ཁཱ་ཐར་གྱི་མགོ་ཁྲིད་པས་ཧཱ་མཱ་སིའི་འཐུས་ཚབ་ཚོགས་པར་ཐུག་འཕྲད་བྱས།

ཁཱ་ཐར་གྱི་མགོ་ཁྲིད་པ་ཐཱ་མུས་མུའུ་ཡིས་ཚེས13ཉིན་རྒྱལ་ས་ཏའོ་ཧཱ་ནས་ཕཱ་ལེ་སི་ཐན་དབྱི་སི་ལན་འགོག་རྒོལ་རྩ་འཛུགས་ཧཱ་མཱ་སིའི་མཐོ་རིམ་དཔོན་པོ་ཧཱ་ཡཱ་ཡིས་ཁྲིད་པའི་འཐུས་ཚབ་ཚོགས་པར་ཐུག་འཕྲད་བྱས་པ་དང་། ད་ལྟ་སྤེལ་བཞིན་པའི་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མོལ་གནད་དོན་ལ་གྲོས་བསྡུར་བྱས། ཁཱ་ཐར་ཕྱོགས་ཀྱིས་སྤེལ་བའི་གནས་ཚུལ་ལྟར་ན། ཐཱ་མུས་མུའུ་ཡིས་ཁཱ་ཐར་གྱིས་ཕཱ་ལེ་སི་ཐན་གྱི་ལས་དོན་དང་ཕཱ་ལེ་སི་ཐན་མི་དམངས་ཀྱི་ཁྲིམས་མཐུན་ཁེ་དབང་ལ་རྒྱབ་སྐྱོར་བྱེད་པའི་ལངས་ཕྱོགས་བརྟན་པོ་བསྐྱར་སྒྲོག་བྱས་ཡོད་ཟེར།

ཐཱ་མུས་མུའུ་ཡིས་ཉིན་དེར་ཨ་མེ་རི་ཁའི་ཙུང་ཐུང་པེད་ཏིན་ལ་ཁ་པར་བཏང་སྟེ་ཅཱ་ཧྲ་ས་ཁུལ་གྱི་གནས་བབ་ལ་གྲོས་བསྡུར་བྱས་པར་མ་ཟད། ཏའོ་ཧཱ་ནས་ཨ་མེ་རི་ཁའི་ལས་འགན་ཁུར་བར་སྒུག་པའི་ཙུང་ཐུང་ཐི་ལིང་ཕུའུ་ཡི་དབུས་ཤར་གནད་དོན་གྱི་ཆེད་མངག་ཕོ་ཉ་ཝེ་ཐི་ཁི་ཧྥུའུ་དང་ཨ་མེ་རི་ཁའི་རྒྱལ་ཁབ་བདེ་འཇགས་ཨུ་ཡོན་ལྷན་ཁང་གི་དབུས་ཤར་དང་ཨ་ཧྥེ་རི་ཁ་གླིང་བྱང་མའི་ལས་དོན་གྱི་མཐུན་སྦྱོར་བ་མེད་ཀི་ཁི་གཉིས་ལ་ཐུག་འཕྲད་བྱས། ཐཱ་མུས་མུའུ་ཡིས་བསྟན་དོན། ཁཱ་ཐར་གྱིས་ས་ཁུལ་གྱི་གཏན་འཇགས་ལ་སྐུལ་འདེད་གཏོང་བར་འབད་འབུངས་བྱེད་པ་དང་ཞི་བའི་གྲོས་མོལ་ཐད་སྟབས་བདེ་བསྐྲུན་ཡོད་ཟེར།

དབྱི་སི་རལ་གྱི་སྐབས་དོན་ཚགས་པར་གྱིས་ཚེས13ཉིན་བསྒྲགས་པ་ལྟར་ན། དབྱི་སི་རལ་གྱི་ཕྱི་འབྲེལ་བློན་ཆེན་སཱ་ཨར་གྱིས་ཉིན་དེར་བསྟན་དོན། དབྱི་སི་རལ་དང་ཧཱ་མཱ་སི་ཡིས་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མོལ་སྤེལ་བཞིན་པར་གྲུབ་འབྲས་ཐོབ་ཡོད་ཟེར།

དེ་ལས་གཞན་ཕཱ་ལེ་སི་ཐན་གྱི་འབྲེལ་ཡོད་མི་སྣས་ཚེས13ཉིན་བཤད་རྒྱུར། ཧཱ་མཱ་སི་ཡིས་ཉིན་དེར་ཅཱ་ཧྲ་ས་ཁུལ་གྱི་འཁྲུག་རྩོད་མཚམས་འཇོག་པའི་གྲོས་མཐུན་འཆར་ཟིན་ཐད་ནས་ལན་བཏབ་པ་དང་། གང་མགྱོགས་སྒོས་འཁྲུག་རྩོད་མཚམས་བཞག་སྟེ་ཕཱ་ལེ་སི་ཐན་མི་དམངས་ཀྱི་དཀའ་སྡུག་མཇུག་སྒྲིལ་དུ་འཇུག་པར་རེ་བཞིན་ཡོད་ཟེར།