ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ནན་ཅིང་དུ2024ལོའི་ནན་ཅིང་དམར་གསོད་ཆེན་མོའི་འདས་པོར་རྒྱལ་ཁབ་ཀྱི་སྤྱི་སྒྲུབ་འདས་མཆོད་བསྒྲུབས་ཤིང་ལི་ཧྲུའུ་ལེ་འདས་མཆོད་ལ་ཞུགས་པ་མ་ཟད་གསུང་བཤད་གནང་བ།
ཚེས13ཉིན་གྱི་སྔ་དྲོར། ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ནན་ཅིང་དུ2024ལོའི་ནན་ཅིང་དམར་གསོད་ཆེན་མོའི་འདས་པོར་རྒྱལ་ཁབ་ཀྱི་སྤྱི་སྒྲུབ་འདས་མཆོད་གཟབ་རྒྱས་ངང་བསྒྲུབས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་ནམ་ཀྲུང་དབྱང་དྲིལ་སྒྲོག་པུའུ་ཡི་པུའུ་ཀྲང་ལི་ཧྲུའུ་ལེ་བྱེད་སྒོར་ཞུགས་ནས་གཏམ་བཤད།
སྤྱི་སྒྲུབ་འདས་མཆོད་དེ་འཇར་པན་བཙན་འཛུལ་དམག་གིས་སྤེལ་བའི་ནན་ཅིང་དམར་གསོད་ཆེན་མོའི་ཚེ་འདས་སྤུན་ཟླའི་རྗེས་དྲན་ཁང་གི་འདུ་ཚོགས་ཐང་ཆེན་དུ་སྤེལ་བ་དང་། ཡུལ་དངོས་ཀྱི་རྣམ་པར་གཟི་ཉམས་ལྡན་ཞིང་། རྒྱལ་དར་ཕྱེད་ཙམ་མར་ཕབ་ཡོད། ལས་རིགས་སོ་སོའི་འཐུས་མི་སྟོང་བརྒྱད་ཙམ་གྱིས་བྲང་ཁར་མེ་ཏོག་དཀར་པོ་བཏགས་ཤིང་ཁུ་སུམ་མེར་ཀྲོང་ངེར་ལངས་ཡོད། ཆུ་ཚོད་བཅུའི་སྟེང་། སྤྱི་སྒྲུབ་འདས་མཆོད་སྒྲུབ་མགོ་བརྩམས་ཤིང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས། རྒྱལ་གླུ་བླངས་ཚར་རྗེས། དེར་འདུས་ཡོངས་ཀྱིས་ནན་ཅིང་དམར་གསོད་ཆེན་མོའི་འདས་པོ་རྣམས་ལ་མྱ་ངན་ཞུས་པ་དང་། ནན་ཅིང་གྲོང་ཁྱེར་ནས་མཁའ་ཟོན་ཉེན་བརྡ་བསྒྲགས་ལ། རླངས་འཁོར་འགྲོ་མཚམས་བཞག་ནས་དུང་བརྡ་བརྒྱབ་ཅིང་། ཕར་འགྲོ་ཚུར་འོང་གི་མི་རྣམས་ཀྱིས་རང་གནས་སུ་མྱ་ངན་ཞུས། མྱ་ངན་ཞུས་ཚར་རྗེས། བཅིངས་འགྲོལ་དམག་རམ་དཀྲོལ་རུ་ཁག་གིས་རྒྱལ་ཁབ་ཀྱི་སྤྱི་སྒྲུབ་འདས་མཆོད་ཀྱི་རོལ་དབྱངས་རམ་དཀྲོལ་བྱས་པའི་གདངས་དབྱངས་ཁྲོད་དུ། བཅིངས་འགྲོལ་དམག་གཟབ་སྦྲེང་ཟིའི་གུས་ལུགས་རུ་ཆེན་གྱི་གུས་ཞབས་དམག་མི16གིས་མེ་ཏོག་ཕྲེང་བ་བརྒྱད་ཡར་བཀྱགས་ནས། སྤྱི་སྒྲུབ་འདས་མཆོད་ཀྱི་སྟེགས་བུའི་སྟེང་ཕུལ།
དེའི་རྗེས་ལི་ཧྲུའུ་ལེ་ཡིས་གསུང་བཤད་གནང་། ཁོང་གིས་བསྟན་དོན། དེ་རིང་ང་ཚོ་གཟབ་རྒྱས་ངང་གནས་གཅིག་ཏུ་འཛོམས་ཏེ། ནན་ཅིང་དམར་གསོད་ཆེན་མོའི་འདས་པོར་རྗེས་དྲན་ཟབ་མོ་དང་། འཇར་པན་བཙན་འཛུལ་མཁན་གྱིས་དམར་གསོད་བྱས་པའི་སྤུན་ཟླ་ཡོངས་ལ་རྗེས་དྲན། ཀྲུང་གོ་མི་དམངས་ཀྱི་འཇར་འགོག་དམག་འཁྲུག་ལ་རྒྱལ་ཁ་ལེན་ཆེད་རང་སྲོག་བློས་