ཞིང་ཆེན་ཚོང་དོན་ཐིན་གྱིས་ཕྱི་ཕྱོགས་ཚོང་དོན་འཕེལ་རྒྱས་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་རོགས་རམ་བྱས།
སྲིད་གཞུང་དང་ཁེ་ལས་བར་འབྲེལ་ཟམ་འཛུགས་པ་དང་། ས་གནས་ཀྱི་ཚོང་དོན་གཙོ་གཉེར་སྡེ་ཁག་དང་གཙོ་གནད་ཁེ་ལས་ཀྱིས་བསམ་འཆར་དང་ཐབས་ཇུས་འདོན་རྒྱུར་སྐུལ་མ་གཏོང་བ། ཉམས་མྱོང་དང་བྱེད་སྟངས་བཟང་པོ་དཔྱད་གཞིར་འཛིན་པ་བཅས་ཀྱི་ཆེད་དུ། ཟླ12པའི་ཚེས23ཉིན། ཞིང་ཆེན་ཚོང་དོན་ཐིན་གྱིས་རྩ་འཛུགས་བྱས་ནས་ཚོང་དོན་གྱི་གཟའ་འཁོར་གཉིས་ཀྱི་སྒོར་ཅོག་ཚོགས་འདུ་ཐེངས་གཉིས་པ་བསྡུས། གཙོ་གནད་གྲོང་ཁྱེར་དང་ཁུལ་གྱི་ཚོང་དོན་གཙོ་གཉེར་སྡེ་ཁག་དང་ཟི་ལིང་གྲོང་ཁྱེར་དཔལ་འབྱོར་ལག་རྩལ་གསར་སྤེལ་ཁུལ་དང་དེའི་ཁོངས་གཏོགས་གླིང་ཁུལ། ན་གོར་མོའི་ཁུ་ནུ་དཔལ་འབྱོར་ལག་རྩལ་གསར་སྤེལ་ཁུལ། ཟི་ལིང་ཕྱོགས་བསྡུས་འགན་སྲུང་ཁུལ་སོགས་སྡེ་ཁག་གི་ལས་སྒོའི་འགན་འཁུར་བ་དང་ཞིང་ཆེན་ནང་ཁུལ་གྱི་ཕྱི་ཕྱོགས་ཚོང་དོན་ཁེ་ལས་གཙོ་བོའི་འཐུས་མི་ཚོགས་འདུར་ཞུགས།
ཚོགས་ཐོག་ནས་ཁེ་ལས་ཀྱིས་བཏོན་པའི་རེ་འདུན་ལ་དོན་ཚན་རེ་རེ་བཞིན་ལན་བཏབ་པར་མ་ཟད། ཁ་གསབ་འཐུས་ཚང་དུ་བཏང་རྗེས་ཀྱི་ཕྱི་ཕྱོགས་ཚོང་དོན་ཁྱབ་ཁོངས་ཀྱི་རྒྱབ་སྐྱོར་སྲིད་ཇུས་ཇེ་ལེགས་སུ་གཏོང་བའི་ཁ་ཕྱོགས་དང་དོན་དག་ལ་གསལ་འགྲེལ་གཏིང་ཟབ་བྱས། ཞིང་ཆེན་ཚོང་དོན་ཐིན་གྱིས་རྒྱལ་སྤྱིའི་ཚོང་གཉེར་དྲ་ཚིགས་དང་ཕྱི་རྒྱལ་གྱི་མཛོད་ཁང་འཛུགས་སྐྲུན། ཐོན་ལས་ཕྱི་ཕྱོགས་ཅན་གྱི་འཕེལ་རྒྱས། ནང་འདྲེན་དང་ཐོན་ལས་དང་འཛད་སྤྱོད་ཟུང་འབྲེལ་བྱེད་པ། ཕྱི་ནང་ཚོང་དོན་གཞི་གཅིག་ཅན་གྱི་འཕེལ་རྒྱས་སོགས་ཐད་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་བཏང་ནས། ཁེ་ལས་ཀྱི་དཀའ་ངལ་ཏན་ཏིག་སྒོས་སེལ་ཏེ། ཕྱི་ཕྱོགས་ཚོང་དོན་བརྟན་བརླིང་ངང་འཕེལ་རྒྱས་འགྲོ་བའི་ཁོར་ཡུག་བཟང་པོ་བསྐྲུན་རྒྱུ་རེད།
ཚོགས་ཐོག་ནས་ཞིང་ཆེན་ཡོངས་ཀྱི་རིམ་པ་སོ་སོའི་ཚོང་དོན་གཙོ་གཉེར་སྡེ་ཁག་དང་གཙོ་གནད་གླིང་ཁུལ་གྱིས་སྔར་ལས་དངོས་གཉེར་གྱི་སྤྱོད་ཚུལ་དང་སྔར་ལས་ནུས་ལྡན་གྱི་བྱེད་ཐབས་སྤྱད་དེ། གཙོ་གནད་ས་ཁུལ་གྱི་དཔེ་སྟོན་སྐུལ་ཁྲིད་ནུས་པ་དང་གཙོ་གནད་གླིང་ཁུལ་གྱི་རྨང་གཞིའི་ནུས་པ། ཁྲོམ་ར་གཙོ་བོའི་གཙོ་ཤུགས་དམག་གི་ནུས་པ། ཕྱི་ཕྱོགས་རྣམ་པའི་ལས་སྟེགས་ཞབས་ཞུའི་ནུས་པ། དཔལ་འབྱོར་ཚོང་དོན་བྱེད་སྒོའི་སྣེ་ཁྲིད་ནུས་པ། སྒོ་འབྱེད་བགྲོད་ལམ་སྟེང་གི་འདེགས་སྐྱོར་ནུས་པ་བཅས་འདོན་སྤེལ་ཡག་པོ་བྱས་ཏེ། སྤྱི་པའི་ཞབས་ཞུའི་ནུས་པའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་དགོས། མུ་མཐུད་དུ་ཁེ་ལས་ལ་ཞབས་ཞུའི་འགན་སྲུང་ལེགས་པོ་བྱས་ཏེ། ཁོངས་གཏོགས་ཁུལ་གྱི་གཙོ་གནད་ཁེ་ལས་ཀྱི་མཉམ་འབྲེལ་རོགས་སྐྱོར་ལས་དོན་ཡག་པོ་སྤེལ་རྒྱུ་དང་། རང་འགུལ་ངང་སྒོ་རྩར་ཞབས་ཞུ་སྐྱེལ་བ། སྲིད་ཇུས་གསར་པ་དྲིལ་སྒྲོག་དང་གསལ་འགྲེལ་བྱེད་ཤུགས་ཆེ་རུ་གཏོང་བ་བཅས་བྱས་ཏེ། ཁེ་ལས་ཀྱི་དཀའ་གནད་དང་གནད་དོན་དུས་ཐོག་ཏུ་ཐག་གཅོད་བྱེད་པར་སྐུལ་འདེད་གཏོང་བ་དང་། ཁེ་ལས་ཀྱི་དཀའ་ངལ་ཏན་ཏིག་ངང་སེལ་ནས། ཁེ་ལས་འཕེལ་རྒྱས་ཀྱི་ཡིད་ཆེས་ཆེ་རུ་གཏོང་རྒྱུ་དང་། རང་ཞིང་གི་ཕྱི་ཕྱོགས་ཚོང་དོན་འཕེལ་རྒྱས་ལས་དོན་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་དགོས་པའི་བླང་བྱ་བཏོན།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注