ཁི་ལོ་ཏི་ཡཱའི་ཙུང་ཐུང་འདེམ་བསྐོ་ཡིས་སྐོར་ཐེངས་གཉིས་པའི་འགྲན་རྩོད་བྱ་འགུལ་སྤེལ་རྒྱུ་རེད།

ཁི་ལོ་ཏི་ཡཱའི་རྒྱལ་ཁབ་འདེམ་བསྐོ་ཨུ་ཡོན་ལྷན་ཁང་གིས་ཚེས29ཉིན་གྱི་དགོང་མོར་ཁྱབ་བསྒྲགས་བྱས་པའི་འདེམ་ཤོག་རྩིས་ལེན་བྱས་པའི་ཐོག་མའི་མཇུག་འབྲས་ལྟར་ན། འདེམ་སྒུག་པ་གང་རུང་ལ་ཉིན་དེའི་ཙུང་ཐུང་འདེམ་བསྐོའི་ཁྲོད་ཕྱེད་གྲངས་བརྒལ་བའི་འདེམ་ཤོག་ཐོབ་མེད་པས། འདེམ་ཤོག་ཐོབ་ཚད་ཆེས་མང་བའི་ད་ལྟའི་ཙུང་ཐུང་མུས་ལཱ་ནོའུ་ཝེ་ཆི་དང་སྲིད་འཛིན་ཏང་ཁི་ལོ་ཏི་ཡཱའི་དམངས་གཙོ་ཐུན་མོང་ཚོགས་པས་རྒྱབ་སྐྱོར་བྱེད་པའི་ཕུའུ་ལི་མའོ་ལཱ་ཚི་གཉིས་ཀྱིས་2025ལོའི་ཟླ་དང་པོའི་ཚེས12ཉིན་སྐོར་ཐེངས་གཉིས་པའི་འགྲན་རྩོད་བྱེད་རྒྱུ་རེད།

ཁི་ལོ་ཏི་ཡཱའི་རྒྱལ་ཁབ་འདེམ་བསྐོ་ཨུ་ཡོན་ལྷན་ཁང་གིས་བརྒྱ་ཆའི་གོ་དགུ་དང་གྲངས་ཆུང་བརྒྱད་བརྒྱད་ཀྱི་འདེམ་ཤོག་ལ་བསྡོམས་རྩིས་བྱས་པའི་མཇུག་འབྲས་ལས་མངོན་པ་ལྟར་ན། མུས་ལཱ་ནོའུ་ཝེ་ཆི་ལ་བརྒྱ་ཆའི་ཞེ་དགུ་དང་གྲངས་ཆུང་གཅིག་གི་འདེམ་ཤོག་ཐོབ་ཡོད་པ་དང་། ཕུའུ་ལི་མའོ་ལཱ་ཚི་ལ་བརྒྱ་ཆའི་བཅུ་དགུ་དང་གྲངས་ཆུང་གསུམ་ལྔའི་འདེམ་ཤོག་ཐོབ་ནས་ཨང་གཉིས་པར་གྱུར་ཡོད།

མུས་ལཱ་ནོའུ་ཝེ་ཆི་ཡིས་འདེམ་བསྐོའི་མཇུག་འབྲས་ཤེས་རྗེས་རྒྱབ་སྐྱོར་མཁན་ལ་གཏམ་བཤད་སྤེལ་ཏེ། ཁོ་ལ་ཐེངས་གཉིས་པའི་འགྲན་རྩོད་ཁྲོད་རྒྱལ་ཁ་ལོན་པའི་ཡིད་ཆེས་ཡོད་ཟེར།

ཕུའུ་ལི་མའོ་ལཱ་ཚི་ཡིས་རྒྱབ་སྐྱོར་མཁན་ལ་གཏམ་བཤད་སྤེལ་ཏེ། ཁི་ལོ་ཏི་ཡཱ་ལ་བཅོས་བསྒྱུར་མཁོ་བས། གཟའ་འཁོར་གཉིས་ཀྱི་རྗེས་སུ་ལོ་རྒྱུས་རང་བཞིན་གྱི་ཉིན་མོ་བསུ་ངེས་ཡིན་ཟེར།

ཁི་ལོ་ཏི་ཡཱའི་བཅའ་ཁྲིམས་ལྟར་ན། གལ་ཏེ་འདེམ་སྒུག་པ་གང་རུང་ལ་ཙུང་ཐུང་འདེམ་བསྐོའི་ཁྲོད་ཕྱེད་གྲངས་ལས་བརྒལ་བའི་འདེམ་ཤོག་ཐོབ་མེད་ན། འདེམ་ཤོག་ཐོབ་ཚད་ཆེས་མང་བའི་འདེམ་སྒུག་པ་གཉིས་སྐོར་ཐེངས་གཉིས་པའི་འདེམ་ཤོག་འཕེན་པའི་བྱ་འགུལ་ལ་ཞུགས་དགོས་པ་དང་། སྐོར་ཐེངས་གཉིས་པའི་འདེམ་ཤོག་འཕེན་པའི་བྱ་འགུལ་ཁྲོད་ཁ་གྲངས་ཅུང་ཙམ་གྱིས་མང་ཡང་བདམས་ཐོན་བྱེད་པ་ཡིན།