ཁྲིན་ཀང་དང་ཝུའུ་ཞའོ་ཅུན་གྱིས་ཀྲུང་གོའི་ལྷོ་ཆུ་བྱང་འདྲེན་སྡེ་ཚོགས་ཚད་ཡོད་ཀུང་སིའི་ཝང་ཨན་ནན་དང་སུན་ཀྲི་ཡུས་སོགས་དང་བཞུགས་མོལ་བྱས།

ཟླ12པའི་ཚེས5ཉིན།    ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝུའུ་ཞའོ་ཅུན་གྱིས་ཟི་ལིང་དུ་ཀྲུང་གོའི་ལྷོ་ཆུ་བྱང་འདྲེན་སྡེ་ཚོགས་ཚད་ཡོད་ཀུང་སིའི་ཝང་ཨན་ནན་དང་སུན་ཀྲི་ཡུས་སོགས་དང་བཞུགས་མོལ་བྱས།

ཁྲིན་ཀང་དང་ཝུའུ་ཞའོ་ཅུན་གྱིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ནས་ཝང་ཨན་ནན་དང་སུན་ཀྲི་ཡུས་སོགས་མཚོ་སྔོན་ལ་ཕེབས་པར་དགའ་བསུ་ཞུས་པ་དང་། ཀྲུང་གོའི་ལྷོ་ཆུ་བྱང་འདྲེན་སྡེ་ཚོགས་ཀྱིས་དུས་ཡུན་རིང་པོར་མཚོ་སྔོན་ལ་རྒྱབ་སྐྱོར་ཆེན་པོ་བྱས་པར་ཐུགས་རྗེ་ཆེ་ཞུས།  ཁོ་ཚོས་བཤད་རྒྱུར།  སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་མི་དམངས་དང་མཐོ་སྒང་གི་ས་གཞི་ཆེན་མོར་བརྩེ་སེམས་བཅངས་ཤིང་།  ད་ལོའི་ཟླ6པར་ཡང་བསྐྱར་མཚོ་སྔོན་དུ་རྟོག་ཞིབ་གནང་བར་མ་ཟད་གསུང་བཤད་གལ་ཆེན་གནང་ནས་མདུན་སྐྱོད་ཀྱི་ཁ་ཕྱོགས་གསལ་སྟོན་མཛད་དེ།  ལས་དོན་སྣ་ཚོགས་འཕེལ་རྒྱས་སུ་འགྲོ་བར་སྐུལ་འདེད་གཏོང་ཆེད་སྒུལ་ཤུགས་ཆེན་པོ་བསྣན་ཡོད།     མིག་སྔར། མཚོ་སྔོན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་བཏོན་པའི་བླང་བྱ་གལ་ཆེན་གཞིར་བཟུང་ནས། ལྗང་མདོག་ཐཱན་ཉུང་གི་འཕེལ་རྒྱས་རྒྱུན་འཁྱོངས་བྱེད་པ་དང་།    ཐོན་ལས་ཀྱི“གནས་བཞི”འཛུགས་སྐྲུན་ལ་ཕྱོགས་ཡོངས་ནས་སྐུལ་འདེད་གཏོང་བ།   ནུས་ཤུགས་ཡོད་རྒུས་སྤུས་ཚད་མཐོ་བའི་འཕེལ་རྒྱས་ཀྱི་ལམ་དུ་བསྐྱོད་རྒྱུར་འབད་བཞིན་ཡོད། ཀྲུང་གོ་ལྷོ་ཆུ་བྱང་འདྲེན་སྡེ་ཚོགས་ཀྱིས་མཚོ་སྔོན་གྱིས་འཛམ་གླིང་རིམ་པའི་ཚྭ་མཚོའི་ཐོན་ལས་རྟེན་གཞི་འཛུགས་སྐྲུན་བྱེད་ཚད་ཇེ་མགྱོགས་སུ་གཏོང་བ་དང་།    རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་ཀྱི་མཐོ་ས་བསྐྲུན་པ།    ཚྭ་འདམ་གཤོང་སའི་ཆུའི་ཐོན་ཁུངས་བཀོད་སྒྲིག་དང་།    མཚོ་སྔོན་གྱི་ཆུ་དྲའི་བཟོ་སྐྲུན་འཛུགས་སྐྲུན།    “འཇུ་ལག་ཆུ་བོ་ཙོང་ཆུར་འདྲེན་པ”དང“རྨ་ཆུ་ཟི་ལིང་དུ་འདྲེན་པ”སོགས་ཀྱི་གཙོ་གནད་བྱ་བར་མཉམ་དུ་སྐུལ་འདེད་གཏོང་བ་བཅས་བྱས་ནས། མཚོ་སྔོན་གྱིས་ནུས་ཤུགས་ཡོད་རྒུས་ཞབས་ཞུ་འགན་སྲུང་གི་བྱ་བ་ཡག་པོར་སྒྲུབ་རྒྱུའི་རེ་བ་ཡོད་ཟེར།

