དབྱིན་ཞི་ཡུའེ་འཛིན་བཟུང་བྱེད་པར་བཀག་འགོག་ཐེབས་ནས་ཧན་གོའི་ཆབ་སྲིད་ཀྱི་གཡོ་འགུལ་ཐག་གཅོད་དཀའ་བར་གྱུར།

ཚེས3ཉིན། ཧན་གོའི་མཐོ་རིམ་གཞུང་ཞབས་མི་སྣའི་ཉེས་གསོག་བརྟག་དཔྱད་ཁྲུའུ(སྤྱིའི་འདུམ་སྒྲིག་ཁྲུའུ)ཡིས་ལས་གནས་མཚམས་འཇོག་བྱས་པའི་ཙུང་ཐུང་དབྱིན་ཞི་ཡུའེ་འཛིན་བཟུང་བཀའ་རྒྱ་ལག་བསྟར་བྱས་ཀྱང་ཙུང་ཐུང་ཉེན་སྲུང་ཁྲུའུ་ཡིས་བཀག་འགོག་བྱས་པ་རེད། དུས་ཚོད་ཁ་ཤས་ཀྱི་རིང་ལ་ཁ་གཏད་བཀག་འགོག་བྱས་པ་བརྒྱུད། སྤྱི་འདུམ་ཁྲུའུ་ཡིས་འགུལ་སྐྱོད་ལ་ཕམ་ཁ་བྱུང་བ་ཁྱབ་བསྒྲགས་བྱས་ནས་འཛིན་བཟུང་བཀའ་རྒྱ་ལག་བསྟར་བྱེད་མཚམས་བཞག་པ་རེད།

དབྱེ་ཞིབ་མི་སྣས་བསྟན་དོན། དོན་རྐྱེན་དེ་ལས་མིག་སྔའི་ཧན་གོའི་ཆབ་སྲིད་དང་བཅའ་ཁྲིམས་ཀྱི་ལམ་ལུགས་འོགསྤྱི་པའི་མཐུན་སྦྱོར་ཁྲུའུ་ཡིས་འགུལ་སྐྱོད་སྤེལ་བར་འཕྲད་པའི་དངོས་ཡོད་ཀྱི་དཀའ་ངལ་མཚོན་གྱི་ཡོད་ཅེས་བཤད། དབྱིན་ཞི་ཡུའེ་ཡི་ནག་ཉེས་ཐེར་འདོན་དང་འཛིན་བཟུང་བཀའ་རྒྱའི་གནད་དོན་ཐད་ཧན་གོའི་སྲིད་དབང་དང་མི་དམངས་ཀྱི་འགྲན་རྒོལ་ཛ་དྲག་ཏུ་ཕྱིན་པ་དང་དམངས་འདོད་ཁ་ཐོར་དུ་ཕྱིན་པས། ཧན་གོའི་ཆབ་སྲིད་ཀྱི་གཡོ་འགུལ་དུས་ཡུན་ཐུང་ངུའི་ནང་ཐག་གཅོད་བྱེད་དཀའ་བར་གྱུར།

