ཨུ་རུ་སིའི་སཱ་ལཱ་ཐའོ་ཧྥུའུ་མངའ་སྡེ་ཡིས་འཇབ་རྒོལ་ཐེབས་པའི་ཨིན་ཀི་སི་གྲོང་ཁྱེར་ལ་བྲེལ་མྱུར་བྱེད་ཐབས་ལག་བསྟར་བྱས།

ཨུ་རུ་སིའི་སཱ་ལཱ་ཐའོ་ཧྥུའུ་མངའ་སྡེའི་མགོ་བ་པུའུ་སཱ་ཨར་ཅིན་གྱིས་ཚེས8ཉིན་དྲ་ཐོག་ཏུ་སྤེལ་བའི་གནས་ཚུལ་ལྟར་ན། མངའ་སྡེ་དེའི་ཨིན་ཀི་སི་གྲོང་ཁྱེར་ལ་ཝུའུ་ཁི་ལན་གྱི་མི་མེད་གནམ་གྲུའི་འཇབ་རྒོལ་ཐེབས་ནས་གཞི་རྒྱ་ཆེ་བའི་མེ་སྐྱོན་བྱུང་ཡོད་པར་དམིགས་ནས། ཨིན་ཀི་སི་གྲོང་ཁྱེར་ལ་བྲེལ་མྱུར་བྱེད་ཐབས་སྤྱད་པ་ཡིན་ཟེར།

པུའུ་སཱ་ཨར་ཅིན་གྱིས་བཤད་རྒྱུར། ཚེས8ཉིན་གྱི་ཞོགས་པར། མངའ་སྡེ་དེའི་སཱ་ལཱ་ཐའོ་ཧྥུའུ་གྲོང་ཁྱེར་དང་ཨིན་ཀི་སི་གྲོང་ཁྱེར་ལ་གཞི་རྒྱ་ཆེ་བའི་མི་མེད་གནམ་གྲུའི་འཇབ་རྒོལ་ཐེབས་ཏེ། ཨིན་ཀི་སི་གྲོང་ཁྱེར་གྱི་བཟོ་ལས་ཁེ་ལས་ཤིག་ལ་མེ་སྐྱོན་བྱུང་བ་དང་། ཨུ་རུ་སིའི་བྲེལ་མྱུར་གནས་ཚུལ་པུའུ་ཡི་མེ་གསོད་མི་སྣ་གཉིས་མེ་སྐྱོབ་བྱེད་སྐབས་རྐྱེན་ལམ་དུ་ཤོར་ཡོད་ལ། ཨུ་རུ་སིའི་འཛད་སྤྱོད་པའི་ཁེ་དབང་སྲུང་སྐྱོབ་དང་སྤྱི་ཕན་ལྟ་རྟོག་ཅུའུ་ཡི་ཆེད་མཁས་པ་གཅིག་ལ་རྨས་ཕོག་ནས་སྨན་ཁང་དུ་བསྡད་ཡོད་ཟེར།

སཱ་ལཱ་ཐའོ་ཧྥུའུ་མངའ་སྡེའི་འཕྲོད་བསྟེན་སྡེ་ཁག་གིས་བསྟན་དོན། རྨས་མའི་གནས་ཚུལ་ཅུང་ཚབས་ཆེན་ཡིན་པ་དང་། མེ་སྐྱོན་ལས་ཉེ་འདབས་ཀྱི་སྡོད་དམངས་ཐོག་ཁང་ལ་འཇིགས་ཉེན་བཟོས་ཡོད་ཟེར།

པུའུ་སཱ་ཨར་ཅིན་གྱིས་ད་རུང་བསྟན་དོན། ཨུ་རུ་སིའི་འཛད་སྤྱོད་པའི་ཁེ་དབང་ལ་སྲུང་སྐྱོབ་དང་སྤྱི་ཕན་ལྟ་རྟོག་ཅུའུ་ཡི་ཆེད་མཁས་པས་བསྟུད་མར་མེ་སྐྱོན་བྱུང་བའི་ས་ཁུལ་དང་ཉེ་འཁོར་གྱི་མཁའ་དབུགས་ལ་ཚད་འཇལ་བྱེད་བཞིན་ཡོད་ལ། མིག་སྔར་སྦགས་བཙོག་ཆེ་བའི་རྫས་ཚད་ལས་བརྒལ་བའི་སྣང་ཚུལ་མེད་ཟེར།

ཝུའུ་ཁི་ལན་གྱི་དྲག་ཆས་དམག་དཔུང་གི་སྤྱི་ཁྱབ་ཇུས་འདོན་པུའུ་ཡིས་ཚེས8ཉིན་གྱི་སྔ་དྲོར་དྲ་ཐོག་ཏུ་རྩོམ་ཡིག་སྤེལ་ནས། ཝུའུ་ཁི་ལན་གྱི་དམག་དཔུང་གིས་ཉིན་དེའི་ཞོགས་པར་ཨུ་རུ་སིའི་ཨིན་ཀི་སི་མཁའ་དམག་རྟེན་གཞིའི་འབར་རྫས་གསོག་འཇོག་སྒྲིག་ཆས་ལ་ཆམ་ཕབ་བཏང་བ་དང་། དམིགས་འབེན་ས་ཁོངས་སུ་འགས་གཏོར་གྱི་སྒྲ་ཐེངས་མང་གྲགས་ནས་མེ་སྐྱོན་བྱུང་། འཇབ་རྒོལ་ཐེབས་པའི་སྣུམ་མཛོད་དེས་ཨུ་རུ་སིའི་འཐབ་ཇུས་འགས་གཏོར་གནམ་གྲུར་སྣུམ་འདོན་སྤྲོད་བྱེད་བཞིན་ཡོད་པ་རེད་ཟེར།