2024ལོའི་འཛམ་གླིང་སྲོལ་རྒྱུན་གསོ་རིག་ཚོགས་ཆེན་གྱི་པེ་ཅིན་བསྒྲགས་གཏམ་ཁྱབ་བསྒྲགས་བྱས་ནས་སྲོལ་རྒྱུན་གསོ་རིག་དང་སྨན་རྫས་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་པ།

བསྒྲགས་གཏམ་ནང་།　སྲོལ་རྒྱུན་གསོ་རིག་ནི་ཕུལ་བྱུང་གི་སྲོལ་རྒྱུན་རིག་གནས་ཀྱི་གཞི་རྟེན་གལ་ཆེན་ཞིག་ཡིན་པས།　དཔལ་ཡོན་ཕན་ཚུན་དཔྱད་གཞིར་འཛིན་པར་སྐུལ་འདེད་གཏོང་བ་དང་མི་དམངས་ཀྱི་བདེ་ཐང་སྲུང་སྐྱོང་བྱེད་པ་སོགས་ཀྱི་ཐད་ནུས་པ་གལ་ཆེན་བཏོན་ཡོད།　སྲོལ་རྒྱུན་གྱི་གསོ་རིག་ལ་རྙོག་འཛིང་རང་བཞིན་དང་རིག་གནས་མི་འདྲ་བའི་ཁྱད་ཆོས་ཡོད་པས།　ཆེད་དུ་ཞིབ་འཇུག་བྱེད་པའི་ཐབས་ཤེས་ཤིག་དགོས་པ་ཡིན།　ཆབ་སྲིད་ཀྱི་ཁས་ལེན་དང་སྲིད་ཇུས་ཀྱི་རྒྱབ་སྐྱོར་ཤུགས་ཆེན་བྱེད་པ་དེས་སྲོལ་རྒྱུན་གྱི་གསོ་རིག་དང་སྨན་རྫས་བདེ་འཇགས་དང་ཕན་ནུས་ལྡན་པའི་སྒོ་ནས་འཕྲོད་བསྟེན་མ་ལག་ནང་འདྲེས་པར་སྐུལ་འདེད་གཏོང་བར་ཤིན་ཏུ་གལ་འགངས་ཆེ་བར་བསྟན།

བསྒྲགས་གཏམ་ལྟར་ན།　2024ལོའི་འཛམ་གླིང་སྲོལ་རྒྱུན་གསོ་རིག་ཚོགས་ཆེན་དང་ཚོགས་ཞུགས་པས་འབྲེལ་ཡོད་བྱ་སྤྱོད་སྤེལ་རྒྱུར་མོས་མཐུན་བྱས་ཤིང་།　དེའི་ནང་སྲོལ་རྒྱུན་གསོ་རིག་གི་ཐ་སྙད་དང་ཤེས་བྱ།　ལག་ལེན་བཅས་ཁྱབ་གདལ་གཏོང་རྒྱུ་དང་།　རྒྱལ་སྤྱིའི་སྲོལ་རྒྱུན་གསོ་རིག་སྨན་རྫས་དམིགས་བསལ་ཞིབ་འཇུག་བྱེད་པའི་གྲོས་རིམ་གཏན་འབེབས་དང་ལག་བསྟར་བྱེད་པར་རྒྱབ་སྐྱོར་བྱ་རྒྱུ།　སྲོལ་རྒྱུན་གྱི་གསོ་བ་རིག་པ་དང་དེང་རབས་ཀྱི་གསོ་བ་རིག་པ་མཉམ་འདྲེས་ལ་སྐུལ་འདེད་གཏོང་རྒྱུ་སོགས་ཚུད་ཡོད།

གཞན་ཡང་ཀྲུང་གོའི་རྒྱལ་ཁབ་ཀྲུང་ལུགས་གསོ་རིག་དང་སྨན་རྫས་དོ་དམ་ཅུའུ་ཡིས་མཇུག་འགྲིལ་མཛད་སྒོའི་ཐོག་སྲོལ་རྒྱུན་གསོ་རིག་དང་སྨན་རྫས་ཀྱི་རྒྱལ་སྤྱིའི་ཚན་རིག་ཞིབ་འཇུག་མཉམ་ལས་འཆར་གཞི་དང་།　སྲོལ་རྒྱུན་གསོ་རིག་དང་སྨན་རྫས་ཀྱི་ཤེས་ལྡན་མི་སྣའི་སྤེལ་རེས་དང་ནུས་པ་མཐོར་གཏོང་གི་རྣམ་གྲངས་ཁྱབ་བསྒྲགས་བྱས།