ཚེས3ཉིན་གྱི་སྔ་དྲོ། སྤྱི་འདུམ་ཁྲུའུ་དང་ཉེན་རྟོག་ཕྱོགས་ཀྱི་མི་སྣ་ཧྲོ་ཨར་ལུང་ཧྲན་ས་ཁུལ་ཧན་ནན་ཏུང་དུ་ཡོད་པའི་ཙུང་ཐུང་གི་བཞུགས་སྒར་དུ་སོང་ནས། ལས་གནས་མཚམས་འཇོག་བྱས་ཡོད་པའི་ཙུང་ཐུང་དབྱིན་ཞི་ཡུའེ་འཛིན་བཟུང་བྱ་རྒྱུའི་འཆར་གཞི་ཡོད་པ་རེད། ཙུང་ཐུང་བཞུགས་སྒར་གྱི་ཐོག་ཁང་མདུན་གྱི་སྨི200ཙམ་གྱི་སར་སླེབས་སྐབས། དམག་མི་དང་ཉེན་སྲུང་ཁྲུའུ་ཡི་མི་སྣ200ལྷག་ཙམ་གྱིས་བཀག་འགོག་བྱས་ནས་ཕྱོགས་གཉིས་ཀྱི་བར་གདོང་ཐུག་ཕྲན་ཙམ་བྱུང་བ་རེད། བརྟག་དཔྱད་མི་སྣས་ཙུང་ཐུང་བཞུགས་སྒར་གྱི་ཐོག་ཁང་མདུན་དུ་ཙུང་ཐུང་གི་ཉེན་སྲུང་ཁྲུའུ་ཀྲང་ལ་འཛིན་བཟུང་བཀའ་རྒྱ་བསྟན་མོད། འོན་ཀྱང་ཙུང་ཐུང་ཉེན་སྲུང་ཁྲུའུ་ཀྲང་གིས《ཙུང་ཐུང་ཉེན་སྲུང་བཅའ་ཁྲིམས》གཞིར་བཟུང་ནས་སྔོག་བཤེར་བྱེད་མི་ཆོག”ཅེས་བཤད་པ་རེད། དུས་ཚོད་ཁ་ཤས་རིང་ཁ་གཏད་དུ་ལངས་ནས་བསྡད་རྗེས།སྤྱི་འདུམ་ཁྲུའུ་ཡིས་འཛིན་བཟུང་བྱེད་མཚམས་བཞག་ནས་ཙུང་ཐུང་གི་བཞུགས་སྒར་ནས་ཕྱིར་འཐེན་བྱེད་རྒྱུ་ཁྱབ་བསྒྲགས་བྱས།

ཟླ1པོའི་ཚེས3ཉིན་གྱི་སྔ་དྲོ། ཧན་གོའི་མཐོ་རིམ་གཞུང་ཞབས་མི་སྣའི་ཉེས་གསོག་བརྟག་དཔྱད་ཁྲུའུ་དང་ཉེན་རྟོག་ཕྱོགས་ཀྱི་མི་སྣ་ཧྲོ་ཨར་ལུང་ཧྲན་ས་ཁུལ་ཧན་ནན་ཏུང་གི་ཙུང་ཐུང་བཞུགས་སྒར་གྱི་སྒོ་ཆེན་ཁར་ཐོན་པ།

འཛིན་བཟུང་འགུལ་སྐྱོད་ཕམ་རྗེས་ཧན་གོའི་ཉེན་རྟོག་ཐིང་དང་། སྤྱི་འདུམ་ཁྲུའུ། རྒྱལ་སྲུང་པུའུ་བཅས་ཀྱིས་མཉམ་འབྲེལ་གྱིས་བཙུགས་པའི་ཧན་གོའི“ཐུན་མོང་བརྟག་དཔྱད་པུའུ”ཡིས་བསྟན་དོན། མིག་སྔའི་གནས་ཚུལ་ལྟར་ན། གལ་ཏེ་ཙུང་ཐུང་ཉེན་སྲུང་ཁྲུའུ་ཡིས་མུ་མཐུད་དུ་དེ་ལྟར་གཞོགས་འདེགས་མ་བྱས་ཚེ་དོན་དངོས་ཐོག་འཛིན་བཟུང་བཀའ་རྒྱ་ལག་བསྟར་བྱེད་མི་ཐུབ་ཅེས་བཤད་པ་རེད།

