ཞི་ཅིན་ཕིང་གིས་ཨ་རི་དང་ཀྲུང་གོའི་ཚོང་དོན་རྒྱལ་ཡོངས་ཨུ་ཡོན་ལྷན་ཁང་གི2024ལོའི་རྟེན་འབྲེལ་མཛད་སྒོའི་དགོང་ཚོགས་ལ་རྟེན་འབྲེལ་ཞུ་བའི་འཕྲིན་ཡིག་སྤྲིངས།

ཟླ12པའི་ཚེས11ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨ་རི་དང་ཀྲུང་གོའི་ཚོང་དོན་རྒྱལ་ཡོངས་ཨུ་ཡོན་ལྷན་ཁང་གི2024ལོའི་རྟེན་འབྲེལ་མཛད་སྒོའི་དགོང་ཚོགས་ལ་རྟེན་འབྲེལ་ཞུ་བའི་འཕྲིན་ཡིག་སྤྲིངས་ནས། ཨུ་ཡོན་ལྷན་ཁང་དང་ཁོངས་མི་ཡོངས་ལ་རྟེན་འབྲེལ་ཞུས་པར་མ་ཟད། དུས་ཡུན་རིང་པོར་ཀྲུང་གོ་དང་ཨ་རིའི་དཔལ་འབྱོར་ཚོང་དོན་མཉམ་ལས་ལ་ཐུགས་ཁུར་དང་རྒྱབ་སྐྱོར་གནང་མཁན་གྱི་ཨ་རིའི་ལས་རིགས་སོ་སོའི་མི་སྣར་ལྷག་བསམ་རྣམ་དག་གིས་འཚམས་འདྲི་མཛད།

ཞི་ཅིན་ཕིང་གིས་བསྟན་དོན། ཀྲུང་གོ་དང་ཨ་རིའི་འབྲེལ་བ་ནི་འཛམ་གླིང་གི་ཕྱོགས་གཉིས་ཀྱི་འབྲེལ་བ་ཆེས་གཙོ་བོའི་གྲས་ཡིན་པས། རྒྱལ་ཁབ་གཉིས་ཀྱི་མི་དམངས་ཀྱི་རང་ངོས་ཁེ་ཕན་དང་འབྲེལ་བ་ཡོད་པར་མ་ཟད་མིའི་རིགས་ཀྱི་མདུན་སྐྱོད་ལས་དབང་དང་འབྲེལ་བ་ཡོད། ཀྲུང་གོ་དང་ཨ་རི་གཉིས་མཐུན་ན་ཕན་ཚུན་ལ་ཕན་པ་དང་། འཐབ་རེས་བྱས་ན་གཉིས་ཀར་གནོད་པ་ཆེ་བར་བརྟེན། ཕན་ཚུན་གླེང་མོལ་བྱས་པ་ལས་ཁ་གཏད་དུ་ལངས་མི་རུང་ཞིང་། གཉིས་ཕན་མཉམ་ལས་བྱེད་པ་ལས་འཐབ་རྩོད་བྱེད་མི་རུང་། ཀྲུང་གོའི་ཕྱོགས་ཀྱིས་ཨ་རིའི་ཕྱོགས་དང་འབྲེལ་འདྲིས་རྒྱུན་འཛིན་བྱས་ནས་མཉམ་ལས་སྤེལ་བ་དང་། ཕྱོགས་འགལ་དོ་དམ་ཚོད་འཛིན་བྱས་ནས། དུས་སྐབས་གསར་བར་རྒྱལ་ཁབ་གཉིས་ཀྱི་ཡང་དག་པའི་འབྲེལ་འདྲིས་བྱེད་སྟངས་མུ་མཐུད་དུ་འཚོལ་ཞིབ་བྱས་ཏེ། ཀྲུང་གོ་དང་ཨ་རི་རྒྱལ་ཁབ་གཉིས་ཀྱིས་གོ་ལ་འདིའི་སྟེང་དུས་ཡུན་རིང་པོར་ཞི་བདེ་མཉམ་གནས་བྱས་ནས། རྒྱལ་ཁབ་གཉིས་ཕྱུག་པོར་བསྒྱུར་བ་དང་འཛམ་གླིང་ལ་ཕན་ཐོགས་འདོད་ཡོད་ཅེས་གསུངས།

ཞི་ཅིན་ཕིང་གིས་ནན་གྱིས་བསྟན་དོན། ཀྲུང་གོ་དང་ཨ་རིའི་དཔལ་འབྱོར་ཚོང་དོན་འབྲེལ་བ་ནི་རྒྱལ་ཁབ་གཉིས་ཀྱི་འབྲེལ་བའི་གྲུབ་ཆ་གལ་ཆེན་ཞིག་ཡིན། རྒྱལ་ཁབ་གཉིས་ཀྱི་ཁེ་ཕན་མཉམ་འདྲེས་ཟབ་མོ་བྱས་པས་མཉམ་ལས་བར་སྟོང་རྒྱ་ཆེན་པོ་ཡོད། ཕྱོགས་གཉིས་ཀྱིས་འདྲ་མཉམ་གྲོས་མོལ་བརྒྱུད་དེ་འགལ་བ་ཐག་གཅོད་ཡག་པོ་བྱེད་པ་དང་། ཕན་ཚུན་གསབ་རེས་ཀྱི་དགེ་མཚན་འདོན་སྤེལ་བྱས་ནས་མཉམ་ལས་བྱ་བ་ལེགས་པོར་བསྒྲུབ་སྟེ། སོ་སོའི་གྲུབ་འབྲས་དེ་ཕན་ཚུན་གྱི་གོ་སྐབས་སུ་འགྱུར་བ་ལས་འགྲན་སློང་དུ་འགྱུར་མི་རུང་བ་དང་། ཕྱོགས་གཉིས་ཀྱི་འཕེལ་རྒྱས་དེ་ཕན་ཚུན་ཀྱི་རོགས་ཤུགས་སུ་འགྱུར་བ་ལས་འགོག་ཤུགས་སུ་འགྱུར་མི་རུང་ཞེས་གསུངས།

