མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གིས་འཐུས་མིའི་གྲོས་གཞི་སྒྲུབ་གཉེར་བྱ་བར་ལྟ་སྐུལ་བྱས།

ཟླ10པའི་ཚེས30ཉིན། མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ལྟ་སྐུལ་སྒྲུབ་གཉེར་ཚན་ཆུང་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་དུ་སོང་ནས། ཞིང་ཆེན་དམངས་ཆེན་འཐུས་མི་མིས་ཧུང་ཡུན་གྱིས་བཏོན་པའི། 《སྤྲོ་གསེང་ཞིང་ལས་དང་གྲོང་གསེབ་ཡུལ་སྐོར་འཛུགས་སྐྲུན་ཆུ་ཚད་ལ་སྐུལ་འདེད་གཏོང་དགོས་པའི་སྐོར་གྱི་གྲོས་འགོ》གཙོ་གནད་དུ་བཟུང་ནས་བསྒྲུབ་རྒྱུར་ལྟ་སྐུལ་བྱས།

སྒྲུབ་གཉེར་ལྟ་སྐུལ་ཚན་ཆུང་གིས་རྨ་ནུབ་གྲོང་རྡལ་ཧུང་ལིའུ་ཐན་གྲོང་ཚོ་དང་རྨ་ནུབ་གྲོང་རྡལ་གྱི་གྲོང་གསེབ་ཡུལ་སྐོར་སྣེ་ལེན་ས་ཚིགས་སུ་ཡུལ་དངོས་སུ་རྟོག་ཞིབ་བྱས་ཏེ། མཛེས་ལྗོངས་ཁུལ་གྱི་འཆར་འགོད་དང་མཛེས་ལྗོངས་འཛུགས་སྐྲུན། ཡུལ་སྐོར་བའི་འགྲུལ་ཚད། ཡུལ་སྐོར་ཡོང་འབབ། རྨང་གཞིའི་སྒྲིག་ཆས་འཛུགས་སྐྲུན་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་པ་དང་། ལས་ཀའི་གནས་ཚུལ་གྱི་སྙན་ཞུ་དང་དེ་བཞིན་ཡུལ་ཚོ་དང་གྲོང་རྡལ་དང་མཛེས་ལྗོངས་ཁུལ་གྱི་འགན་འཁུར་བ་དང་། དམངས་ཆེན་འཐུས་མིའི་བསམ་འཆར་དང་གྲོས་འགོར་ཉན།

སྒྲུབ་གཉེར་ལྟ་སྐུལ་ཚན་ཆུང་གིས་ཁྲི་ཀ་རྫོང་གི་གྲོང་གསེབ་ཡུལ་སྐོར་དང་གྲོང་གསེབ་ཀྱི་ཐོན་ལས་འཕེལ་རྒྱས་ལ་ཐོབ་པའི་གྲུབ་འབྲས་ལ་ཁས་ལེན་གང་ལེགས་བྱས། གྲོང་གསེབ་ཡུལ་སྐོར་ནི་གྲོང་གསེབ་དར་རྒྱས་འཐབ་ཇུས་ལག་བསྟར་བྱེད་པའི་གནད་འགག་གི་དུས་རིམ་ཞིག་ཡིན་པས། ཆབ་སྲིད་ཀྱི་གནས་བབ་སྔར་ལས་ཇེ་མཐོར་བཏང་སྟེ། བཅོས་སྒྱུར་ཁྱོན་ཡོངས་ནས་ཟབ་སྤེལ་གཏོང་བར་བརྟེན་ནས་གྲོང་གསེབ་ཡུལ་སྐོར་གྱི་གསོན་ཤུགས་འཕེལ་བར་བྱེད་པ་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་འདུ་ཤེས་རྒྱུན་འཁྱོངས་བྱེད་པ། གྲོང་གསེབ་དར་སྤེལ་འཐབ་ཇུས་ལག་བསྟར་བྱ་རྒྱུར་དམ་པོར་དམིགས་པ། སྲིད་ཇུས་བྱེད་ཐབས་འཐུས་ཚང་དུ་གཏོང་བ། གྲོང་གསེབ་ཡུལ་སྐོར་ལ་རོགས་སྐྱོར་བྱེད་ཤུགས་ཆེ་རུ་གཏོང་བ་བཅས་བྱས་ནས། གྲོང་གསེབ་དར་སྤེལ་གཏོང་བར་རོགས་སྐྱོར་བྱེད་དགོས་ཞེས་བསྟན། ཐབས་མང་མཉམ་སྤྱོད་རྒྱུན་འཁྱོངས་སྒོས་གྲོང་གསེབ་ཡུལ་སྐོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། ཐོན་ཁུངས་ཀྱི་ལེགས་ཆ་དང་ས་ཁོངས་ཀྱི་ལེགས་ཆ། རང་བྱུང་སྐྱེ་ཁམས་ཀྱི་ལེགས་ཆ་བཅས་ནས་རྐང་ཚུགས་པར་བྱེད་པ། གྲོང་གསེབ་ཡུལ་སྐོར་གྱི་ངེས་གནས་ཡང་དག་འཚོལ་བ། སྲིད་གཞུང་གི་ཚད་ལྡན་ཁྲིད་སྟོན་ནུས་པ་འདོན་སྤེལ་བྱེད་པ། སྡེ་ཁག་བར་གྱི་མཐུན་སྦྱོར་ལ་ཤུགས་སྣོན་པ་བཅས་བྱས་ཏེ། སྐྱེ་ཁམས་ལྟ་སྐོར་ཞིང་ལས་དང་སྤྲོ་གསེང་ཉམས་ལེན། ལུས་གསོའི་སྤྲོ་གསེང་ཐོན་ལས་བཅས་འཕེལ་རྒྱས་གཏོང་བའི་ཐད་སྲིད་ཇུས་ཀྱི་མཁོ་སྤྲོད་ནུས་པ་ཆེ་རུ་གཏོང་དགོས་ཞེས་བསྟན།  དྲིལ་སྒྲོག་དང་འོས་སྦྱོར་བྱེད་ཤུགས་ཆེ་རུ་གཏོང་བ་དང་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་རྒྱུན་འཁྱོངས་བྱས་ཏེ། རིག་གནས་ཀྱི་ནང་དོན་ཇེ་ཟབ་ཏུ་བཏང་ནས་གྲོང་གསེབ་ཀྱི་ཡུལ་སྐོར་རིམ་པ་མཐོ་རུ་གཏོང་རྒྱུར་སྐུལ་འདེད་གཏོང་བ་དང་ཆབས་ཅིག རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ཁྲིད་སྟོན་དུ་བྱས་ཏེ། རྫོང་ཁོངས་ཀྱི་གྲོང་གསེབ་ཡུལ་སྐོར་མཛེས་ལྗོངས་ཁུལ་སྦྲེལ་མཐུད་དང་ལམ་ཐིག་གིས་ཁྱོན་ཡོངས་ལ་སྐུལ་ཁྲིད་བྱ་རྒྱུར་སྐུལ་འདེད་བཏང་ནས། “གནམ་འོག་གི་རྨ་ཆུ་ཁྲི་ཀ་ནས་ཆེས་དྭངས་པ”དང“མཐོ་སྒང་གི་ཁམས་གསོའི་གྲོང་ཁྱེར་དང་པོའི”ཁྱད་ལྡན་སྤུས་རྟགས་རྒྱུན་ཆད་མེད་པར་གཏོད་དགོས་པའི་བླང་བྱ་བཏོན།