2024ལོའི་ཟླ12པའི་ཚེས31ཉིན། ཧན་གོའི་ཧྲོ་ཨར་ནུབ་རྒྱུད་ས་གནས་ཁྲིམས་ཁང་གིས་ནང་འཁྲུག་བསླངས་པ་དང་འགན་དབང་གང་བྱུང་དུ་སྤྱད་པའི་དོགས་གཞི་ཡོད་པ་རྒྱུ་མཚན་དུ་བྱས་ནས་དབྱིན་ཞི་ཡུའེ་འཛིན་བཟུང་བྱེད་པའི་བཀའ་རྒྱ་ཁྱབ་བསྒྲགས་བྱས་པ་རེད། དེ་ནི་ཧན་གོའི་ལོ་རྒྱུས་སྟེང་ཙུང་ཐུང་ལ་འཛིན་བཟུང་བཀའ་རྒྱ་བཏང་བ་ཐེངས་དང་པོ་རེད། དབྱིན་ཞི་ཡུའེ་ཕྱོགས་ཀྱི་ཁྲིམས་རྩོད་ཚོགས་པས་བསྟན་དོན། ནང་འཁྲུག་ཉེས་གསོག་ལ་བརྟག་དཔྱད་བྱེད་པའི་དབང་ཆ་མེད་པའི་བརྟག་དཔྱད་ལས་ཁུངས་ཀྱིས་ཆོག་མཆན་སྤྲོད་པའི་རེ་ཞུ་བྱས་པའི་འཛིན་བཟུང་བཀའ་རྒྱ་དང་བཙན་ཉར་སྔོག་བཤེར་བཀའ་རྒྱ་ནི་ཁྲིམས་འགལ་དང་ནུས་པ་མེད་པ་ཞིག་རེད་ཅེས་བཤད།

དེ་སྔོན“ཐུན་མོང་བརྟག་དཔྱད་པུའུ”ཡིས་ནང་འཁྲུག་དང་འགན་དབང་གང་བྱུང་དུ་སྤྱད་པའི་དོགས་པ་ཡོད་པ་རྒྱུ་མཚན་དུ་བྱས་ནས། དབྱིན་ཞི་ཡུའེ་ཡིས་བརྟག་དཔྱད་དང་ལེན་བྱེད་དགོས་པའི་རེ་བ་ཐེངས་གསུམ་ལ་བཏོན་མོད། འོན་ཀྱང་དབྱིན་ཞི་ཡུའེ་ཡིས་དང་ལེན་བྱས་མེད། དབྱེ་ཞིབ་མི་སྣས་བསྟན་དོན། ཞིབ་དཔྱོད་དཔོན་གྱི་བྱ་བ་སྒྲུབ་མཁན་ཡིན་པའི་དབྱིན་ཞི་ཡུའེ་ལ་མཚོན་ན། བཅའ་ཁྲིམས་ཀྱི་འཐུས་ཤོར་རང་བཞིན་ལ་རྒྱུས་མངའ་གསལ་བོ་ཡོད་པས་བཅའ་ཁྲིམས་ལས་གཡོལ་ཐབས་བྱེད་བཞིན་པར་ངོས་འཛིན་བྱེད་ཀྱི་ཡོད་ཟེར།

འཛིན་བཟུང་བཀའ་རྒྱའི་གོ་ཆོད་དུས་ཡུན་ཟླ་འདིའི་ཚེས6ཉིན་མཚམས་བཞག་པ་རེད། སྤྱི་འདུམ་ཁྲུའུ་ཡིས་འཛིན་བཟུང་བྱེད་མཚམས་བཞག་པ་དང་ཙུང་ཐུང་གི་བཞུགས་སྒར་ནས་ཕྱིར་འཐེན་བྱེད་སྐབས། མིག་སྔར་འཛིན་བཟུང་བཀའ་རྒྱ་སླར་ཡང་ལག་བསྟར་བྱེད་མིན་གཏན་འཁེལ་བྱེད་དཀའ་ཞེས་བཤད་པ་རེད།

ཟླ1པོའི་ཚེས3ཉིན།  དབྱིན་ཞི་ཡུའེ་ལ་རྒྱབ་སྐྱོར་བྱེད་མཁན་རྣམས་ཧྲོ་ཨར་ལུང་ཧྲན་ས་ཁུལ་ཧན་ནན་ཏུང་གི་ཙུང་ཐུང་བཞུགས་སྒར་ཉེ་འགྲམ་དུ་འདུ་ཚོགས་བྱེད་བཞིན་ཡོད་པ་དང་། ཉེན་རྟོག་པས་འདུ་ཚོགས་ཀྱི་ཉེ་འགྲམ་དུ་ལས་འགན་སྒྲུབ་བཞིན་པ།