ཞི་ཅིན་ཕིང་གིས་བསྟན་དོན། སྒོ་འབྱེད་ནི་མིའི་རིགས་ཀྱི་དཔལ་ཡོན་འཕེལ་རྒྱས་ཀྱི་སྒུལ་ཤུགས་གཙོ་བོ་ཡིན་ལ། རྒྱལ་ཁབ་སོ་སོ་དར་རྒྱས་གོང་འཕེལ་འགྲོ་བར་བརྒྱུད་དགོས་ངེས་ཀྱི་བགྲོད་ལམ་ཡིན། བཅོས་སྒྱུར་སྒོ་འབྱེད་ནི་ཀྲུང་གོ་དང་འཛམ་གླིང་ཐུན་མོང་འཕེལ་རྒྱས་ཡར་ཐོན་ཡོང་བའི་ལོ་རྒྱུས་ཀྱི་འཕེལ་རིམ་ཡིན། ཟླ་འགའི་སྔོན་ལ། ཀྲུང་གོ་གུང་ཁྲན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛམས་གྲོས་ཚོགས་ཐེངས་གསུམ་པ་ལས་ཀྲུང་གོས་ཕྱོགས་ཡོངས་ནས་སྔར་ལས་བཅོས་སྒྱུར་ཟབ་སྤེལ་བྱེད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་ཐད་མ་ལག་ལྡན་པའི་བཀོད་སྒྲིག་བྱས། ཀྲུང་གོས་ཐོག་མཐའ་བར་གསུམ་དུ་ཕྱི་ཕྱོགས་སྒོ་འབྱེད་ཀྱི་རྩ་བའི་རྒྱལ་ཇུས་རྒྱུན་འཁྱོངས་བྱས་ནས། ཨ་རིའི་ཁེ་ལས་དང་བཅས་པའི་རྒྱལ་ཁབ་སོ་སོའི་ཁེ་ལས་ལ་མུ་མཐུད་དུ་ཁྲོམ་ར་ཅན་དང་ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲས་བསྐྲུན་པ་དང་། ཚོང་དོན་དངུལ་གཏོང་རང་དབང་ཅན་དང་སྟབས་བདེ་ཅན་ལ་མུ་མཐུད་དུ་སྐུལ་འདེད་བཏང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་གྲུབ་འབྲས་གསར་བས་འཛམ་གླིང་ལ་གོ་སྐབས་གསར་བ་འདོན་སྤྲོད་བྱེད་རྒྱུ། ཨ་རི་དང་ཀྲུང་གོའི་ཚོང་དོན་རྒྱལ་ཡོངས་ཨུ་ཡོན་ལྷན་ཁང་དང་ལས་རིགས་སོ་སོའི་གྲོགས་པོ་ཚོས་མུ་མཐུད་དུ་ཀྲུང་གོ་དང་ཨ་རིའི་འབྲེལ་བར་ཐུགས་ཁུར་དང་རྒྱབ་སྐྱོར་གནང་ཞིང་། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་ཁྲོད་ཧུར་ཐག་གིས་ཞུགས་ནས། སྒོ་འབྱེད་མཉམ་ལས་དང་གཉིས་ཕན་མཉམ་རྒྱལ་གྱི་ལེའུ་གསར་བ་མཉམ་དུ་འབྲི་བ་དང་། ཀྲུང་གོ་དང་ཨ་རིའི་འབྲེལ་བ་བརྟན་བརླིང་དང་བདེ་ཐང་། རྒྱུན་མཐུད་ཐུབ་པའི་འཕེལ་རྒྱས་བཅས་ཀྱི་ཐད་བྱས་རྗེས་གསར་བ་འཇོག་པའི་རེ་བ་བྱེད་ཀྱིན་ཡོད་ཅེས་གསུངས།

ཉིན་དེར། ཨ་རིའི་ཙུང་ཐུང་པེད་ཏིན་གྱིས་ཨ་རི་དང་ཀྲུང་གོའི་ཚོང་དོན་རྒྱལ་ཡོངས་ཨུ་ཡོན་ལྷན་ཁང་གི2024ལོའི་རྟེན་འབྲེལ་མཛད་སྒོའི་དགོང་ཚོགས་ལ་རྟེན་འབྲེལ་ཞུ་བའི་འཕྲིན་ཡིག་བསྐུར།