ཨུ་རུ་སིའི་ཙུང་ཐུང་གི་གསར་འགྱུར་དྲུང་ཡིག་གིས་ཨུ་རུ་སི་དང་ཝུའུ་ཁི་ལན་གྱི་གྲོས་མོལ་ལ་སྔོན་འགྲོའི་ཆ་རྐྱེན་ཚང་མེད་པའི་ཚུལ་བསྟན།

ཨུ་རུ་སིའི་ཙུང་ཐུང་གི་གསར་འགྱུར་དྲུང་ཡིག་ཕའེ་སི་ཁི་ཧྥུའུ་ཡིས་ཚེས13ཉིན་བསྟན་དོན། ཨུ་རུ་སི་དང་ཝུའུ་ཁི་ལན་གྱི་གྲོས་མོལ་གྱི་སྔོན་འགྲོའི་ཆ་རྐྱེན་ཚང་མེད་ཟེར།

ཕའེ་སི་ཁི་ཧྥུའུ་ཡིས་ཉིན་དེར་སྨྱན་བྱད་ལ་བསྟན་དོན། བདེ་འཇགས་འགན་སྲུང་གི་གྲོས་གཞི་ནི་ཝུའུ་ཁི་ལན་གྱི་ཉམས་ཉེན་ཐག་གཅོད་བྱེད་པའི་ཇུས་གཞིའི་གྲུབ་ཆ་གལ་ཆེན་ཞིག་ཡིན་པ་དང་། ཝུའུ་ཁི་ལན་ཕྱོགས་ཀྱིས་གྲོས་མོལ་མི་བྱེད་པའི་ལངས་ཕྱོགས་བཟུང་བ་དང་། ཨུ་རུ་སི་དང་ཝུའུ་ཁི་ལན་གྱི་གྲོས་མོལ་གྱི་སྔོན་འགྲོའི་ཆ་རྐྱེན་ཚང་མེད་ལ། ད་ལྟ་གྲོས་མོལ་གནད་དོན་གླེང་ན་ཅུང་སྔ་ཡོད་ཟེར། ཁོས་བསྐྱར་སྒྲོག་བྱས་དོན། ཨུ་རུ་སི་ཡིས་ཝུའུ་ཁི་ལན་གྱི་ཉམས་ཉེན་དང་བདེ་འཇགས་འགན་སྲུང་གནད་དོན་ཐད་ནས་ཨ་མེ་རི་ཁ་དང་བཅས་པའི་རྒྱལ་ཁབ་ཚང་མའི་བར་འབྲེལ་འདྲིས་བྱེད་འདོད་ཡོད་ཟེར།

ཕའེ་སི་ཁི་ཧྥུའུ་ཡིས་བཤད་རྒྱུར། རྒྱལ་ཁབ་མང་བོས་ཨུ་རུ་སིའི་ཙུང་ཐུང་ཕུའུ་ཅིན་དང་ཨ་མེ་རི་ཁའི་ལས་འགན་ཁུར་བར་སྒུག་པའི་ཙུང་ཐུང་ཐི་ལིང་ཕུའུ་ཡིས་གྲོས་མོལ་བྱེད་སའི་གནས་སུ་བྱེད་འདོད་ཡོད་པའི་ཚུལ་ཡང་། འབྲེལ་ཡོད་གྲོས་མོལ་དེ་མིག་སྔར་སྔར་བཞིན་ཆབ་སྲིད་ཀྱི་རེ་འདུན་ཡོད་པའི་དུས་རིམ་དུ་གནས་ཡོད་ལ། ངོ་བོའི་རང་བཞིན་ལྡན་པའི་གྲ་སྒྲིག་གང་ཡང་བྱས་མེད་ཟེར།