ཧན་གོའི་མཉམ་འབྲེལ་གསར་འགྱུར་ཁང་གིས་ཁྲིམས་ལུགས་ལས་རིགས་ཀྱི་གནས་ཚུལ་དྲངས་ནས་བཤད་རྒྱུར། སྤྱི་འདུམ་ཁྲུའུ་ཡིས་ཉེན་རྟོག་ཕྱོགས་དང་གྲོས་མོལ་བྱས་རྗེས། ཚེས6ཉིན་བར་གྱི་འཛིན་བཟུང་བཀའ་རྒྱའི་གོ་ཆོད་དུས་ཡུན་མ་ཐོན་གོང་། འཛིན་བཟུང་བཀའ་རྒྱ་སླར་ཡང་ལག་བསྟར་བྱེད་པར་ཚོད་ལྟ་བྱ་རྒྱུའི་འཆར་གཞི་ཡོད་པ་རེད། འོན་ཀྱང་དབྱེ་ཞིབ་བྱས་ནས་བསྟན་དོན། གལ་ཏེ་ལག་བསྟར་འགུལ་སྐྱོད་སླར་ཡང་ཕམ་ཉེས་བྱུང་ཚེ། སྤྱི་འདུམ་ཁྲུའུ་ལ་གླེང་ཕྱོགས་ཀྱི་གནོན་ཤུགས་དེ་ལས་མང་པོ་འབྱུང་རྒྱུ་རེད། དེར་བརྟེན། སྤྱི་འདུམ་ཁྲུའུ་ཡིས་ཉིན6གི་གོ་ཆོད་དུས་ཡུན་འདས་རྗེས་འཛིན་བཟུང་བཀའ་རྒྱ་བསྐྱར་དུ་སྤྲོད་རྒྱུའི་རེ་ཞུ་བྱེད་སྲིད་པར་མ་ཟད། ཁ་གཏད་གཅོག་པའི་ཇུས་གཞི་སྣ་ཚོགས་ལ་ཕྱོགས་བསྡུས་དཔྱད་དཔོག་བྱས་རྗེས་ལག་བསྟར་དུས་ཚོད་གཟབ་ནན་ངང་ཐག་གཅོད་བྱེད་སྲིད་ཟེར།

ཐོག་མར་འཛིན་བཟུང་བྱེད་པའི་འགུལ་སྐྱོད་ཕམ་རྗེས། “ཐུན་མོང་བརྟག་དཔྱད་པུའུ”ཡིས་དམིགས་བསལ་གྱི་གཞུང་དོན་ལག་བསྟར་བྱེད་པར་འགོག་རྐྱེན་བཟོ་བའི་དོགས་གཞི་ཡོད་པ་རྒྱུ་མཚན་དུ་བྱས་ནས། ཉེན་སྲུང་ཁྲུའུ་ཡི་འབྲེལ་ཡོད་མི་སྣར་གྱོད་དོན་ཐོ་འགོད་བྱས་ནས་ཉེན་སྲུང་ཁྲུའུ་ཀྲང་དང་ཉེན་སྲུང་ཀྲང་གཞོན་པས་ཚེས4ཉིན་བརྟག་དཔྱད་དང་ལེན་བྱེད་དགོས་པའི་རེ་བ་བཏོན་ཡོད་ཅེས་བཤད། སྤྱི་འདུམ་ཁྲུའུ་ཡིས་ཀྱང་ཉེན་སྲུང་ཁྲུའུ་ཡི་བཀོད་འདོམས་ལྟ་སྐུལ་བྱེད་མཁན་ཙུང་ཐུང་གི་འགན་དབང་ཚབ་བྱེད་མཁན་ཚུའེ་ཞང་མུའུ་ཡིས་ཉེན་སྲུང་ཁྲུའུ་ལ་དབྱིན་ཞི་ཡུའེ་འཛིན་བཟུང་བཀའ་རྒྱ་ལག་བསྟར་བྱེད་པར་གཞོགས་འདེགས་བྱ་རྒྱུའི་བཀའ་གཏོང་དགོས་པའི་རེ་བ་དྲག་པོ་འདོན་རྒྱུ་ཡིན་ཞེས་བཤད།

