རྒྱལ་སྲིད་སྤྱི་ཁྱབ་ཁང་གཞུང་སྒྲུབ་ཐིན་གྱིས《ཀྲུང་གོས་ཨེ་ཙི་ནད་བཀག་སྡོམ་དང་འགོག་བཅོས་བྱེད་པའི2024ལོ་ནས་2030ལོའི་བར་གྱི་འཆར་འགོད》པར་འགྲེམས་བྱས།

 ཉེ་ལམ།  རྒྱལ་སྲིད་སྤྱི་ཁྱབ་ཁང་གཞུང་སྒྲུབ་ཐིན་གྱིས《ཀྲུང་གོས་ཨེ་ཙི་ནད་བཀག་སྡོམ་དང་འགོག་བཅོས་བྱེད་པའི་2024ལོ་ནས་2030ལོའི་བར་གྱི་འཆར་འགོད》 པར་འགྲེམས་བྱས་ཏེ། ཨེ་ཙི་ནད་འགོག་བཅོས་ལས་དོན་ལ་སྔར་ལས་སྐུལ་འདེད་བཏང་སྟེ་མི་དམངས་མང་ཚོགས་ཀྱི་གཟུགས་གཞི་བདེ་ཐང་ཡོང་བར་སྲུང་སྐྱོང་བྱས།

《འཆར་འགོད》ནང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བཟུང་སྟེ།  ཏང་གི་ཚོགས་ཆེན་ཐེངས་ཉི་ཤུ་པ་དང་། སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་དང་།  ཏང་གི་འགོ་ཁྲིད་རྒྱུན་འཁྱོངས།  སྡེ་ཁག་མཉམ་ལས་དང་། སྤྱི་ཚོགས་སྐུལ་སློང་། དམངས་ཡོངས་ཞུགས་པ་བཅས་རྒྱུན་འཁྱོངས། སྔོན་འགོག་གཙོ་བོར་འཛིན་པ་དང་། འགོག་བཅོས་ཟུང་འབྲེལ། ཕྱོགས་བསྡུས་བཅོས་སྐྱོང་། རིགས་དབྱེའི་མཛུབ་སྟོན་བཅས་རྒྱུན་འཁྱོངས། སྨན་བཅོས་སྔོན་འགོག་མཐུན་སྦྱོར་དང་སྨན་བཅོས་སྔོན་འགོག་མཉམ་འདྲེས་ཀྱི་ལམ་སྲོལ་གསར་གཏོད། གཙོ་གནད་ས་ཁུལ་དང་། གཙོ་གནད་གནད་དོན། གཙོ་གནད་བརྒྱུད་རིམ་བཅས་འབུར་དུ་ཐོན་པར་བྱས་ནས།  གསར་སྐྲུན་སྒུལ་ཤུགས་སུ་བརྩིས་ཏེ་ཨེ་ཙི་ནད་འགོག་བཅོས་ལས་དོན་སྤུས་ཚད་མཐོན་པོས་འཕེལ་རྒྱས་འགྲོ་བར་སྐུལ་འདེད་གཏོང་དགོས་ཞེས་བསྟན་ཡོད།

《འཆར་འགོད》ནང་འགོག་བཅོས་ཀྱི་སྤྱིའི་དམིགས་འབེན་ནི་ཨེ་ཙི་ནད་འགོ་ཚད་ཇེ་དམའ་རུ་གཏོང་བ་དང་འབྲེལ་ཡོད་འཆི་ཚད་ཇེ་ཉུང་དུ་བཏང་སྟེ།  སྤྱི་ཡོངས་ཀྱི་རིམས་ནད་ཆེས་དམའ་བའི་ཆུ་ཚད་དུ་རྒྱུན་མཐུད་ངང་ཚོད་འཛིན་བྱེད་རྒྱུ་དེ་ཡིན་པ་གཏན་འཁེལ་བྱས་པ་དང་ཆབས་ཅིག  སྤྱི་ཚོགས་ཀྱི་འགོག་སྲུང་འདུ་ཤེས་འཛིན་ཤུགས་ཆེ་རུ་གཏོང་བ་དང་། ཉེན་ཁ་ཆེ་བའི་བྱ་སྤྱོད་བསྒྱུར་བར་སྐུལ་འདེད་གཏོང་བ། ཁྱིམ་ཚང་དུ་མཆེད་པར་སྔོན་འགོག་བྱེད་པ། བརྟག་དཔྱད་དང་སྨན་བཅོས་ཕན་འབྲས་ཆེ་རུ་གཏོང་བ། མི་ཚོགས་ཀྱི་ནད་འགོས་པའི་ཆུ་ཚད་ཚོད་འཛིན་བྱེད་པ་སོགས་ཕྱོགས5ཐད་ཀྱི་བྱེ་བྲག་གི་བྱ་བའི་དམིགས་ཚད་གསལ་བོ་བྱས་ཡོད།

《འཆར་འགོད》ནང་དྲིལ་བསྒྲགས་སློབ་གསོའི་ཐེ་ཇུས་དང་སྤྱི་ཚོགས་སྐུལ་སློང་བྱེད་པ་དང་། ཞིབ་བཤེར་ཚད་ལེན་དང་ལྟ་ཞིབ་ཚད་ལེན་ལ་ཤུགས་སྣོན་པ། སྨན་བཅོས་དང་རོགས་སྐྱོབ་ལ་སྐུལ་འདེད་གཏོང་བ། མི་ཚོགས་མི་འདྲ་བར་དམིགས་སའི་རང་བཞིན་གྱི་སྔོན་འགོག་ཚོད་འཛིན་བྱེད་ཐབས་དོན་འཁྱོལ་བྱེད་པ། གཙོ་གནད་ས་ཁུལ་གྱི་འགོག་བཅོས་ལས་དོན་ལ་ཤུགས་སྣོན་པ། ཨེ་ཙི་ནད་འགོག་བཅོས་ཀྱི་སྤྱི་ཚོགས་བཅོས་སྐྱོང་བྱེད་པ་སོགས་ཕྱོགས་དྲུག་ཐད་ཀྱི་བྱེ་བྲག་གི་བྱེད་ཐབས14བཏོན་ཡོད།

《འཆར་འགོད》ནང་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་པ་དང་འགོག་བཅོས་ཀྱི་འགན་འཁྲི་ཇེ་དྲག་ཏུ་བཏང་སྟེ། སྲིད་ཇུས་དོན་འཁྱོལ་དང་མ་ལག་འཛུགས་སྐྲུན་འཐུས་ཚང་དུ་གཏོང་བ་དང་། འགོག་བཅོས་ནུས་པ་ཆེ་རུ་གཏོང་བ། སྨན་རྫས་མཁོ་སྤྲོད་འགན་ལེན་བྱེད་པ། ཞིབ་འཇུག་གསར་གཏོད་ལ་ཤུགས་སྣོན་པ། རྒྱལ་སྤྱིའི་མཉམ་ལས་སྤེལ་བ་སོགས་བྱས་ཏེ། ཨེ་ཙི་ནད་འགོག་བཅོས་ཀྱི་དམིགས་འབེན་མངོན་འགྱུར་བྱེད་ཆེད་འདེགས་སྐྱོར་ནུས་ལྡན་བྱེད་དགོས་པའི་བླང་བྱ་བཏོན་ཡོད།