བཏང་པའི་གསར་བརྗེ་སྔོན་གཤེགས་པ་དང་མི་རིགས་ཀྱི་དཔའ་བོ་རྣམ་པར་རྗེས་དྲན། ཀྲུང་གོ་མི་དམངས་དང་དཔུང་བ་མཉམ་གཤིབ་ཀྱིས་འཇར་པན་བཙན་འཛུལ་མཁན་འགོག་རྒོལ་བྱས་པའི་རྒྱལ་ཁབ་སོ་སོའི་སྔོན་བཤེགས་དཔའ་བོར་རྗེས་དྲན་ཞུས་ཏེ། ཀྲུང་གོ་མི་དམངས་བློ་བརྟན་འགྱུར་མེད་སྒོས་ཞི་བདེ་འཕེལ་རྒྱས་ཀྱི་བགྲོད་ལམ་སྟེང་བསྐྱོད་འདོད་པའི་བླ་མེད་ཀྱི་རེ་མདུན་མཚོན་དགོས།
ལི་ཧྲུའུ་ལེ་ཡིས་བསྟན་དོན། ང་ཚོས་རྒྱལ་ཁབ་ཀྱི་སྤྱི་སྒྲུབ་འདས་མཆོད་སྒྲུབ་པ་ནི། ལོ་རྒྱུས་ཡིད་ལ་དམ་པོར་འཛིན་པ་དང་། འདས་སོང་བརྗེད་མི་ཉན་པ་གསལ་སྟོན་བྱེད་པ་ཞིག་དང་། ཞི་བདེར་གཅེས་འཛིན་དང་མ་འོངས་པ་གསར་གཏོད་བྱེད་པའི་ལངས་ཕྱོགས་བརྟན་པོ་མཚོན་པ། དུས་རབས་གསར་པའི་ཀྲུང་གོ་གུང་ཁྲན་ཏང་དང་ཀྲུང་གོ་མི་དམངས་ཀྱིས་སྔོན་བཤེགས་དཔའ་བོའི་རེ་མདུན་རྒྱུན་འཛིན་བྱེད་པ་མངོན་པར་བྱས་ནས། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་ལེའུ་གསར་པ་རྩོམ་པའི་ཆོད་སེམས་བརྟན་པོ་མཚོན་པ་ཞིག་ཡིན། ང་ཚོས་མཐུན་སྒྲིལ་འབད་འཐབ་དང་མཁྲེགས་གཏོར་དཀའ་སེལ་གྱི་སྟོབས་ཤུགས་གཅིག་ཏུ་བསྡུས་ཏེ། རང་རྟོན་རང་ཚུགས་དང་བཅོས་སྒྱུར་གསར་གཏོད་ཀྱི་སྙིང་སྟོབས་དར་སྤེལ་གཏོང་བ་དང་། ཞི་བདེ་སྲུང་སྐྱོང་དང་དྲང་བདེན་སྲུང་སྐྱོབ་བྱེད་པའི་ཕུགས་འདུན་ཇེ་བརྟན་དུ་གཏོང་དགོས། ལོ་རྒྱུས་ཡིད་ལ་དམ་པོར་འཛིན་པ་ནི་སྔར་ལས་ལྷག་པར་མདུན་སྐྱོད་བྱེད་ཆེད་ཡིན་པས། ང་ཚོས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་སྔར་ལས་དམ་ཟབ་བྱས་ཏེ། དམངས་སེམས་གཅིག་མཐུན་དང་འབད་འབུངས་ཡར་བརྩོན་བྱས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་རྣམ་པས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་ཆེད་འབད་བརྩོན་ལྷོད་མེད་བྱས་ནས། མིའི་རིགས་ཞི་བདེ་འཕེལ་རྒྱས་ཀྱི་བླ་མེད་ལས་དོན་ཆེད་དུ་སྔར་ལས་མང་བའི་བྱས་རྗེས་འཇོག་དགོས།
ལི་ཧྲུའུ་ལེ་ཡིས་གསུང་བཤད་གནང་རྗེས། ནན་ཅིང་གྲོང་ཁྱེར་གྱི་ན་གཞོན་འཐུས་མི་གྱ་བདུན་གྱིས་ཞི་བདེ་བསྒྲགས་གཏམ་སྒྲོག་འདོན་བྱས་ཤིང་། སྤྱི་ཚོགས་ལས་རིགས་སྡེ་ཁག་གི་འཐུས་མི་དྲུག་གིས་ཞི་བདེའི་ཅོང་ཆེན་རྡུང་། ཡིད་སེམས་གཡོ་བར་བྱེད་པའི་ཅོང་སྒྲ་ཐེངས་གསུམ་གྲགས་པ་དང་བསྟུན་ནས། ཞི་བདེའི་ཕུག་རོན་སུམ་སྟོང་ལྷག་གིས་གཤོག་ཟུང་བརྐྱངས་ནས་མཁའ་རུ་འཕུར་ཞིང་། དེས་འདས་པོ་རྣམས་ལ་རྗེས་སུ་དྲན་ཞིང་འཛམ་གླིང་ཞི་བདེ་ལ་རེ་སྒུག་ཚད་མེད་བྱེད་པ་མཚོན་ཡོད།
རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཀྲིན་ཅན་པང་གིས་སྤྱི་སྒྲུབ་འདས་མཆོད་ལ་མགོ་འཛིན་གནང་ཞིང་། རྒྱལ་སྲིད་ཨུ་ཡོན་ཧྲིན་དབྱི་ཆིན་དང་། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཧྲིན་ཡུའེ་ཡུའེ། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཨུ་ཡོན། དམག་དོན་ཨུ་ཡོན་ལྷན་ཁང་སྒྲིག་ཁྲིམས་ཞིབ་བཤེར་ལྟ་ཞིབ་ཨུ་ཡོན་ལྷན་ཁང་གི་ཧྲུའུ་ཅི་ཀྲང་ཧྲིན་མེན་བཅས་བྱེད་སྒོར་ཞུགས།
འཇར་འགོག་དམག་འཁྲུག་ལ་ཞུགས་མྱོང་བའི་འཐབ་མོ་པ་རྒན་པ་དང་བློ་མཐུན་རྒན་པའི་འཐུས་མི། ཀྲུང་དབྱང་ཏང་སྲིད་དམག་དམངས་འབྲེལ་ཡོད་སྡེ་ཁག་དང་ཤར་ཕྱོགས་དམག་ཁུལ། ཅང་སུའུ་ཞིང་ཆེན། ནན་ཅིང་གྲོང་ཁྱེར་བཅས་ཀྱི་འགན་ཁུར་བློ་མཐུན། དམངས་གཙོ་ཏང་ཁག་སོ་སོའི་ཀྲུང་དབྱང་དང་རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་ཁུར་པ་དང་ཏང་ཁག་གང་ལའང་མི་གཏོགས་པའི་མི་སྣའི་འཐུས་མི། ཞང་ཀང་དང་ཨོ་མིན། ཐེ་ཝན་བཅས་གྱི་སྤུན་ཟླའི་འཐུས་མི། ཀྲུང་གོ་མི་དམངས་འཇར་འགོག་དམག་འཁྲུག་ལ་རྒྱལ་ཁ་ལེན་ཆེད་བྱས་རྗེས་བཞག་པའི་རྒྱལ་སྤྱིའི་གྲོགས་པོ་དང་འདས་པོའི་ཁྱིམ་མིའི་འཐུས་མི། ནན་ཅིང་དམར་གསོད་ཆེན་མོའི་ཁྲོད་སྲོག་ཉེན་ལས་ཐར་མཁན་དང་འདས་པོའི་ཁྱིམ་མིའི་འཐུས་མི། རྒྱལ་ཁབ་ཕྱི་ནང་གི་འབྲེལ་ཡོད་བརྗོད་དོན་རྗེས་དྲན་ཁང་དང་དངོས་མང་བཤམས་སྟོན་ཁང་གི་འཐུས་མི། རྒྱལ་ནང་གི་འབྲེལ་ཡོད་སློབ་གྲྭ་ཆེན་མོ་དང་རིག་མཛོད་ཆེད་མཁས་པའི་འཐུས་མི། ཀྲུང་གོ་དང་འཇར་པན། ཧན་གོ་བཅས་ཀྱི་ཆོས་ལུགས་སྡེ་ཁག་གི་འཐུས་མི། ནན་ཅིང་བཅའ་སྡོད་དམག་དཔུང་གི་དཔོན་དམག་གི་འཐུས་མི། ཅང་སུའུ་ཞིང་ཆེན་གྱི་ལས་རིགས་སོ་སོའི་མང་ཚོགས་ཀྱི་འཐུས་མི་སོགས་སྤྱི་སྒྲུབ་འདས་མཆོད་ལ་ཞུགས།
2024ལོའི་ཟླ2པའི་ཚེས27ཉིན། རྒྱལ་ཡོངས་དམངས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བདུན་པའི་ཐག་གཅོད་ལས་གྲོས་འཆམ་བྱུང་བ་ལྟར། ཁྲིམས་འཛུགས་ཀྱི་རྣམ་པས་ཟླ12པའི་ཚེས13ཉིན་དེ་ནན་ཅིན་དམར་གསོད་ཆེན་མོའི་འདས་པོར་རྒྱལ་ཁབ་ཀྱི་སྤྱི་སྒྲུབ་འདས་མཆོད་སྒྲུབ་པའི་ཉིན་མོ་རུ་གཏན་འབེབས་བྱས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注