ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་སྐབས17པའི་དབང་སྐྱོན་ཨོ་རྩལ་འགྲན་ཚོགས་ཀྱི་ཀྲུང་གོའི་ལུས་རྩལ་འཐུས་མི་ཚོགས་པར་རྟེན་འབྲེལ་གློག་འཕྲིན་བཏང་བ།
ཀྲུང་གོའི་ལུས་རྩལ་འཐུས་མི་ཚོགས་པ་ལ།
དབྱར་དུས་ཀྱི་དབང་སྐྱོན་ཨོ་རྩལ་འགྲན་ཚོགས་སྐབས17པའི་ཐོག རང་རྒྱལ་གྱི་དབང་པོ་སྐྱོན་ཅན་གྱི་ལུས་རྩལ་པས་སྙིང་རུས་དང་དཔའ་ངར་ཆེན་པོས་བརྩོན་ལེན་བྱས་པ་དང་། ཉམས་འགྱུར་ཡོད་རྒུ་རྩལ་དུ་སྤྲུགས་ནས་གསེར་གྱི་རྟགས་མ94དང་དངུལ་གྱི་རྟགས་མ76། ཟངས་ཀྱི་རྟགས་མ50བཅས་ཀྱི་ཕུལ་བྱུང་གྲུབ་འབྲས་བླངས་ནས། འགྲན་བསྡུར་གྱི་གྲུབ་འབྲས་དང་བསམ་པའི་དཔལ་ཡོན་གཉིས་ཀར་གྲུབ་འབྲས་བཟང་པོ་ཐོབ་པ་མ་ཟད། མེས་རྒྱལ་དང་མི་དམངས་ལ་གཟི་བརྗིད་མཚན་སྙན་ཡང་བསྐྲུན་པ་རེད། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཁྱེད་རྣམ་པར་སྤྲོ་སེམས་འཁོལ་བའི་རྟེན་འབྲེལ་དང་བྱམས་བརྩེའི་འཚམས་འདྲི་ཞུས་པ་ཡིན།
སྐབས་འདིའི་དབང་པོ་སྐྱོན་ཅན་གྱི་ཨོ་རྩལ་འགྲན་ཚོགས་ཐོག་ཁྱེད་ཚོས་ཏང་དང་མི་དམངས་ཀྱི་མངགས་བཅོལ་ཡིད་ལ་བརྟན་པོར་བཅངས་ནས“འགན་འཁྲི་ཕྲག་ཏུ་ཡོད། ང་ཡིས་འབད་འཐབ་བྱེད”ཅེས་པའི་སྙིང་སྟོབས་དར་སྤེལ་བཏང་སྟེ། དཔའ་ངར་ཆེར་སྐྱེད་དང་ཞུམ་པ་མེད་པའི་སྤྱོད་ཚུལ། གཟེངས་སུ་ཐོན་པའི་མཚོན་ཚུལ་བཅས་ཀྱི་ཐོག་ནས་རང་རྒྱལ་གྱི་དབང་པོ་སྐྱོན་ཅན་ལུས་རྩལ་ལས་འགུལ་གྱི་མཐོ་ཚད་གསར་པ་གསལ་པོ་བཀོད་པ་དང་། དུས་རབས་གསར་པའི་རང་རྒྱལ་གྱི་དབང་པོ་སྐྱོན་ཅན་བྱ་གཞག་འཕེལ་རྒྱས་ཀྱི་གྲུབ་འབྲས་གསར་པ་མཚོན་པར་བྱས་ཡོད། ཁྱེད་ཚོས་ཀྲུང་ཧྭའི་ལུས་རྩལ་གྱི་སྙིང་སྟོབས་དང་དབང་པོ་སྐྱོན་ཅན་གྱི་ཨོ་རྩལ་འགྲན་ཚོགས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་ནས། རྩེར་སོན་ལ་འགྲན་སློང་དང་ཕུལ་བྱུང་དོན་གཉེར། གདེང་ཚོད་དང་སྤྲོ་སྣང་། སྒོ་འབྱེད་མཛའ་གྲོགས་བཅས་ཀྱི་ཐོག་ནས་འཛམ་གླིང་ཡོངས་ལ་ཀྲུང་གོའི་སྙིང་སྟོབས་དང་ཀྲུང་གོའི་སྣང་བརྙན་མངོན་པར་བྱས་ཡོད་ཅིང་། ཁྱེད་ཚོས་མེས་རྒྱལ་དང་མི་དམངས་ལ་རང་རློམ་དང་སྤོབས་པ་བསྩལ་ཡོད།
རེ་བར་ཁྱེད་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་རྒྱུན་འཁྱོངས་བྱས་ཏེ། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། དབང་སྐྱོན་ལུས་རྩལ་གྱི་གཟི་བརྗིད་སྲོལ་རྒྱུན་མུ་མཐུད་དུ་དར་སྤེལ་གཏོང་བ། ཡང་འབད་བསྐྱར་འབད་བྱེད་པ། གྲུབ་འབྲས་བཟང་པོ་གཏོད་པ་བཅས་བྱས་ཏེ། རྒྱ་ཆེའི་དབང་པོ་སྐྱོན་ཅན་རྣམས་ལ་བདེ་ཐང་སླར་གསོའི་ལུས་སྦྱོང་ཧུར་ཐག་བྱེད་པ་དང་། སྤྱང་གྲུང་དང་བློ་གྲོས་ཡོད་ཚད་བཏོན་ནས་མི་ཚེའི་ཕུགས་འདུན་མངོན་འགྱུར་བྱེད་དགོས་པའི་ལྕག་སྐུལ་གཏོང་བ་དང་། སྤྱི་ཚོགས་ཡོངས་ལ་རང་ལ་ཡིད་ཆེས་དང་དཔའ་ངར་ཆེན་པོས་མདུན་སྐྱོད་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་དུ་བསྒྱུར་བའི་འཕེལ་རིམ་ཁྲོད་མཉམ་དུ་བདེ་སྐྱིད་དང་མཛེས་སྡུག་ལྡན་པའི་འཚོ་བ་གསར་སྐྲུན་བྱ་དགོས་པའི་སྐུལ་མ་གཏོང་དགོས།
མེས་རྒྱལ་དང་མི་དམངས་ཀྱིས་ཁྱེད་ཚོ་བདེ་ཐང་ངང་ཕྱིར་ལོག་པར་རེ་སྒུག་བྱས་ཡོད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注