དེའི་ནང་སྲོལ་རྒྱུན་གསོ་རིག་དང་སྨན་རྫས་ཀྱི་རྒྱལ་སྤྱིའི་ཚན་རིག་ཞིབ་འཇུག་མཉམ་ལས་འཆར་གཞི་དེ་སྐམ་ཁབ་ཞིབ་འཇུག་དང་།　སྲོལ་རྒྱུན་གསོ་རིག་གི་བརྟག་གཞིག་ཞིབ་འཇུག་གི་རྒྱལ་སྤྱིའི་མཉམ་ལས།　དུས་རབས་གསར་པའི་ཧྲིན་ནུང་ཁྲང་པའེ་ཚའོ་འཆར་གཞི་ལག་བསྟར་བྱ་རྒྱུ་ཡིན།　སྲོལ་རྒྱུན་གསོ་རིག་གི་ཤེས་ལྡན་མི་སྣའི་སྤེལ་རེས་དང་ནུས་པ་མཐོར་གཏོང་གི་རྣམ་གྲངས་དེ་གཙོ་བོ་ཕྱི་རྒྱལ་གྱི་སྲོལ་རྒྱུན་གསོ་རིག་གི་ལས་དོན་པ་དང་དོ་དམ་མི་སྣ།　ཕྱི་ལུགས་གསོ་རིག་གི་ནད་ཐོག་སྨན་བཅོས་ལས་ཀ་བྱེད་མཁན།　ཀྲུང་ལུགས་གསོ་རིག་སློབ་སྦྱོང་དང་ཞིབ་འཇུག་བྱེད་མཁན་བཅས་ལ་ཕྱོགས་ནས།　ཉེ་བའི་ལོ་གསུམ་ནང་མི1300ལྷག་གསོ་སྐྱོང་དང་གསོ་སྦྱོང་བྱ་རྩིས་ཡོད།

ཚོགས་ཆེན་ཐོག་ད་དུང་གོ་ལ་ཧྲིལ་པོའི་སྲོལ་རྒྱུན་གསོ་རིག་ཚོགས་པའི་མཉམ་འབྲེལ་འཛུགས་པའི་གྲོས་གཞི་བཏོན་ནས།　སྔར་བས་དམ་ཟབ་ཀྱི་རྒྱལ་སྤྱིའི་སྲོལ་རྒྱུན་གསོ་རིག་རོགས་ཟླའི་འབྲེལ་བའི་དྲ་རྒྱ་འཛུགས་རྒྱུ་ཡིན

ཤེས་གསལ་ལྟར་ན།　ད་ཐེངས་ཀྱི་ཚོགས་ཆེན་དེ་ཀྲུང་གོ་དང་འཛམ་གླིང་འཕྲོད་བསྟེན་རྩ་འཛུགས་ཀྱིས་མཉམ་དུ་གཉེར་བ་ཞིག་ཡིན་ཞིང་།　གོ་ལ་ཧྲིལ་པོའི་སྲོལ་རྒྱུན་གསོ་རིག་དང་སྨན་རྫས་ཁྱབ་ཁོངས་ཀྱི་སྲིད་གཞུང་གི་དཔོན་རིགས་དང་།　རྒྱལ་སྤྱིའི་རྩ་འཛུགས་ཀྱི་འཐུས་མི།　ཆེད་མཁས་པ་དང་མཁས་དབང་བཅས3000ལྷག་ཚོགས་འདུར་ཞུགས་ཤིང་།　བསྡོམས་པས་ཆུ་ཚད་མཐོ་བའི་གཏམ་བཤད་དང་སྙན་ཞུ་ཁག129དང་།　བརྗེ་རེས་དང་སྐད་ཆ་ཤོད་རེས་ཐེངས13བྱས་པ་རེད།།