ལིས་ཆང་གིས་འཇར་པན་གྱི་ཕྱི་འབྲེལ་བློན་ཆེན་ཡན་ཝུའུ་དབྱི་ལ་མཇལ་འཕྲད་གནང་།

ཟླ12ཚེས25ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་པེ་ཅིང་མི་དམངས་ཚོགས་ཁང་ཆེན་མོ་རུ་ཀྲུང་གོར་འཚམས་འདྲིར་ཡོང་བའི་འཇར་པན་གྱི་ཕྱི་འབྲེལ་བློན་ཆེན་ཡན་ཝུའུ་དབྱི་ལ་མཇལ་འཕྲད་གནང་།

ཟླ12ཚེས25ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་གིས་མི་དམངས་ཚོགས་ཁང་ཆེ་མོ་རུ་ཀྲུང་གོར་འཚམས་འདྲིར་ཡོང་བའི་འཇར་པན་གྱི་ཕྱི་འབྲེལ་བློན་ཆེན་ཡན་ཝུའུ་དབྱི་ལ་མཇལ་འཕྲད་གནང་།

ལིས་ཆང་གིས་མིག་སྔར་ཀྲུང་གོ་དང་འཇར་པན་བར་གྱི་འབྲེལ་བ་ལེགས་བཅོས་དང་འཕེལ་རྒྱས་གཏོང་བའི་འགག་རྩའི་དུས་སྐབས་སུ་གནས་ཡོད།  ཟླ་སྔོན་མར་ཀྲུའུ་ཞི་ཞི་ཅིན་ཕིང་ཕེ་རུ་ནས་དབུ་བཞུགས་བློན་ཆེན་ཧྲི་ཕེ་མའོ་དང་མཇལ་འཛོམས་བྱུང་བ་དང་། ཕྱོགས་གཉིས་ཀྱིས་ཀྲུང་གོ་དང་འཇར་པན་རྒྱལ་ཁབ་གཉིས་བར་གྱི་འཐབ་ཇུས་གཉིས་ཕན་འབྲེལ་བར་ཕྱོགས་ཡོངས་ནས་སྐུལ་འདེད་གཏོང་བར་མཉམ་གཅིག་ཏུ་འཐད་པ་བྱུང་ཞིང་།  དུས་རབས་གསར་པའི་བླང་བྱ་དང་འཚམ་པའི་དགེ་མཚན་ལྡན་པའི་ཀྲུང་གོ་དང་འཇར་པན་བར་གྱི་འབྲེལ་བ་འཛུགས་པར་གཞོལ་རྒྱུར་འཐད་པ་བྱུང་ཡོད། ཀྲུང་གོས་འཇར་པན་ཕྱོགས་དང་མཉམ་དུ་ཡང་དག་པའི་ཁ་ཕྱོགས་དེ་སྟངས་འཛིན་ཡག་པོ་བྱེད་པ་དང་། རྒྱལ་ཁབ་གཉིས་ཀྱི་མགོ་ཁྲིད་པའི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ཡག་པོ་བྱེད་པ། ཕྱོགས་གཉིས་བར་གྱི་འབྲེལ་བ་རྒྱུན་མཐུད་དང་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ཏེ། དངོས་གཉེར་མཉམ་ལས་ལ་གྲུབ་འབྲས་གསར་པ་སྔར་ལས་མང་པོ་ལེན་འདོད་ཡོད་ཅེས་བསྟན།

