས་འདྲིའི་གློག་འཕྲིན་བཏང་།

ཞི་ཅིན་ཕིང་གིས་བསྟན་དོན། ཁྱེད་ཚོའི་རྒྱལ་ཁབ་ཀྱི་ཅི་ཀྲིག་མཁའ་འགྲུལ་འགྲུལ་སྐྱེལ་གནམ་གྲུ་ཞིག་ལ་ཆག་སྒོ་བྱུང་ནས་མི་སྣར་ཤི་རྨས་ཚབས་ཆེན་བཟོས་པ་གློ་བུར་དུ་ཤེས་བྱུང་བས། ངས་ཀྲུང་གོ་སྲིད་གཞུང་དང་ཀྲུང་གོ་མི་དམངས་ཀྱི་ཚབ་བྱས་ནས་རྐྱེན་ལམ་དུ་ཤོར་བའི་མི་སྣར་མྱ་ངན་ཟབ་མོ་ཞུས་པ་དང་།    འདས་པོའི་ཁྱིམ་མི་རྣམས་ལ་ལྷག་བསམ་ཟོལ་མེད་ཀྱིས་འཚམས་འདྲི་ཞུས་པ་ཡིན་ལ། རྨས་ཕོག་པའི་མི་སྣ་སྔ་མོ་ནས་བདེ་ཐང་ཡོང་བའི་སྨོན་འདུན་ཞུ།