སི་རི་ཡཱའི་ཧྲ་མུའུ་བཅིངས་འགྲོལ་དྲག་ཆས་རྩ་འཛུགས་ཀྱི་མགོ་ཁྲིད་པས་དྲག་ཆས་རྩ་འཛུགས་དེས་གཏོར་རྒྱུ་ཁྱབ་བསྒྲགས་བྱས།

སི་རི་ཡཱའི་ཧྲ་མུའུ་བཅིངས་འགྲོལ་དྲག་ཆས་རྩ་འཛུགས་ཀྱི་མགོ་ཁྲིད་པ་ཧྲ་ལཱ་ཡིས་ཚེས29ཉིན་སི་རི་ཡཱའི་མ་འོངས་པའི་ཆབ་སྲིད་འཕེལ་རིམ་གླེང་སྐབས་བཤད་རྒྱུར། རྩ་ཁྲིམས་གསར་བ་གཏན་འབེབས་བྱེད་པར་ལོ་ངོ་གསུམ་གྱི་དུས་ཚོད་མཁོ་བ་དང་། འདེམ་བསྐོ་བྱེད་པར་ལོ་ངོ་བཞིའི་དུས་ཚོད་མཁོ་ཟེར། ཁོས་ད་རུང་བསྟན་དོན། རྒྱལ་ཡོངས་ཀྱི་གྲོས་མོལ་ཚོགས་འདུའི་སྟེང་སི་རི་ཡཱའི་ཧྲ་མུའུ་བཅིངས་འགྲོལ་དྲག་ཆས་རྩ་འཛུགས་གཏོར་རྒྱུ་ཡིན་པ་ཁྱབ་སྒྲོག་བྱེད་རྒྱུ་ཡིན་ཟེར།

ཧྲ་ལཱ་ཡིས་ཉིན་དེར་སོ་ཏི་ཨ་རབ་ཀྱི་ཨ་རབ་བརྙན་འཕྲིན་ཁང་གི་བཅར་འདྲི་དང་ལེན་བྱེད་སྐབས་བཤད་རྒྱུར། ཙུང་ཐུང་འདེམ་བསྐོའི་སྔོན་ལ་སི་རི་ཡཱ་ཡིས་ཆབ་སྲིད་དུས་རིམ་མང་བོ་བརྒྱུད་དགོས། སི་རི་ཡཱ་མིག་སྔར་བཅའ་ཁྲིམས་བསྐྱར་འཛུགས་དུས་རིམ་དུ་གནས་ཡོད་པ་དང་། ང་ཚོས་དུས་ཡུན་རིང་བོར་ལག་བསྟར་ཐུབ་པའི་རྩ་ཁྲིམས་ཤིག་གཏན་འབེབས་བྱེད་པར་རེ་བཞིན་ཡོད་པ་དང་། དེ་ནི་དཀའ་ཚེགས་ཆེ་བའི་བྱ་བ་ཞིག་ཡིན་པས་དུས་ཡུན་རིང་བོ་དགོས་ཟེར།

ཁོས་ནན་གྱིས་བསྟན་དོན། རྣམ་པ་གང་རུང་གིས་སི་རི་ཡཱ་ཁ་བྲལ་དུ་གཏོང་མི་རུང་བ་དང་རྒྱལ་ཕྲན་མཉམ་འབྲེལ་ལམ་ལུགས་ཀྱང་དང་ལེན་བྱེད་མི་སྲིད། ཁུའུ་ཨར་ཏི་བ་ནི་སི་རི་ཡཱའི་སྤྱི་ཚོགས་ཀྱི་ཁ་འབྲལ་ཐབས་མེད་པའི་ཁག་ཅིག་ཡིན་པ་དང་། སི་རི་ཡཱའི་རྒྱལ་སྲུང་པུའུ་ཡིས་ཁུའུ་ཨར་ཏི་དྲག་ཆས་པ་དེ་རང་གི་མངའ་ཁོངས་སུ་བསྡུ་དགོས་ཟེར།

ཧྲ་ལཱ་ཡིས་བསྟན་དོན། རྒྱལ་ཡོངས་ཀྱི་གྲོས་མོལ་ཚོགས་འདུའི་སྟེང་སི་རི་ཡཱའི་ཧྲ་མུའུ་བཅིངས་འགྲོལ་དྲག་ཆས་ཚོགས་པ་གཏོར་རྒྱུ་ཁྱབ་སྒྲོག་བྱེད་རྒྱུ་ཡིན་པ་དང་། རྒྱལ་ཡོངས་ཀྱི་གྲོས་མོལ་ཚོགས་འདུར་སི་རི་ཡཱའི་སྤྱི་ཚོགས་ལས་རིགས་སོ་སོ་འདུ་སྲིད་ལ། ཆེད་དོན་ཨུ་ཡོན་ལྷན་ཁང་རེ་འགའ་འཛུགས་སྲིད་ཟེར།

ཁཱ་ཐར་ཕྱེད་གླིང་བརྙན་འཕྲིན་ཁང་གིས་ཚེས28ཉིན་བསྒྲགས་པ་ལྟར་ན། སི་རི་ཡཱའི་མགོ་ཁྲིད་རིམ་པ་གསར་བས་མ་འོངས་པའི་ཉིན་འགའི་ནང་རྒྱལ་ས་ཏཱ་མཱ་ཧྲི་ཀི་ནས་རྒྱལ་ཡོངས་ཀྱི་གྲོས་མོལ་ཚོགས་འདུ་ཞིག་བསྡུ་རྒྱུ་ཡིན་པ་དང་། དམིགས་ཡུལ་ནི་གྲོས་མོལ་ཨུ་ཡོན་ལྷན་ཁང་རེ་འགའ་འཛུགས་པའི་ཆེད་ཡིན་ལ། ཨུ་ཡོན་ལྷན་ཁང་དེ་དག་ལ་ཁྲིམས་འཛུགས་གོ་གནས་དང་སྲིད་གཞུང་གི་བྱ་བར་ལྟ་རྟོག་བྱེད་པའི་དབང་ཆ་ཡོད་པ་ཡིན་ཟེར།