ལིས་ཆང་གིས་ཀྲུང་གོ་དང་འཇར་པན་རྒྱལ་ཁབ་གཉིས་ནི་མཛའ་བརྩེ་མཚོ་ལྟར་ཟབ་པའི་ཁྱིམ་མཚེས་རྒྱལ་ཁབ་ཡིན།  “ཕན་ཚུན་མཉམ་ལས་གྲོགས་པོ་ཡིན་པ་དང་ཕན་ཚུན་ལ་འཇིགས་སྐུལ་མི་བྱེད་པ”ནི་རྒྱལ་ཁབ་གཉིས་ཀྱིས་མཉམ་དུ་བཞག་པའི་དམ་བཅའ་བརྟན་པོ་ཡིན། འཇར་པན་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་མདུན་སྐྱོད་དང་། ཀྲུང་གོ་དང་འཇར་པན་གྱི་ཆབ་སྲིད་ཡིག་ཆ་བཞིའི་ནང་གཏན་ལ་ཕབ་པའི་རྩ་དོན་བརྩི་སྲུང་།  ལོ་རྒྱུས་ལ་མཐོང་ཆེན་དང་མ་འོངས་པར་ཁ་ཕྱོགས་ཏེ། དགེ་མཚན་ལྡན་པའི་སྒོ་ནས་འགལ་བ་ལ་དོ་དམ་ཚོད་འཛིན་འོས་འཚམ་དང་། ཀྲུང་གོ་དང་འཇར་པན་བར་གྱི་འབྲེལ་བའི་ཁྱོན་ཡོངས་སྲུང་སྐྱོང་བྱེད་དགོས། མིག་སྔར་གོ་ལ་ཧྲིལ་པོའི་འཕེལ་རྒྱས་ཀྱི་བརྟན་བརླིང་མིན་པ་དང་ངེས་གཏན་མིན་པའི་རང་བཞིན་ཇེ་ཆེར་འགྲོ་བཞིན་ཡོད་པས། ཕྱོགས་གཉིས་ཀྱིས་དཔལ་འབྱོར་ཉོ་ཚོང་འབྲེལ་བ་རྒྱ་སྐྱེད་དང་གཉིས་ཕན་མཉམ་ལས་ཟབ་སྤེལ་བྱས་ཏེ། རྒྱལ་ཁབ་གཉིས་ཀྱི་ཁེ་ལས་དང་རྒྱལ་ཁབ་གཉིས་ཀྱི་མི་དམངས་ལ་ཕན་འདོགས་དགོས། རྒྱལ་ཁབ་གཉིས་ཀྱི་འབྲེལ་བའི་རྨང་གཞི་ནི་མི་དམངས་ཕན་ཚུན་མཛའ་མཐུན་མཉམ་གནས་བྱེད་རྒྱུ་དེ་ཡིན་པས། ཕྱོགས་གཉིས་ཀས་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་བརྗེ་རེས་བྱེད་ཤུགས་སྔར་ལས་ཆེ་རུ་བཏང་ནས་མཛའ་མཐུན་གྱི་རྨང་གཞི་སྲ་བརྟན་དུ་གཏོང་བའི་རེ་བ་བཅངས་ཡོད་ཅེས་བསྟན།

ཡན་ཝུའུ་དབྱི་ཡིས་འཇར་པན་དང་ཀྲུང་གོ་རྒྱལ་ཁབ་གཉིས་ལ་ལོ་ངོ2000ལྷག་གི་མཛའ་མཐུན་འགྲོ་འོང་གི་ལོ་རྒྱུས་ལྡན་པ་དང་།  མིག་སྔར་ས་ཁུལ་དང་རྒྱལ་སྤྱིའི་ལས་དོན་གྱི་འགན་འཁྲི་གལ་ཆེན་འཁུར་ཡོད། འཇར་པན་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་འབད་བརྩོན་བྱས་ཏེ། རྒྱལ་ཁབ་གཉིས་ཀྱི་མགོ་ཁྲིད་པས་གཏན་ལ་ཕབ་པའི་ཁ་ཕྱོགས་བརྒྱུད་དེ་རིམ་པ་སོ་སོའི་བར་གྱི་འགྲོ་འོང་དང་ལྷག་པར་དུ་དམངས་ཁྲོད་ཀྱི་བརྗེ་རེས་ལ་ཤུགས་བསྣན་ནས། གཉིས་ཕན་མཉམ་ལས་དང་དམངས་འདོད་ཀྱི་ཁོར་ཡུག་ཇེ་ལེགས་སུ་འགྲོ་བར་སྐུལ་འདེད་གཏོང་བ་དང་། འཐབ་ཇུས་གཉིས་ཕན་འབྲེལ་བར་ཕྱོགས་ཡོངས་ནས་སྐུལ་འདེད་བཏང་སྟེ། དགེ་མཚན་ལྡན་ཞིང་བརྟན་བརླིང་ཡིན་པའི་འཇར་པན་དང་ཀྲུང་གོའི་བར་གྱི་འབྲེལ་བ་འཛུགས་འདོད་ཡོད་ཅེས་བསྟན།