དྲ་ཐོག་ནས་སྒོར་ཁྲི18ལྷག་མགོ་སྐོར་བཏང་བའི་སྐྱེས་པ་ཞིག་འཛིན་བཟུང་བྱས་ནས་ཁྲིམས་སྦྱོར་བྱས་པ།

ཉེ་ཆར་ཟི་ལིང་གྲོང་ཁྱེར་སྤྱི་བདེ་ཅུའུ་གྲོང་ཤར་སྤྱི་བདེ་ཡན་ལག་ཅུའུ་ཡིས་གནས་ཚུལ་ཁྱབ་བསྒྲགས་བྱས་པ་ལྟར་ན། ཉེན་རྟོག་ཕྱོགས་ལ་གྲོང་མིས་མགོ་སྐོར་ཕོག་པའི་ཉེན་བརྡ་འབྱོར་རྗེས། མགོ་སྐོར་གྱོད་གཞི་ཞིག་བདེ་བླག་ངང་རྩད་གཅོད་བྱས་ཏེ། དྲ་ཐོག་ནས་མགོ་སྐོར་བཏང་པའི་དོགས་ཡོད་མི་སྣ་ཞིག་ཞིང་ཆེན་ཕྱི་རོལ་ནས་འཛིན་བཟུང་བྱས་ནས་ཁྲིམས་སྦྱོར་བྱས།

“ངས་དྲ་ཐོག་ནས་སྒོར་ཁྲི18ལྷག་ཙམ་བཏང་ནས་གློག་སྨན་ཉོས་པར་མགོ་སྐོར་ཕོག་ཡོད”ཅེས་པའི་ཡུན་རིང་མ་སོང་བར་གྲོང་ཤར་སྤྱི་བདེ་ཅུས་ཀྱི་དཔལ་འབྱོར་མྱུལ་ཞིབ་རུ་ཁག་ལ་གྲོང་མི་སྐུ་ཞབས་ཀྲེན་གྱིས་ཉེན་བརྡ་བཏང་བ་རེད།　སྐུ་ཞབས་ཀྲེན་གྱིས་ན་ནིང་ཟླ9པའི་ཟླ་འགོར་ཁོང་གིས་དྲ་ཐོག་ནས་སྤུས་རྟགས་གློག་སྨན་ཁག་གཅིག་ཉོས་ཡོད་མོད། འོན་ཀྱང་དངོས་ཟོག་ཡུན་རིང་ཟི་ལིང་དུ་སྐྱེལ་ཐུབ་མེད་པས། ཁོང་གིས་རང་ཉིད་ལ་མགོ་སྐོར་བཏང་བར་དོགས་པ་བྱེད་བཞིན་ཡོད་ཟེར།

མྱུལ་ཞིབ་རུ་ཁག་གི་ཉེན་རྟོག་པས་སྐུ་ཞབས་ཀྲེན་གྱིས་མཁོ་འདོན་བྱས་པའི་དཔང་རྟགས་ལ་གཞིགས་ནས་ཞིབ་བཤེར་བྱས་པ་ལྟར་ན། སྐུ་ཞབས་ཀྲེན་གྱིས་དྲ་ཐོག་ནས་མི་རྒྱུས་མེད་པའི་མི་དང་གློག་སྨན་ཉོ་སྒྲུབ་ཀྱི་གྲོས་མཐུན་བཞག་ནས་སྒོར་ཁྲི18ལྷག་ཙམ་ཐེངས་མང་བགོས་ནས་མི་རྒྱུས་མེད་པའི་མིང་འོག་ཏུ་སྤོས་པ་རེད།　སྐུ་ཞབས་ཀྲེན་གྱིས་སྐུལ་འདེད་ཐེངས་མང་བྱས་པའི་འོག ཕ་རོལ་པོས་གཞི་ནས་ཚོང་ཟོག་སྐྱེལ་བའི་ཟིན་ཐོ་འཛིན་ཡིག་དང་ཟོག་འགྲེམས་ཀུང་སིའི་ལས་དོན་མི་སྣ་དང་ཁ་བརྡ་བྱེད་པའི་ཟིན་ཐོ་བསྐུར་ཡོད།　འོན་ཀྱང་ཚོང་ཟོག་འདི་དག་སྐུ་ཞབས་ཀྲེན་ལ་ཡུན་རིང་མ་འབྱོར།

སྐུ་ཞབས་ཀྲེན་གྱིས་ཡང་ཡང་རྒྱུན་འཁྱོངས་བྱས་པར་བརྟེན། ཕ་རོལ་པོས་དངུལ་ཕྱིར་སློག་བྱེད་འདོད་ཡོད་ཅེས་བཤད་པ་དང་། དེའི་ཕྱིར་ད་དུང་དངུལ་ཕྱིར་སློག་པའི་དཔང་ཡིག་ཅིག་བསྐུར་ནས་ཉོ་སྒྲུབ་དངུལ་ཚང་མ་ཕྱིར་སློག་བྱས་ཡོད་པས་ཉིན་འགའི་ནང་དངུལ་འབྱོར་ཐུབ་ཅེས་བཤད་པ་རེད།　སྐུ་ཞབས་ཀྲེན་གྱིས་ཡུན་རིང་སྒུག་ནས་སྒོར་མོ་འདི་ཡང་རང་ཉིད་ཀྱི་དངུལ་ཁང་གི་རྩིས་ཐོའི་ནང་དུ་བསྒྱུར་མེད་པ་ཤེས།

ན་ནིང་ཟླ12པའི་ཟླ་མཇུག་ཏུ། དཔལ་འབྱོར་མྱུལ་ཞིབ་རུ་ཆེན་གྱི་གྱོད་སྒྲུབ་ཉེན་རྟོག་པར་ཉིང་ཞ་དབྱིན་ཁྲོན་དུ་ཉེས་གསོག་དོགས་ཡོད་མི་སྣ་མངོན་པའི་ཁུངས་སྣེ་ཐོབ་རྗེས། དབྱིན་ཁྲོན་ཉེན་རྟོག་ཕྱོགས་ཀྱི་གཞོགས་འདེགས་འོག་དོགས་ཡོད་མི་སྣ་འཛིན་བཟུང་བྱས་ནས་ཁྲིམས་སྦྱོར་བྱས།　འདྲི་རྩད་བྱས་པ་བརྒྱུད། ཉེས་གསོག་དོགས་ཡོད་མི་སྣས་རང་ཉིད་ཀྱིས་དཔང་ཡིག་རྫུན་བཟོ་བྱས་ནས་མགོ་སྐོར་གྱི་དོགས་པ་ཡོད་པའི་ཉེས་གསོག་དོན་དངོས་ཁས་ལེན་བྱས་པ་རེད།　མིག་སྔར། ཉེས་གསོག་དོགས་ཡོད་མི་སྣ་རེན་ཆེ་གེ་མོ་དེ་སྤྱི་བདེ་ལས་ཁུངས་ཀྱིས་ཁྲིམས་ལྟར་ཉེས་དོན་བཀག་ཉར་བྱས་པ་དང་གྱོད་གཞི་ཞིབ་གཅོད་བྱེད་བཞིན་ཡོད། །