པུའུ་ལིན་ཁུན་གྱིས་ཨ་མེ་རི་ཁས་ཀི་ལིན་ལན་གླིང་ཕྲན་བདག་བཟུང་བྱེད་པའི་གནས་ཚུལ་འབྱུང་མི་སྲིད་པའི་ཚུལ་བསྟན།

ཧྥ་རན་སི་རུ་འཚམས་འདྲི་བྱེད་བཞིན་པའི་ཨ་མེ་རི་ཁའི་རྒྱལ་སྲིད་བློན་ཆེན་པུའུ་ལིན་ཁུན་གྱིས་ཚེས8ཉིན་གྱི་ཕྱི་དྲོར་ཕཱ་རེ་སིའི་གསར་འགྱུར་སྒྲོག་སྤེལ་ཚོགས་འདུ་ཞིག་གི་སྟེང་བསྟན་དོན། ཨ་མེ་རི་ཁའི་ལས་འགན་ཁུར་བར་སྒུག་པའི་ཙུང་ཐུང་ཐི་ལིང་ཕུའུ་ཡིས་ཀི་ལིན་ལན་གླིང་ཕྲན་བདག་བཟུང་བྱེད་པར་བཤད་པའི་གནས་ཚུལ་དེ་འདྲ་འབྱུང་མི་སྲིད་ཟེར།

པུའུ་ལིན་ཁུན་གྱིས་སྨྱན་བྱད་ཀྱི་དྲི་བར་ལན་འདེབས་སྐབས་བཤད་རྒྱུར། ཐི་ལིང་ཕུའུ་ཡི་འབྲེལ་ཡོད་གཏམ་བཤད་དེ་ནི་གྲོས་གཞི་བཟང་བོ་ཞིག་མིན་པ་གསལ་བོ་ཡིན་པ་དང་། དེ་ལས་ཀྱང་གལ་ཆེ་བ་ནི་དེ་འདྲའི་གནས་ཚུལ་འབྱུང་མི་སྲིད་པ་མངོན་གསལ་རེད་ཟེར། པུའུ་ལིན་ཁུན་གྱིས་བསྟན་དོན། དུས་ཚོད་ཆུད་ཟོས་སུ་བཏང་ནས་དེར་གྲོས་མོལ་བྱེད་པའི་དགོས་པ་མེད་ཟེར།

ཐི་ལིང་ཕུའུ་ཡིས་ཚེས་བདུན་ཉིན་ཨ་མེ་རི་ཁའི་ཧྥོ་ལོ་ལི་ཏཱ་མངའ་སྡེའི་ཧེ་ཧུའུ་སྤྲོ་སྐྱིད་གླིང་ནས་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། ཨ་མེ་རི་ཁའི་དཔལ་འབྱོར་བདེ་འཇགས་ཀྱི་དགོས་མཁོར་བསམ་བློ་བཏང་སྟེ། ཁོས་དམག་དོན་དང་ཡང་ན་དཔལ་འབྱོར་བཙན་ཤེད་ཀྱི་ཐབས་ལ་བརྟེན་ནས་ཕཱ་ནཱ་མཱའི་ཡུར་ཀློང་དང་ཀི་ལིན་ལན་གླིང་ཕྲན་གྱི་བདག་འཛིན་དབང་ཆ་འཕྲོག་ལེན་བྱེད་ཀྱང་སྲིད་ཟེར།

ཀི་ལིན་ལན་གླིང་ཕྲན་དེ་མེ་གླིང་བྱང་མའི་བྱང་ཤར་ཕྱོགས་སུ་ཡོད་པ་དང་། འཛམ་གླིང་སྟེང་གི་ཆེས་ཆེ་བའི་གླིང་ཕྲན་ཡིན། ཀི་ལིན་ལན་གླིང་ཕྲན་ནི་ཏན་མག་གི་རང་སྐྱོང་མངའ་ཁོངས་ཡིན་པ་དང་། ཚད་མཐོའི་རང་སྐྱོང་དབང་ཆ་ཡོད་ལ། རྒྱལ་སྲུང་དང་ཕྱི་འབྲེལ་ལས་དོན་ལ་ཏན་མག་སྲིད་གཞུང་གིས་དོ་དམ་བྱེད་བཞིན་ཡོད། གླིང་ཕྲན་སྟེང་ཐོན་ཁུངས་དཀོན་པོའི་རིགས་ཕུན་སུམ་ཚོགས་པ་ཡོད།