ཨ་རི་དང་ཨུ་རུ་སུའི་འབྲེལ་བའི་ཐད་བཤད་དོན། 

ཟླ8པའི་ཚེས2ཉིན། ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས་གསར་འགོད་པའི་རྒྱུན་ལྡན་ཚོགས་འདུ་གཙོ་སྐྱོང་གནང་བ་རེད། གསར་འགོད་པ་ཞིག་གིས། ཨུ་རུ་སུས་ནུབ་ཕྱོགས་རྒྱལ་ཁབ་མང་པོ་དང་ཨ་རིའི་གསར་འགོད་པ་ཚུད་པའི་བཙོན་མ26བརྗེ་རེས་བྱས་ཡོད། ཀྲུང་གོ་ཕྱོགས་ཀྱིས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས་པ་རེད།

ལིན་ཅན་གྱིས། ང་ཚོས་འབྲེལ་ཡོད་གནས་འཕྲིན་སྤེལ་བར་དོ་སྣང་བྱུང་། ཨ་རི་དང་ཨུ་རུ་སུ་གཉིས་ཀ་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་དང་ཤུགས་རྐྱེན་ལྡན་པའི་རྒྱལ་ཁབ་ཆེན་པོ་ཞིག་རེད། ང་ཚོས་ཨ་རི་དང་ཨུ་རུ་སུས་འབྲེལ་གཏུག་དང་སྐད་ཆ་ཤོད་རེས་བྱས་པ་བརྒྱུད། ཕྱོགས་གཉིས་པོའི་འབྲེལ་བའི་ཁྲོད་ཀྱི་གནད་དོན་ཐག་གཅོད་བྱ་རྒྱུའི་རེ་བ་བྱེད་ཀྱི་ཡོད། དེ་ནི་རྒྱལ་སྤྱི་དང་ས་ཁུལ་གྱི་ཞི་བདེ་དང་བརྟན་བརླིང་ལ་ཕན་ཐོགས་ཡོད་ཅེས་བཤད།