དབྱི་སི་རལ་གྱི་དམག་དཔུང་གིས་ཅཱ་ཧྲ་ས་ཁུལ་གྱི་ལྷོ་རྒྱུད་དུ་བར་སྣང་ནས་འཇབ་རྒོལ་བྱས་ཏེ་ཉུང་མཐར་ཡང་མི20བསད།
ཚེས15ཉིན། ཕ་ལེ་སི་ཐན་གསར་འགྱུར་ཁང་གིས་སྤེལ་བའི་གནས་ཚུལ་ལྟར་ན། དབྱི་སི་རལ་དམག་དཔུང་གིས་ཉིན་དེའི་དགོང་མོར་ཅཱ་ཧྲ་ས་ཁུལ་གྱི་ལྷོ་རྒྱུད་དུ་ཡོད་པའི། ཧན་ཡིའུ་ཉི་སིའི་སློབ་གྲྭ་ཞིག་ལ་བར་སྣང་ནས་འཇབ་རྒོལ་བྱས་པའི་དབང་གིས། བྱིས་པ་ཚུད་པའི་ཉུང་མཐར་ཡང་མི20རྐྱེན་ལམ་དུ་བཏང་ཡོད་ཟེར།
སྤེལ་བའི་གནས་ཚུལ་ལྟར་ན། འཇབ་རྒོལ་ཕོག་པའི་སློབ་གྲྭ་དང་ཐག་ཉེ་བའི་སྨན་ཁང་ཞིག་ཏུ་སྡོད་གནས་ཤོར་བའི་མང་ཚོགས་འབོར་ཆེན་གནས་ཡོད་ཅིང་། ཐེངས་འདིའི་འཇབ་རྒོལ་གྱིས་ད་དུང་མི་མང་པོར་རྨས་སྐྱོན་ཕོག་ཡོད་ཟེར།
ཕ་ལེ་སི་ཐན་གསར་འགྱུར་ཁང་གིས་ད་དུང་གནས་ཚུལ་སྤེལ་ནས་བཤད་རྒྱུར། དབྱི་སི་རལ་དམག་དཔུང་གིས་ཉིན་དེའི་དགོང་མོར་ད་དུང་ཅཱ་ཧྲ་ས་ཁུལ་བྱང་རྒྱུད་ཀྱི་ཅཱ་ཧྲ་གྲོང་དང་དབུས་རྒྱུད་ཀྱི་ནུའུ་སའེ་ལའེ་ཐིའི་ཡུལ་གྱར་བའི་སྒར་སར་ཡོད་པའི་ཁང་པ་གཉིས་འགས་གཏོར་བྱས་ཏེ། མི11རྐྱེན་ལམ་དུ་ཤོར་བའི་ནང་བྱིས་པ་ཚུད་ཡོད་ཟེར།
ཚེས15ཉིན་གྱི་དགོང་མོ། དབྱི་སི་རལ་གྱི་རྒྱལ་སྲུང་དམག་གིས་གསལ་བསྒྲགས་སྤེལ་ནས་བཤད་རྒྱུར། ཉིན་དེའི་དུས་ཚོད་སྔ་ཤོས་སུ། དབྱི་སི་རལ་གྱི་མཁའ་དམག་གིས་ཕ་ལེ་སི་ཐན་དབྱི་སི་ལན་གྱི་འགོག་རྒོལ་ལས་འགུལ་ཧ་མ་སི་དང་ཕ་ལེ་སི་ཐན་དབྱི་སི་ལན་གྱི་ཧྲིན་ཀྲན་རྩ་འཛུགས་ཅེ་ཧ་ཏི་ཡི་དྲག་ཆས་མི་སྣར་རྡུང་རྡེག་བཏང་བ་དང་། རྡུང་རྡེག་གཏོང་སྐབས་དྲག་ཆས་མི་སྣ་དེ་དག་གིས་ནུའུ་སའེ་ལའེ་ཐི་ཡི་ཡུལ་གྱར་བའི་སྒར་སར་ཡོད་པའི། “བཀོད་འདོམས་ཚོད་འཛིན་ལྟེ་གནས”ཤིག་ཏུ་བྱེད་སྒོ་སྤེལ་བཞིན་ཡོད་ཟེར།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注