བརྩེ་སེམས་ཁུ་ནུར་སྦྲེལ་ཞིང་། བདེ་ཐང་ལམ་བུར་བསྐྱོད་ཅེས་པའི་སྨན་བཅོས་ཐད་ནས་མཚོ་སྔོན་ལ་རོགས་སྐྱོར་བྱེད་པའི་བྱ་འགུལ་དེ་ན་གོར་མོ་གྲོང་ཁྱེར་དུ་སྤེལ་མགོ་བརྩམས།

ཡོང་ཁུངས། གངས་ལྗོངས་མེ་ལོང་། རྩོམ་སྒྲིག་པ། ཀླུ་མགོན་རྒྱལ། 2024-09-05 10:23:29 ཀློག་གྲངས།2281

ཟླ8པའི་ཚེས30ཉིན། ཀྲུང་ཧྭའི་ཀྲུང་ལུགས་གསོ་རིག་སྨན་རྫས་སློབ་ཚོགས་དང་། མཚོ་སྔོན་ཞིང་ཆེན་མི་དམངས་སྲིད་གཞུང་གི་པེ་ཅིང་དུ་བཅའ་སྡོད་བྱེད་པའི་ལས་སྒྲུབ་ཁྲུའུ། ན་གོར་མོ་གྲོང་ཁྱེར་ཏང་ཨུ། ན་གོར་མོ་གྲོང་ཁྱེར་མི་དམངས་སྲིད་གཞུང་བཅས་ཀྱིས་མཉམ་འབྲེལ་སྒོས་གཙོ་སྒྲུབ་བྱས་པའི་བརྩེ་སེམས་ཁུ་ནུར་སྦྲེལ་ཞིང་བདེ་ཐང་ལམ་བུར་བསྐྱོད་ཅེས་པའི་སྨན་བཅོས་ཐད་ནས་མཚོ་སྔོན་ལ་རོགས་སྐྱོར་བྱེད་པའི་བྱ་འགུལ་དེ་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ན་གོར་མོ་གྲོང་ཁྱེར་དུ་སྤེལ་མགོ་བརྩམས།

ཉིན་དེར། སྨན་བཅོས་ཐད་ནས་མཚོ་སྔོན་ལ་རོགས་སྐྱོར་བྱེད་པའི་བྱ་འགུལ་ལ་ཞུགས་པའི་ལས་ཁུངས་སོ་སོའི་འཐུས་ཚབ་པ་དང་གསོ་རིག་ཆེད་མཁས་པས་ན་གོར་མོ་གྲོང་ཁྱེར་གདང་ལ་གྲོང་རྡལ་འབྲི་ཆུའི་མགོ་ཁུངས་སྡེ་བ་རུ་མགོ་རྩོམ་མཛད་སྒོ་སྤེལ་ཏེ། ཀྲུང་ལུགས་གསོ་རིག་དང་ཀྲུང་ནུབ་གསོ་རིག་དེ་མིག་ནད་ཚན་ཁག་དང་། རུས་ནད་ཚན་ཁག ཁོང་ནད་ཚན་ཁག་བཅས་དང་ཟུང་འབྲེལ་བྱས་ནས་གྲུབ་པའི་ཆེད་མཁས་པའི་ཚོགས་པས་ས་གནས་དེ་གའི་རིགས་སོ་སོའི་མང་ཚོགས་རྣམས་ལ་བརྟག་དཔྱད་ཞབས་ཞུ་འདོན་སྤྲོད་བྱས། དེ་དང་མཉམ་དུ། ཀྲུང་ཧྭའི་ཀྲུང་ལུགས་གསོ་རིག་སྨན་རྫས་སློབ་ཚོགས་ཀྱི་མིག་ནད་ཚན་ཁག་གི་ཆེད་མཁས་པས་ན་གོར་མོ་གྲོང་ཁྱེར་མི་དམངས་སྨན་ཁང་དུ་གྲོང་ཁྱེར་དེ་གའི་ཡོང་འབབ་དམའ་བའི་ཁྱིམ་ཚང་གི་ལིང་གྲིབ་ནད་པ་སུམ་ཅུར་རིན་མེད་སྒོས་ལིང་གྲིབ་སླར་མཐོང་གཤགས་བཅོས་བྱས།

རྒྱུས་ལོན་བྱས་པ་ལྟར་ན། ཐེངས་འདིའི་སྨན་བཅོས་ཐད་ནས་མཚོ་སྔོན་ལ་རོགས་སྐྱོར་བྱེད་པའི་བྱ་འགུལ་ཞུགས་པའི་ཆེད་མཁས་པའི་ཚོགས་པས་ཟླ8པའི་ཚེས30ཉིན་ནས་ཟླ9པའི་ཚེས1ཉིན་བར་ན་གོར་མོ་གྲོང་ཁྱེར་དུ་བརྟག་དཔྱད་དང་། ལིང་གྲིབ་རིན་མེད་གཤགས་བཅོས་བྱེད་པ། རིག་གཞུང་འཆད་ཁྲིད་སོགས་བྱ་བ་རབ་དང་རིམ་པ་བསྒྲུབ་རྒྱུ་རེད། ཐེངས་འདིའི་བྱ་འགུལ་གྱི་དམིགས་ཡུལ་ནི་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཀྱི་དགོངས་དོན་སྔར་ལས་ལག་བསྟར་གཏིང་ཟབ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་གཟིགས་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་ཅིང་། དངོས་དོན་གཉེར་བ་གཙོ་བོར་བཟུང་སྟེ། མང་ཚོགས་ཀྱི་དཀའ་ཁག་དང་ན་གོར་མོའི་སྨན་བཅོས་འཛུགས་སྐྲུན་གྱི་དངོས་ཡོད་གནད་དོན་ཐག་གཅོད་པར་གཞིགས་ནས། སྤུས་ལེགས་སྨན་བཅོས་ཐོན་ཁུངས་གཞི་རིམ་དུ་སྐྱེལ་བར་ནུས་ལྡན་སྒོས་སྐུལ་འདེད་གཏོང་བ་དང་། མང་ཚོགས་ཀྱི་སྨན་བཅོས་དགོས་མཁོ་བསྐངས་ཏེ་བདེ་ཐང་གི་ན་གོར་མོ་འཛུགས་སྐྲུན་བྱེད་པར་གཞོགས་འདེགས་བྱེད་རྒྱུ་དེ་ཡིན།