ཧྲན་ཏུང་ཞིང་ཆེན་གྱི་འཐུས་ཚབ་ཚོགས་པས་མཚོ་སྔོན་དུ་རྟོག་ཞིབ་བྱས།

ཧྲན་ཏུང་ཞིང་ཆེན་གྱི་འཐུས་ཚབ་ཚོགས་པས་མཚོ་སྔོན་དུ་རྟོག་ཞིབ་བྱས།

ཟླ10ཚེས31ཉིན་ནས་ཟླ11ཚེས2ཉིན་བར་དུ། ཧྲན་ཏུང་ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཧྲིན་ཀྲང་གཞོན་པ་ཀྲང་ཧའེ་པོ་ཡིས་ཧྲན་ཏུང་ཞིང་ཆེན་གྱི་འཐུས་ཚབ་ཚོགས་པའི་སྣེ་ཁྲིད་དེ་མཚོ་སྔོན་དུ་ཡོང་ནས་མཚོ་སྔོན་གྱི་ཁ་གཏད་རོགས་སྐྱོར་བྱ་བར་རྟོག་ཞིབ་བྱས། ཞིང་ཆེན་ཏང་ཨུའི་རྒྱུན་ལས་ཨུ་ཡོན། རྒྱུན་ལས་ཧྲིན་ཀྲང་གཞོན་པ་ཝང་ལིན་ཧུའུ་ཡིས་འཐུས་ཚབ་ཚོགས་པ་དང་བཞུགས་མོལ་བྱས་ཤིང་། ཧྲིན་ཀྲང་གཞོན་པ་དབྱང་ཀྲི་ཝུན་གྱིས་མཉམ་དུ་རྟོག་ཞིབ་བྱས།

ཝང་ལིན་ཧུའུ་ཡིས་མཚོ་སྔོན་ཞིང་ཆེན་ཏང་ཨུ་དང་སྲིད་གཞུང་གི་ཚབ་བྱས་ཏེ་ཀྲང་ཧའེ་པོ་འཁོར་དང་བཅས་པ་མཚོ་སྔོན་དུ་རྟོག་ཞིབ་བྱེད་དུ་ཡོང་བར་དགའ་བསུ་བྱས་པ་དང་། ཧྲན་ཏུང་ཞིང་ཆེན་གྱིས་སྒེར་སེམས་མེད་པར་མཚོ་སྔོན་གྱི་འཕེལ་རྒྱས་ཐད་རོགས་རམ་བྱས་པར་བཀའ་དྲིན་ཆེ་ཞུས། ཝང་ལིན་ཧུའུ་ཡིས་བཤད་རྒྱུར། ཉེ་བའི་ལོ་འདི་འགར་ཞིང་ཆེན་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་བཏོན་པའི་བླང་བྱ་གལ་ཆེན་ནན་ཏན་གྱིས་ལག་བསྟར་དང་དངོས་འབེབས་བྱས་ཏེ། སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་། ཐོན་ལས་ཀྱི་གནས་བཞི་འཛུགས་སྐྲུན་བྱེད་པར་ནུས་ཤུགས་གཅིག་སྡུད་བྱས་ནས། སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་གཅིག་གྱུར་སྐུལ་འདེད་བཏང་ཡོད། ཧྲན་ཏུང་ཞིང་ཆེན་གྱི་ཐུགས་ཁུར་རྒྱབ་སྐྱོར་བྱས་འོག་མཚོ་བྱང་ཁུལ་གྱི་ལས་དོན་ཁག་སོ་སོས་གྲུབ་འབྲས་མངོན་གསལ་བླངས་ཡོད་པས། ཧྲན་ཏུང་ཞིང་ཆེན་གྱིས་སྔར་ལྟར་འཇོན་མིའི་རིག་ནུས་རོགས་སྐྱོར་སོགས་ཁ་གཏད་རོགས་སྐྱོར་བྱ་བ་གང་ལེགས་སྒྲུབ་པའི་རྨང་གཞིའི་སྟེང་། མཚོ་སྔོན་གྱིས་རྨ་ཆུའི་བཞུར་རྒྱུད་ཀྱི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་སོགས་ཁྱབ་ཁོངས་ཀྱི་བརྗེ་རེས་མཉམ་ལས་མུ་མཐུད་གཏིང་ཟབ་ཏུ་གཏོང་རྒྱུ་རེ་བ་བཅངས་ཡོད།

ཀྲང་ཧའེ་པོ་ཡིས་ཧྲན་ཏུང་ཞིང་ཆེན་གྱི་དཔལ་འབྱོར་སྤྱི་ཚོགས་འཕེལ་རྒྱས་དང་མཚོ་སྔོན་གྱི་ཁ་གཏད་རོགས་སྐྱོར་གནས་ཚུལ་མཚམས་སྦྱོར་མདོར་བསྡུས་བྱས་ཏེ། མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས། ཀྲང་ཧའེ་པོ་ཡིས་བཤད་རྒྱུར། ཉེ་བའི་ལོ་འདི་འགར་ཧྲན་ཏུང་ཞིང་ཆེན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གྱི་དགོངས་དོན་གལ་ཆེན་ནན་ཏན་གྱིས་ལག་བསྟར་དང་དངོས་འབེབས་བྱས་ཏེ། དཔལ་འབྱོར་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ཁྲོད་གྲུབ་འབྲས་གསར་པ་བླངས་ཡོད། ཧྲན་ཏུང་དང་མཚོ་སྔོན་གྱི་འབྲེལ་བ་ཆུ་བོ་བཞིན་རྒྱུན་རིང་སྟེ། རྨ་ཆུ་སྔོན་མོས་ཞིང་ཆེན་གཉིས་མཉམ་གཅིག་ཏུ་དམ་པོར་སྦྲེལ་ཞིང་། མཉམ་ལས་ཁྱབ་ཁོངས་དང་རོགས་སྐྱོར་གྲུབ་འབྲས་རྒྱུན་ཆད་མེད་པར་རྒྱ་བསྐྱེད་པ་དང་། མཚོ་སྔོན་བར་གྱི་མཛའ་བརྩེ་སྔར་ལས་གཏིང་ཟབ་ཏུ་བཏང་ནས། ཞིང་ཆེན་གཉིས་ཀྱི་འགྲོ་འོང་སྔར་ལས་དམ་ཟབ་ཏུ་གཏོང་བ་དང་། ཞིང་ཆེན་གཉིས་ཀྱི་མཉམ་ལས་བརྗེ་རེས་ཀྱི་རྣམ་པ་གསར་པ་མཉམ་བསྐྲུན་བྱ་རྒྱུའི་རེ་བ་བྱས་ཡོད།

འཐུས་ཚབ་ཚོགས་པས་མཚོ་བྱང་བོད་རིགས་རང་སྐྱོང་ཁུལ་དུ་ཧྲན་ཏུང་ཞིང་ཆེན་གྱི་ཁ་གཏད་རོགས་སྐྱོར་བྱ་བའི་ས་གནས་ཀྱི་ཐོན་ལས་འཕེལ་རྒྱས་དང་། དམངས་ཚིས་ལེགས་བཅོས་སོགས་ཀྱི་ལས་གཞི་འཛུགས་སྐྲུན་དང་འཁོར་སྐྱོད་གནས་ཚུལ་ལ་རྟོག་ཞིབ་བྱས་ཤིང་། ཧྲན་ཏུང་ཞིང་ཆེན་གྱི་མཚོ་སྔོན་ལ་རོགས་བྱེད་པའི་ལས་བྱེད་འཇོན་མིར་འཚམས་འདྲི་བྱས།