ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་རྒྱུན་ལས་གྲོས་ཚོགས་བསྡུས།

ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གིས་རྒྱུན་ལས་གྲོས་ཚོགས་བསྡུས།

ཟླ་བཅུ་གཉིས་པའི་ཚེས་བཅོ་བརྒྱད་ཉིན། ཞིང་ཆེན་དམངས་འཐུས་ཚོགས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གིས་ཏང་ཙུའུ་གྲོས་ཚོགས་ཐེངས་སོ་ལྔ་པ་བསྡུས་ཏེ། ཀྲུང་དབྱང་དཔལ་འབྱོར་ལས་དོན་གྲོས་ཚོགས་ཀྱི་དགོངས་དོན་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིན་གྱི་གསུང་བཤད་གལ་ཆེན་གྱི་དགོངས་དོན། ཀྲུང་དབྱང་ཆབ་སྲིད་ཅུས་ཀྱི་གྲོས་ཚོགས་ཀྱི་དགོངས་དོན་བཅས་བརྒྱུད་བསྒྲགས་དང་སློབ་སྦྱོང་བྱས་པ་དང་། ཞིང་ཆེན་ཏང་ཨུའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཀྱི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས།  ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཏང་ཙུའུ་ཧྲུའུ་ཅི། ཀྲུའུ་རིན་གཞོན་པ་ཝང་ལིས་མེན་གྱིས་མགོ་འཛིན་བྱས། དབྱང་ཧྥིན་ཁྲུན་དང་། ཉི་མ་སྒྲོལ་མ། ཀྲང་ཧོང་ཡོན། ལོས་ཀང་། ཁྲིན་ཏུང་ཁྲང་བཅས་ཚོགས་འདུར་ཞུགས།

ཚོགས་འདུ་ལས་བསྟན་དོན། ཀྲུང་དབྱང་གི་དཔལ་འབྱོར་བྱ་བའི་གྲོས་ཚོགས་སྟེང2024ལོའི་དཔལ་འབྱོར་ལས་དོན་ལ་ཁྱོན་ཡོངས་ནས་ཕྱོགས་སྡོམ་དང་། མིག་སྔའི་དཔལ་འབྱོར་གྱི་གནས་བབ་ལ་དབྱེ་ཞིབ་གཏིང་ཟབ་བྱས་པ་དང་། 2025ལོའི་དཔལ་འབྱོར་ལས་དོན་གོ་རིམ་ལྡན་པའི་ངང་བཀོད་སྒྲིག་བཅས་བྱས་ཡོད། “རྒྱུད་གཅིག་ལམ་གཅིག”མཉམ་སྐྲུན་དང་། མཐའ་མཚམས་བཅོས་སྒྲིག མཁོ་ཚོང་མཉམ་ལས་བྱ་གཞག་སོགས་ལ་སྐུལ་འདེད་གཏོང་རྒྱུའི་སྐོར་གྱི་བླང་བྱར་དམིགས་ནས་དྲང་སྲུང་གསར་གཏོད་མཐའ་འཁྱོངས་ཀྱིས་ཏང་གི་གསར་གཏོད་རིགས་པའི་གཞུང་ལུགས་སློབ་སྦྱོང་དང་ཞིབ་འཇུག་དྲིལ་བསྒྲགས་བཅས་ལ་སྐུལ་འདེད་གཏོང་བའི་ལས་འགན་དང་བླང་བྱ་ཁ་གསལ་བཏོན་ཡོད། དམངས་ཆེན་ལས་དོན་དང་ཟུང་འབྲེལ་བྱས་ཏེ་སློབ་སྦྱོང་ལག་བསྟར་དམ་ཟབ་བྱེད་དགོས།

ཚོགས་འདུ་ལས་ནན་གྱིས་བསྟན་དོན། 2025ལོའི་ལས་དོན་ཁག་ལ་ཇུས་འགོད་ནན་ཏན་བྱེད་དགོས་པ་དང་། དམངས་ཆེན་གྱི་ངོས་ཐད་ནས་ཏང་ཀྲུང་དབྱང་དང་ཞིང་ཆེན་ཏང་ཨུ་ཡིས་ཐབས་ཇུས་བཀོད་སྒྲིག་ཁག་ལག་བསྟར་དོན་འཁྱོལ་ཡག་པོ་བྱེད་དགོས། དུས་རབས་གསར་པའི་དམངས་ཆེན་ཀྱི་ལས་དོན་དངོས་ལ་དམིགས་ཏེ། མི་དམངས་འཐུས་མི་ཚོགས་ཆེན་གྱི་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ་དང་། དུས་བབ་གསར་པའི་འོག་གི་ས་གནས་དམངས་ཆེན་ཀྱི་ལས་དོན་སྔར་ལས་ཡག་པོ་སྒྲུབ་པའི་བསམ་ཕྱོགས་དང་བྱེད་ཐབས་ཞིབ་འཇུག་དང་གྲོས་བསྡུར་བྱེད་དགོས། ཞིང་ཆེན་གྱི་སྐབས་བཅུ་བཞི་པའི་དམངས་འཐུས་ཚོགས་ཆེན་ཀྱི་ཚོགས་འདུ་ཐེངས་གསུམ་པའི་གྲ་སྒྲིག་དང་། རྒྱལ་ཡོངས་མི་དམངས་འཐུས་མི་ཚོགས་ཚོགས་ཆེན་ལ་ཞུགས་པའི་བྱ་བ་དང་ལོ་མཇུག་གི་ཕྱོགས་སྡོམ་དམིགས་ཚད་དཔྱད་ཞིབ། ཉེན་ཁ་སྣ་ཚོགས་ཀྱི་མངོན་མེད་རྐྱེན་ངན་གྲལ་བཤེར་སོགས་མིག་སྔའི་གཙོ་གནད་ལས་དོན་ཡག་པོར་བསྒྲུབས་ཏེ། ལོ་ཧྲིལ་པོའི་ལས་དོན་ཕུན་སུམ་ཚོགས་པོའི་ངང་མཇུག་བསྒྲིལ་དགོས།

ཚོགས་འདུ་ལས་ཞིང་ཆེན་དམངས་ཆེན་གྱི་ཏང་ཙུའུ་ཡི་ལས་དོན་སྙན་ཞུ་དང་། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུའི་གནས་ཚུལ་དང་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི2024ལོའི་ཏང་འཛུགས་སྐྱོང་ལས་དོན་གནས་ཚུལ་སྐོར་གྱི་སྙན་ཞུར་ཉན།