དབྱི་ལིང་དང་དབྱི་རག་གི་མགོ་ཁྲིད་པས་ཕྱོགས་གཉིས་ཀྱི་འབྲེལ་བ་དང་ས་ཁུལ་གྱི་གནད་དོན་ཐད་ནས་གྲོས་བསྡུར་བྱས།

དབྱི་ལིང་གི་ཙུང་ཐུང་ཕའེ་ཙེ་ཞི་ཆི་དབྱང་གིས་ཚེས8ཉིན་རྒྱལ་ས་ཏི་ཧེ་ལན་ནས་འཚམས་འདྲིར་ཡོང་བའི་དབྱི་རག་གི་ཙུང་ལི་སུའུ་ཏཱ་ནེ་ལ་ཐུག་འཕྲད་བྱས་པ་དང་། ཕྱོགས་གཉིས་ཀྱི་འབྲེལ་བ་དང་ས་ཁུལ་གྱི་གནད་དོན་གཙོ་བོ་སོགས་ལ་གྲོས་བསྡུར་བྱས་པར་མ་ཟད། སི་རི་ཡཱའི་གནད་དོན་ཐད་ལ་ཐུན་མོང་དུ་སེམས་ཁུར་བྱེད་བཞིན་ཡོད་པའི་ཚུལ་བསྟན།

དབྱི་ལིང་གི་ཙུང་ཐུང་བཞུགས་ཤག་གིས་ཚེས8ཉིན་སྤེལ་བའི་གསལ་སྒྲོག་ལྟར་ན། ཕའེ་ཙེ་ཞི་ཆི་དབྱང་གིས་སུའུ་ཏཱ་ནེ་དང་གྲོས་མོལ་བྱས་རྗེས་བསྡུས་པའི་མཉམ་འབྲེལ་གྱི་གསར་འགོད་པའི་སྣེ་ལེན་ཚོགས་འདུའི་སྟེང་བསྟན་དོན། དབྱི་ལིང་དང་དབྱི་རག་གིས་སི་རི་ཡཱའི་གནད་དོན་ཐད་མཉམ་དུ་སེམས་ཁུར་བྱེད་བཞིན་ཡོད་ལ། དེའི་ནང་སི་རི་ཡཱའི་གནས་བབ་གཏན་འཇགས་ཡོང་བར་ཁག་ཐེག་དང་། སི་རི་ཡཱའི་མངའ་ཁོངས་ཆ་ཚང་ཡོང་བར་སྲུང་སྐྱོབ་བྱས་ཏེ། སི་རི་ཡཱའི་མངའ་ཁོངས་ཀྱི་འཇིགས་སྐུལ་རྩ་འཛུགས་ལ་ཆམ་ཕབ་གཏོང་སོགས་འདུས་ཡོད་ཟེར།

ཕའེ་ཙེ་ཞི་ཆི་དབྱང་གིས་བཤད་རྒྱུར། དབྱི་ལིང་དང་དབྱི་རག་གི་འབྲེལ་བ་དེ་ཆེས་མཐོའི་ཆུ་ཚད་དུ་གནས་ཡོད་པ་དང་། ཕྱོགས་གཉིས་ཀྱི་མཉམ་ལས་ཁྱབ་ཁོངས་དང་རིམ་པ་རྒྱུན་ཆད་མེད་པར་རྒྱ་བསྐྱེད་བཞིན་ཡོད་ལ། སུའུ་ཏཱ་ནེ་ཡི་ཐེངས་འདིའི་འཚམས་འདྲི་ལས་ཕན་ཚུན་བར་གྱི་ཡིད་ཆེས་ཇེ་དྲག་ཏུ་སོང་ནས། ཕྱོགས་གཉིས་ཀྱི་མཉམ་ལས་ལ་སྔར་ལས་འཕེལ་རྒྱས་འབྱུང་བར་སྐུལ་འདེད་གཏོང་ཐུབ་པའི་རེ་བ་ཡོད་ཟེར།

སུའུ་ཏཱ་ནེ་ཡིས་བསྟན་དོན། ས་ཁུལ་གྱི་གནད་དོན་ཐག་གཅོད་བྱེད་པའི་ཐབས་ལམ་ཉག་ཅིག་ནི་ཕཱ་ལེ་སི་ཐན་དང་དབྱི་སི་རལ་གྱི་འཁྲུག་རྩོད་མཇུག་སྒྲིལ་བ་དང་། ཕཱ་ལེ་སི་ཐན་མི་དམངས་ཀྱི་ཁེ་ཕན་ལ་འགན་སྲུང་བྱེད་རྒྱུ་དེ་ཡིན་ཟེར།

གཞན་ཡང་དབྱི་ལིང་དབྱི་སི་ལན་སྤྱི་མཐུན་རྒྱལ་ཁབ་ཀྱི་རྒྱང་སྒྲོག་བརྙན་འཕྲིན་ཁང་གིས་བསྒྲགས་པ་ལྟར་ན། དབྱི་ལིང་གི་ཆེས་མཐོའི་མགོ་ཁྲིད་པ་ཧཱ་མཱེ་ནེ་དབྱེ་ཡིས་ཉིན་དེར་སུའུ་ཏཱ་ནེ་དང་གྲོས་མོལ་བྱས། ཧཱ་མཱེ་ནེ་དབྱེ་ཡིས་བསྟན་དོན། དབྱི་རག་གི་གཏན་འཇགས་དང་འཕེལ་རྒྱས་དེ་དབྱི་རག་གི་ཁེ་ཕན་དང་འཚམས། ཨ་མེ་རི་ཁའི་དམག་དཔུང་དབྱི་རག་ཏུ་བཅའ་སྡོད་བྱེད་པ་ཁྲིམས་འགལ་ཡིན་ལ། དབྱི་རག་མི་དམངས་དང་སྲིད་གཞུང་གི་ཁེ་ཕན་དང་རྒྱབ་འགལ་དུ་སོང་ཡོད་པ་དང་། ཨ་མེ་རི་ཁའི་དབྱི་རག་གི་བཅའ་སྡོད་དམག་དཔུང་རྒྱ་བསྐྱེད་རྩིས་ཡོད་པས་ངེས་པར་དུ་མཐའ་གཅིག་ཏུ་ངོ་རྒོལ་བྱེད་དགོས་ཟེར།