དབྱེ་ཞིབ་མི་སྣས་རྣམ་འགྱུར་དེ་དག་ཚང་མ་སླར་ཡང་འཛིན་བཟུང་བྱ་རྒྱུར་རྨང་གཞི་བཏིང་ཡོད་པ་ཞིག་རེད། འོན་ཀྱང་རྩོད་གཞི་ཕྱོགས་གཉིས་ཀྱིས་མཁྲེགས་བཟུང་བྱེད་པའི་གནས་ཚུལ་འོགདབང་ཆའི་རྨང་གཞི་ཞན་པའི་ཙུང་ཐུང་ལས་ཚབ་ཡིན་ནའང་འདྲ། ཡང་ན་གནས་བབ་སྡུག་པོ་ཡིན་པའི་ཙུང་ཐུང་བཞུགས་ཤག་ཡིན་ནའང་འདྲ། ཚང་མས་སྤྱི་པའི་འདུམ་འགྲིག་གི་རེ་བ་ལྟར་རོགས་རམ་བྱེད་དཀའ་སྲིད་པར་འདོད།

ཧན་གོའི་རྩ་ཁྲིམས་ཁྲིམས་ཁང་གིས་དབྱིན་ཞི་ཡུའེ་ཡི་ནག་ཉེས་ཐེར་འདོན་བྱས་པའི་གྱོད་གཞིའི་འདྲི་གཅོད་མྱུར་ཚད་ཇེ་མགྱོགས་སུ་གཏོང་བཞིན་ཡོད། ཧན་ལན་གསར་འགྱུར་ཁང་གིས་སྤེལ་བའི་གནས་ཚུལ་ལྟར་ན། རྩ་ཁྲིམས་ཁྲིམས་ཁང་གིས་དེ་རྗེས་ཀྱི་ཁྲིམས་སའི་རྩོད་གླེང་དུས་ཚོད་ཐེངས་ལྔ་གཏན་འཁེལ་བྱས་པ་དང་ཉིན་རེའི་ལས་རིམ་ཚགས་དམ་པོ་ཡོད་པ་རེད། དབྱེ་ཞིབ་ལ་ལས་བསྟན་དོན། ཙུང་ཐུང་གི་སྐྱོན་འདོན་ཞུ་གཏུག་གྱོད་གཞི་ལས་བྱུང་བའི་ཆབ་སྲིད་ཟང་ཟིང་སོགས་ལྡོག་ཕྱོགས་ཀྱི་ཤུགས་རྐྱེན་ལ་བསམ་གཞིག་བཏང་ནས། རྩ་ཁྲིམས་ཁྲིམས་ཁང་གིས་མགྱོགས་མྱུར་ངང་གྱོད་གཞི་ཞིབ་གཅོད་གང་ཐུབ་བྱེད་བཞིན་ཡོད་པ་རེད།

དབྱིན་ཞི་ཡུའེ་འགྲོ་སྡོད་ལ་དམིགས་ནས་ཧན་གོའི་དམངས་ཀྱི་འདོད་བློར་སྣེ་གཉིས་ཅན་གྱི་འཕེལ་ཕྱོགས་མངོན་བཞིན་ཡོད་པ་སྟེ། ཕྱོགས་གཅིག་ནས་ཧན་གོའི་ཉེ་དུས་ཀྱི་དམངས་འདོད་བརྟག་དཔྱད་ལས་མངོན་པར། བཅར་འདྲི་དང་ལེན་བྱེད་མཁན་བཅུ་ཆའི་བདུན་ལྷག་ཙམ་གྱིས་དབྱིན་ཞི་ཡུའེ་ཡི་ནག་ཉེས་ཐེར་འདོན་བྱ་རྒྱུར་རྒྱབ་སྐྱོར་བྱེད་ཀྱི་ཡོད་པ་དང་། ཕྱོགས་གཞན་ཞིག་ནས་དབྱིན་ཞི་ཡུའེ་ལ་རྒྱབ་སྐྱོར་བྱེད་ཤུགས་རིམ་བཞིན་ཆེ་རུ་འགྲོ་བཞིན་ཡོད་པ་རེད།