ཝང་ཨན་ནན་གྱིས་ཀྲུང་གོ་ལྷོ་ཆུ་བྱང་འདྲེན་སྡེ་ཚོགས་ཀྱི་གནས་ཚུལ་མདོར་བསྡུས་དང་ཁེ་ལས་མཚོ་སྔོན་དུ་འཕེལ་རྒྱས་སོང་ཚུལ་ངོ་སྤྲོད་བྱས།     ཁོས་མཚོ་སྔོན་གྱི་སྐྱེ་ཁམས་གནས་བབ་འབུར་ཐོན་ཡིན་པ་དང་། དེ་ནི་ལྷོ་ཆུ་བྱང་འདྲེན་བྱེད་པའི་ནུབ་རྒྱུད་ཀྱི་ཆུ་ཁུངས་གལ་ཆེན་ཞིག་རེད།  ཀྲུང་གོའི་ལྷོ་ཆུ་བྱང་འདྲེན་སྡེ་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་ནན་མོ་བྱེད་པ་དང་། “ཆུ་མཁོ་འདོན་ལས་རིགས་ཀྱི་སྣེ་འདྲེན་ཁེ་ལས་དང་།    རྒྱལ་ཁབ་ཀྱི་ཆུ་དྲ་འཛུགས་སྐྲུན་སྣེ་འདྲེན་ཁེ་ལས།    ཆུའི་བདེ་འཇགས་འགན་སྲུང་གི་རྐང་འཛིན་ཁེ་ལས”བཅས་ཀྱི་འཐབ་ཇུས་ངེས་གནས་ལ་གཞི་ཚུགས་ཏེ། ཧུར་ཐག་གིས་མཚོ་སྔོན་གྱི་དགོས་མཁོ་དང་སྦྲེལ་མཐུད་བྱེད་པ་དང་།    མཉམ་ལས་ལས་གཞི་གལ་ཆེན་དོན་འཁྱོལ་བྱ་རྒྱུར་ཇུས་འགོད་དང་སྐུལ་འདེད་གཏོང་བ། སྔར་ལས་ལྷག་པའི་སྒོ་ནས་ཕྱོགས་གཉིས་ཀྱིས་རྒྱལ་ཁབ་ཀྱི་ཆུ་དྲ་འཛུགས་སྐྲུན་དང་།    དག་གཙང་ནུས་ཁུངས་གསར་སྤེལ།    སྐྱེ་ཁམས་ཁོར་ཡུག་སྲུང་སྐྱོབ་སོགས་ཁྱབ་ཁོངས་ཀྱི་དངོས་སྒྲུབ་མཉམ་ལས་གཏིང་ཟབ་ཏུ་གཏོང་བ་བཅས་བྱས་ཏེ། རྒྱལ་ཁབ་ཀྱི་འཐབ་ཇུས་གལ་ཆེན་ལག་བསྟར་བྱ་རྒྱུར་ཞབས་འདེགས་ལེགས་པོ་ཞུ་བ་དང་། བརྩེ་སེམས་ཆེན་པོ་དང་ནུས་ཤུགས་ཡོད་རྒུས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པར་ཆུའི་ཐོན་ཁུངས་ཀྱི་འདེགས་སྐྱོར་དང་ཆུའི་བདེ་འཇགས་ཀྱི་འགན་སྲུང་འདོན་སྤྲོད་བྱ་རྒྱུ་ཡིན་ཞེས་བསྟན།

མཚོ་སྔོན་དུ་སྡོད་སྐབས། ཝང་ཨན་ནན་དང་སུན་ཀྲི་ཡུས་སོགས་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ན་གོར་མོ་གྲོང་ཁྱེར་དུ་གཉེར་བའི་མཚོ་སྔོན་ཞིང་ཆེན་གྱི2024ལོའི་དུས་ཚིགས་བཞི་པའི་ཆུ་བེད་བཟོ་སྐྲུན་གཅིག་བསྡུས་ཀྱིས་ལས་འགོ་རྩོམ་པའི་བྱ་འགུལ་དུ་ཞུགས།

མཚོ་སྔོན་ཞིང་ཆེན་གྱི་འགོ་ཁྲིད་ཚེ་རིང་ཐར་དང་ཀྲུའུ་ཞང་ཧྥིན་འབྲེལ་ཡོད་བྱ་འགུལ་ལ་ཞུགས།