ཞི་ཅིན་ཕིང་ཨེ་རི་ཐི་ཡའི་ཙུང་ཐུང་དབྱི་ས་ཡ་སི་དང་ཐུག་འཕྲད་གནང་བ།
ཟླ9པའི་ཚེས2ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིན་མི་དམངས་ཚོགས་ཁང་ཆེན་མོ་རུ་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིན་རྩེ་གྲ་ཚོགས་འདུར་ཞུགས་པར་ཕེབས་པའི་ཨེ་རི་ཐི་ཡའི་ཙུང་ཐུང་དབྱི་ས་ཡ་སི་དང་ཐུག་འཕྲད་གནང་།
ཞི་ཅིན་ཕིང་གིས་བསྟན་དོན། ཀྲུང་ཨེའི་དབར་ཕྱི་འབྲེལ་གྱི་འབྲེལ་བ་བཙུགས་ནས་ལོ་ངོ30ལྷག་ཙམ་གྱི་རིང་ལ། ཐོག་མཐའ་བར་གསུམ་དུ་ཕན་ཚུན་ཡིད་ཆེས་དང་ཕན་ཚུན་རྒྱབ་སྐྱོར་ནུས་ལྡན་བྱས་ཡོད། ན་ནིང་གི་ཟླ5པར། སྐུ་ཞབས་ཙུང་ཐུང་གིས་ཀྲུང་གོར་རྒྱལ་དོན་འཚམས་འདྲི་གནང་བ་དང་ང་ཚོའི་དབར་བྱུང་བའི་ཐུན་མོང་གི་ངོས་འཛིན་གལ་ཆེན་ལ་དགེ་མཚན་ལྡན་པའི་འཕེལ་རྒྱས་བྱུང་ཡོད། ཀྲུང་གོའི་ཕྱོགས་ཀྱིས་ཨེ་རི་ཐི་ཡའི་ཕྱོགས་ཀྱིས་རང་བཙན་རང་བདག་གི་ཕྱི་འབྲེལ་སྲིད་ཇུས་ལག་བསྟར་མཐའ་འཁྱོངས་བྱེད་པ་དང་།རྒྱལ་ཁབ་ཀྱི་བདག་དབང་དང་རྩིས་ཐང་སྲུང་སྐྱོང་བརྟན་པོ་བྱེད་པ།འཐབ་ཇུས་ཀྱི་མཐོ་ཚད་དང་ཕུགས་ཀྱི་ཟུར་ཚད་ནས་ཀྲུང་ཨེ་འབྲེལ་བར་ལྟ་སྟངས་འཛིན་པ་བཅས་ལ་བསྔགས་བརྗོད་བྱེད་ཀྱི་ཡོད། ཨེ་རི་ཐི་ཡ་ཕྱོགས་དང་ཆབ་སྲིད་ཐད་ཕན་ཚུན་ཡིད་ཆེས་གཏིང་ཟབ་ཏུ་གཏོང་བ་དང་།དངོས་སྒྲུབ་མཉམ་ལས་ལ་སྐུལ་འདེད་བཏང་སྟེ་མཉམ་དུ་འཕེལ་རྒྱས་ཡོང་བ་མངོན་འགྱུར་བྱེད་འདོད་ཡོད།
ཞི་ཅིན་ཕིང་གིས་ནན་གྱིས་བསྟན་དོན། ཀྲུང་གོ་དང་ཨེ་རི་ཐི་ཡ་ཕྱོགས་གཉིས་པོས་བློ་སེམས་གཅིག་མཐུན་གྱི་སྤུན་ཟླ་བཟང་པོ་དང་།གཉིས་ཕན་མཉམ་རྒྱལ་གྱི་རོགས་ཟླ་བཟང་པོ།དྲང་གཞག་དྲང་བདེན་སྲུང་མཁན་གྱི་གྲོགས་པོ་བཟང་པོ་བཅས་བྱེད་དགོས། ཀྲུང་གོའི་ཕྱོགས་ཀྱིས་ཨེ་རི་ཐི་ཡའི་ཕྱོགས་དང་རིམ་པ་ཁག་གི་འགྲོ་འོང་དང་རྒྱལ་སྐྱོང་སྲིད་གཉེར་གྱི་ཉམས་མྱོང་སྤེལ་རེས་ལ་ཤུགས་བསྣན་ནས“རྒྱུད་གཅིག་ལམ་གཅིག”དང་།ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས། “གླིང་ཆེན་ཨ་ཧྥེ་རི་ཁའི་ཞི་བདེ་འཕེལ་རྒྱས་ཀྱི་བསམ་བཀོད”སོགས་ཀྱི་གྲོས་འགོ་དང་ལམ་སྲོལ་ལས་སྟེགས་བེད་སྤྱོད་ལེགས་པོ་བྱས་ཏེ། ནུས་ཁུངས་དང་རྨང་གཞིའི་སྒྲིག་བཀོད།ཞིང་ལས་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་བཏང་ནས། ཨེ་རི་ཐི་ཡ་ཕྱོགས་ཀྱི་བཟོ་ལས་ཅན་དང་ཞིང་ལས་དེང་རབས་ཅན་གྱི་འཕེལ་རིམ་ལ་རོགས་རམ་བྱེད་འདོད་ཡོད། ཀྲུང་གོ་དང་ཨེ་རི་ཐི་ཡ་གཉིས་ཀྱིས་རྒྱལ་སྤྱི་དང་ས་ཁུལ་གྱི་གནད་དོན་གལ་ཆེན་མང་པོའི་ཐད་བཟུང་བའི་ལྟ་ཚུལ་གཅིག་མཚུངས་ཡིན་པས། ཀྲུང་གོའི་ཕྱོགས་ཀྱིས་ཨེ་རི་ཐི་ཡ་ཕྱོགས་དང་མཐུན་སྦྱོར་གཞོགས་འདེགས་རྒྱུན་འཁྱོངས་བྱས་ནས། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ལུགས་མཐུན་ཁེ་དབང་སྲུང་སྐྱོང་སྔར་བས་ལེགས་པོ་བྱས་ཐོག སྔར་བས་དྲང་གཞག་ལུགས་མཐུན་གྱི་རྒྱལ་སྤྱིའི་སྒྲིག་ལམ་ལ་གཞོལ་འདོད་ཡོད།