2024ལོའི་ཟླ12པའི་ཚེས14ཉིན།ཧན་གོའི་རྒྱལ་ས་ཧྲོ་ཨར་དུ་མི་དམངས་ཀྱིས་རྒྱལ་ཚོགས་ཕྱི་རོལ་དུ་ཙུང་ཐུང་དབྱིན་ཞི་ཡུའེ་ཡི་ནག་ཉེས་ཐེར་འདོན་བྱེད་པར་རེ་བ་འདོན་བཞིན་པ།

  དབྱིན་ཞི་ཡུའེ་འཛིན་བཟུང་བཀའ་རྒྱ་སྤྲད་རྗེས། དབྱིན་ཞི་ཡུའེ་ལ་རྒྱབ་སྐྱོར་དང་ངོ་རྒོལ་བྱེད་པའི་ཧན་གོའི་དམངས་ཚོགས་ཙུང་ཐུང་གི་བཞུགས་སྒར་ཉེ་འགྲམ་དུ་འཛོམས་ནས་རྒོལ་གཏམ་དང་རྔམ་སྟོན་བྱས་པ་དང་། ཕྱོགས་གཉིས་ཁྲོམ་གཞུང་ནས་ཁ་གཏད་དུ་ལངས་རེས་བྱས་པ་རེད། ཧན་གོའི་སྨྱན་བྱད་ཀྱིས་སྤེལ་བའི་གནས་ཚུལ་ལྟར་ན།སྤྱི་འདུམ་ཁྲུའུ་ཡིས་འཛིན་བཟུང་འགུལ་སྐྱོད་སྤེལ་བའི་ཉིན་དེར་དབྱིན་ཞི་ཡུའེ་ལ་རྒྱབ་སྐྱོར་བྱེད་མཁན་མང་ཚོགས་ཁྲི1ལྷག་ཙམ་ཡུལ་དངོས་སུ་ཡོང་ཡོད་པ་རེད། དབྱིན་ཞི་ཡུའེ་ལ་ངོ་རྒོལ་བྱེད་པའི་མང་ཚོགས་ཀྱང་ཙུང་ཐུང་གི་བཞུགས་སྒར་དང་ཐག་ཉེ་བའི་ས་འོག་ལྕགས་ལམ་ས་ཚིགས་སུ་འདུ་འཛོམས་བྱས་ནས་དབྱིན་ཞི་ཡུའེ་འཛིན་བཟུང་བྱེད་པར་རེ་བ་འདོན་བཞིན་ཡོད་པ་རེད།

མང་ཚོགས་ལས་གཞན། ཁྲའོ་ཡའེ་ཏང་གཉིས་ཀྱང་ཁ་གཏད་དུ་ལངས། ཧན་གོའི་སྲིད་སྐྱོང་ཏང་རྒྱལ་དམངས་སྟོབས་ཤུགས་ཏང་འཕྲལ་བསྟུན་ཐབས་ཇུས་ཨུ་ཡོན་ལྷན་ཁང་གི་ཨུ་ཡོན་ཀྲང་ཆོན་ཉིང་ཧྲི་ཡིས་སྤྱི་འདུམ་ཁྲུའུ་ཡིས་ཙུང་ཐུང་ལ་འཛིན་བཟུང་བཀའ་རྒྱ་ལག་བསྟར་བྱས་པ་ནི“ཧ་ཅང་དྲང་གཞག་མིན་པའི་དབང་ཆ་ལས་བརྒལ་བ་དང་ཚུལ་མིན་གྱི་བྱ་སྤྱོད”ཅིག་ཡིན་ལ།“སྤྱི་འདུམ་ཁྲུའུ་ལ་ཁྲིམས་དཔོན་དང་ཉོ་འཚོང་བྱས་པ་བརྒྱུད་འཛིན་བཟུང་བཀའ་རྒྱ་ཐོབ་ཡོད”ཅེས་བཤད་པ་རེད། རྒྱལ་དམངས་སྟོབས་ཤུགས་ཏང་གི་གྲོས་མི་དབྱིན་ཞང་ཞན་གྱིས་འཛིན་བཟུང་བཀའ་རྒྱ་ལག་བསྟར་བྱེད་པ་ནི།རྩ་ཁྲིམས་ལ་གཏོར་བརླག་ཚབས་ཆེན་བྱས་པ་ཞིག་ཡིན་པས་སྤྱི་འདུམ་ཁྲུའུ་ཡི་ཁྲུའུ་ཀྲང་གི་ནག་ཉེས་ཐེར་འདོན་བྱེད་དགོས་ཞེས་བཤད།

