པའོ་ཧེ་དང་ཁི་ལོ་ཏི་ཡཱའི་མཚོ་འགྲམ་གྲོང་ཁྱེར་གྱིས་ལག་རྡང་སྦྲེལ་ནས་རྒྱ་མཚོའི་འགྱིག་ཤོག་གི་སྦགས་བཙོག་ཐག་གཅོད་བྱས།
པའོ་ཧེ་ཡི་ཁྲ་ཕུའུ་ལེ་ནཱ་གྲོང་ཁྱེར་གྱིས་ཚེས18ཉིན་མངའ་ཁོངས་བརྒལ་བའི་མཉམ་ལས་བྱ་བའི་གྲོས་ཚོགས་བསྡུས་པ་དང་། དམིགས་ཡུལ་ནི་མཚོ་འགྲམ་གྲོང་ཁྱེར་མང་བོས་མངའ་ཁོངས་བརྒལ་བའི་མཉམ་ལས་ལ་བརྟེན་ནས་འགྱིག་ཤོག་སྦགས་བཙོག་ཐག་གཅོད་བྱེད་པ་དང་། སྐམ་སའི་ཆུ་བོའི་བཞུར་བརྒྱུད་ཀྱི་འགྱིག་ཤོག་གད་སྙིགས་ཡཱ་ཏི་ལི་ཡཱ་མཚོ་དང་ཨེ་ཨོ་ནེ་ཡཱ་མཚོ་རུ་འཁུར་བའི་ཚད་ཇེ་ཉུང་དུ་གཏོང་བའི་མཉམ་ལས་ཇུས་གཞིར་གྲོས་བསྡུར་བྱེད་ཆེད་རེད།
པའོ་ཧེ་ཡི་ཁྲ་ཕུའུ་ལེ་ནཱ་གྲོང་ཁྱེར་སྲིད་གཞུང་གིས་སྤྱི་སྒྲོག་སྤེལ་ཏེ་མཚམས་སྦྱོར་བྱས་དོན། ཐེངས་འདིའི་བྱ་བའི་གྲོས་ཚོགས་ལ་ཁྲ་ཕུའུ་ལེ་ནཱ་གྲོང་ཁྱེར་དང་ཁི་ལོ་ཏི་ཡཱའི་མཱེ་ཐི་ཁི་ཝེ་ཆི་གྲོང་ཁྱེར། དེ་མིན་ཁི་ལོ་ཏི་ཡཱའི་སི་ཕུའུ་ལེ་ཐི་གྲོང་ཁྱེར་དུ་གནས་པའི་ཁི་ལོ་ཏི་ཡཱའི་རྒྱ་མཚོའི་རིག་པ་དང་ཉ་གསོ་ལས་རིགས་ཀྱི་ཞིབ་འཇུག་ཁང་མཉམ་དུ་ཞུགས་ཡོད།
མཚམས་སྦྱོར་བྱས་པ་ལྟར་ན། འགྱིག་ཤོག་གི་སྦགས་བཙོག་ནི་འཛམ་གླིང་ཡོངས་ཀྱི་ཁོར་ཡུག་གི་གནད་དོན་གལ་ཆེན་ཞིག་ཡིན་པ་དང་། ཆུ་བོ་དག་ནི་སྐམ་སའི་གད་སྙིགས་དང་རྒྱ་མཚོའི་ཁོར་ཡུག་གཅིག་ཏུ་སྦྲེལ་བའི་ཐབས་ལམ་གཙོ་བོ་རེད་ཟེར། ཁི་ལོ་ཏི་ཡཱའི་རྒྱ་མཚོའི་རིག་པ་དང་ཉ་གསོ་ལས་རིགས་ཞིབ་འཇུག་ཁང་གི་འཐུས་མིས་ཚོགས་ཐོག་ནས་མཚམས་སྦྱོར་བྱས་དོན། ཐེངས་འདིའི་གྲོས་ཚོགས་ནས་གཙོ་བོ་འགྱིག་ཤོག་སྦགས་བཙོག་དངོས་པོ་དག་སྐམ་ས་ནས་རྒྱ་མཚོའི་ནང་ཁུར་བའི་བརྒྱུད་རིམ་ལ་དོ་སྣང་བྱེད་བཞིན་ཡོད། པའོ་ཧེ་དང་ཁི་ལོ་ཏི་ཡཱ་བརྒྱུད་ནས་བཞུར་བའི་ནེ་ལོས་ཐི་ཝ་ཆུ་བོའི་བཞུར་བརྒྱུད་ཚོད་ལྟ་བྱེད་སར་བྱས་ནས་ལྟ་ཞིབ་ཚད་ལེན་དང་ཞིབ་འཇུག་བྱེད་རྒྱུ་ཡིན་ཟེར།
ཐེངས་འདིའི་གྲོས་ཚོགས་ནི་འགྱིག་ཤོག་གི་གད་སྙིགས་དག་ཡཱ་ཏི་ལི་ཡཱ་མཚོ་དང་ཨེ་ཨོ་ནེ་ཡཱ་མཚོ་ནང་དུ་ཁུར་བའི་ཚད་ཇེ་ཉུང་དུ་གཏོང་བའི་མངའ་ཁོངས་བརྒལ་བའི་མཉམ་ལས་ལས་གཞིའི་ལས་རིམ་ཞིག་ཡིན་པ་རེད། ལས་གཞི་དེའི་སྤྱིའི་མ་དངུལ་གཏོང་ཚད་ཡོ་སྒོར་ས་ཡ་གཅིག་དང་འབུམ་བདུན་ཁྲི་གཅིག་ཡིན་ཞིང་། སི་ལོ་ཝུན་ནེ་ཡཱའི་རྒྱལ་ཁབ་རྫས་འགྱུར་ཞིབ་འཇུག་ཁང་གིས་སྣེ་ཁྲིད་དེ། དབྱི་ཐཱ་ལེ་དང་ཞི་ལཱ། ཧེ་ཧྲན། ཨར་པཱ་ནི་ཡཱ་སོགས་རྒྱལ་ཁབ་དང་ས་ཁུལ་གྱི་ཞིབ་འཇུག་ལས་ཁུངས་བཅས་མཉམ་ཞུགས་བྱས་ཡོད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注