དབྱི་ས་ཡ་སིས་བསྟན་དོན། ང་རང57ལོའི་གོང་ནས་ཀྲུང་གོར་འཚམས་འདྲིར་ཐེངས་དང་པོ་ཕེབས་པ་ཡིན།དུས་རབས་ཕྱེད་ཀ་ལྷག་གི་རིང་ལ་ཀྲུང་གོའི་རླབས་ཆེན་འཕེལ་རྒྱས་ཀྱི་གྲུབ་འབྲས་དང་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་དངོས་སུ་བདེན་དཔང་བྱས་ཡོད། ཀྲུང་གོས་རྒྱལ་སྤྱིའི་ཁྲོད་གནས་བབ་གལ་ཆེན་ཟིན་ཡོད་པར་མ་ཟད། ཉིན་རེ་བཞིན་གོ་ལ་ཧྲིལ་པོའི་བཅོས་སྐྱོང་འཕོ་འགྱུར་ལ་སྣེ་ཁྲིད་པའི་འགག་རྩའི་སྟོབས་ཤུགས་སུ་འགྱུར་བཞིན་ཡོད། ཨེ་ཀྲུང་དབར་གྱི་འབྲེལ་བའི་ལོ་རྒྱུས་གཏིང་ཟབ་པ་དང་།མཛའ་གྲོགས་བརྟན་ལ།མཉམ་ལས་ཡག་པོ་བཅས་ཡོད་པས་གནད་དོན་མང་པོའི་ཐད་ཕྱོགས་གཉིས་ཀར་ཐུན་མོང་གི་ངོས་ཟིན་ཆགས་ཡོད། ཀྲུང་གོ་དང་མཉམ་ལས་བྱས་ཏེ་མུ་མཐུད་དུ་གླིང་ཆེན་ཨ་ཧྥེ་རི་ཁའི་རྒྱལ་ཁབ་རྣམས་འཕེལ་རྒྱས་སྔར་ལས་ལེགས་པོ་ཡོང་བ་དང་།མི་སེར་སྤེལ་བའི་རིང་ལུགས་དང་བཙན་དབང་རིང་ལུགས་བཀག་འགོག་བྱས་ཏེ།རྒྱལ་སྤྱིའི་ཐོག་འདྲ་མཉམ་དང་རྩིས་ཐང་ཐོབ་པར་འབད་རྒྱུ་ཡིན། ཨེ་རི་ཐི་ཡ་ཕྱོགས་ཀྱིས་ཀྲུང་གོ་གཅིག་གི་སྲིད་ཇུས་བློ་བརྟན་འགྱུར་མེད་ངང་ལག་བསྟར་བྱེད་ཀྱི་ཡོད། ཨེ་རི་ཐི་ཡ་ཕྱོགས་ཀྱིས་ཀྲུང་གོ་ཕྱོགས་དང་ནུས་ཁུངས་དང་རྨང་གཞིའི་སྒྲིག་བཀོད།རྒྱ་མཚོ་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་གཏོང་རྒྱུའི་རེ་བ་བྱེད་ཀྱི་ཡོད། ཨ་ཧྥེ་རི་ཁ་དང་ཀྲུང་གོའི་མཉམ་ལས་ཀྱིས་རྒྱལ་སྤྱིས་ཨ་ཧྥེ་རི་ཁ་དང་མཉམ་ལས་བྱེད་པའི་ཐད་སྣེ་ཁྲིད་ཀྱི་ནུས་པ་གལ་ཆེན་ཐོན་ཡོད། ཨེ་རི་ཐི་ཡ་ཕྱོགས་ཀྱིས་ཐེངས་འདིའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་རྩེ་གྲ་ཚོགས་འདུ་བདེ་བླག་ཡོང་བ་དང་། གླིང་ཆེན་ཨ་ཧྥེ་རི་ཁའི་རྒྱལ་ཁབ་ཀྱིས་འགྲན་སློང་དང་དཀའ་ངལ་ཁྱད་བསད་བྱས་ཏེ་འཕེལ་རྒྱས་ཀྱི་གོ་སྐབས་དེ་བས་མང་པོ་བརྩོན་ལེན་བྱས་ཐོག བདེ་འཇགས་བརྟན་ལྷིང་དང་རྒྱུན་མཐུད་འཕེལ་རྒྱས་མངོན་འགྱུར་ཡོང་བ་བྱས་ཏེ་གླིང་ཆེན་ཨ་ཧྥེ་རི་ཁའི་མི་དམངས་ཡོངས་ལ་བདེ་སྐྱིད་བསྐྲུན་ཐུབ་པའི་སྨོན་འདུན་ཞུ།
རྩེ་གྲ་ཚོགས་འདུའི་སྐབས་སུ། ཀྲུང་ཨེ་ཕྱོགས་གཉིས་པོས་ཞིང་ལས་དང་རླུང་བརྙན་འཕྲིན་སོགས་ཁྱབ་ཁོངས་ཀྱི་ཕྱོགས་གཉིས་པོའི་མཉམ་ལས་ཡིག་ཆར་མིང་རྟགས་བཀོད།
ཝང་དབྱི་ཐུག་འཕྲད་ནང་ཞུགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注