ཧན་གོའི་ཐུན་མོང་དམངས་གཙོ་ཏང་གིས་དབྱིན་ཞི་ཡུའེ་ཡིས་འཛིན་བཟུང་བཀའ་རྒྱ་ལག་བསྟར་བྱེད་པར་གཞོགས་འདེགས་མི་བྱེད་པར་སྐྱོན་བརྗོད་དྲག་པོ་བྱས་པ་རེད། ཐུན་མོང་དམངས་གཙོ་ཏང་གི་གྲོས་ཁང་ནང་ཁུལ་གྱི་འཐུས་མི་ཕུའུ་ཙན་ཏ་ཡིས་རྒྱལ་དམངས་སྟོབས་ཤུགས་ཏང་ལ་རྩ་ཁྲིམས་ཀྱི་སྒྲིག་ལམ་དང་དམངས་གཙོ་ལ་གཏོར་བཤིག་གཏོང་བའི་ནང་འཁྲུག་གི་ཉེས་ཅན་གཙོ་བོར་བརྩི་བཀུར་བྱེད་མཚམས་འཇོག་དགོས་པའི་བླང་བྱ་བཏོན་པར་མ་ཟད།དབྱིན་ཞི་ཡུའེ་ཡིས་འཛིན་བཟུང་བཀའ་རྒྱ་ལག་བསྟར་དང་ལེན་བྱེད་དགོས་ཞེས་བཤད།

དབྱེ་ཞིབ་མི་སྣས་ཉེ་ལམ་ཧན་གོའི་སྲིད་དབང་དང་དམངས་གཙོ་ཏང་གཉིས་དང་དེ་མིན་རྒྱབ་སྐྱོར་བྱེད་མཁན་བར་གྱི་ཁ་གཏད་སྔར་ལས་ཛ་དྲག་ཏུ་འགྲོ་བཞིན་ཡོད་ཟེར།ཨ་རིའི་ཝའེ་སི་ལིས་ལས་རིགས་གཅིག་པའི་ལྷན་ཚོགས་སློབ་ཆེན་ཧན་གོའི་ཆབ་སྲིད་རིག་པའི་དགེ་རྒན་ཆེན་མོ་ཆུང·ཀྲའོ་ཡིས་ཧན་གོའི་ཆབ་སྲིད་ཀྱི་སྣེ་གཉིས་ཁ་གྱེས་དེ་ཕུལ་བྱུང་གི་ངོས་ནས་མཚོན་གྱི་ཡོད་ལ་མང་ཚོགས་ཀྱི་ངོས་ནས་ཀྱང་མཚོན་གྱི་ཡོད་པས་ཧན་གོའི་ཆབ་སྲིད་བརྟན་འཇགས་ལ་ཤུགས་རྐྱེན་ཚབས་ཆེན་ཐེབས་ཀྱི་ཡོད་པར་ངོས་འཛིན་བྱས་པ་རེད། ཨ་རིའི་ཆའོ་ཀྲི་ཏུན་སློབ་ཆེན་གྱི་དགེ་རྒན་ཆེན་མོ་ཁྲེ་ཝེ་ཏེས་རྒྱུན་མཐུད་ཀྱི་ཆབ་སྲིད་ཟང་ཟིང་དེས་ཧན་གོའི་དཔལ་འབྱོར་དང་སྤྱི་ཚོགས་ཀྱི་གནད་དོན་སྔར་ལས་ཛ་དྲག་ཏུ་འགྲོ་རྒྱུ་རེད་ཅེས་བཤད་ཡོད།