ཕྱི་འབྲེལ་པུའུ་ཡིས་ཧན་གོ་ཕྱོགས་ཀྱིས་ནང་སྲིད་ཀྱི་གནད་དོན་དེ་ཀྲུང་གོའི་རྒྱུ་རྐྱེན་དང་འབྲེལ་བ་ཡོད་ཚུལ་བཤད་པར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་པར་བསྟན་པ།

ཧན་གོའི་ཙུང་ཐུང་དབྱིན་ཞིས་ཡའེ་ཡིས་ཚེས12ཉིན་སྤེལ་བའི་ཀྲུང་གོ་དང་འབྲེལ་བ་ཡོད་པའི་འབྲེལ་ཡོད་གཏམ་བརྗོད་ལ་དམིགས་ཏེ།  ཚེས12ཉིན་ཕྱི་འབྲེལ་པུའུ་ཡི་མགྲིན་ཚབ་པ་མའོ་ཉིན་གྱིས་ཧན་གོ་ཕྱོགས་ཀྱི་གཏམ་བཤད་དེ་ཀྲུང་གོ་ཕྱོགས་ཀྱི་བློ་ཡུལ་ལས་འདས་ཤིང་ཡིད་མི་དགའ་བར་གྱུར་ཡོད།  ཧན་གོ་ཕྱོགས་ཀྱིས་ནང་སྲིད་གནད་དོན་དེ་ཀྲུང་གོའི་རྒྱུ་རྐྱེན་དང་འབྲེལ་བ་ཡོད་ཚུལ་བཤད་པར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཞེས་བསྟན།

ཉིན་དེའི་གསར་འགོད་པའི་འཆར་ཅན་ཚོགས་འདུའི་སྟེང་གསར་འགོད་པ་ཞིག་གིས། ཧན་གོའི་ཙུང་ཐུང་དབྱིན་ཞིས་ཡའེ་ཡིས་ཚེས12ཉིན་ཧན་གོའི་རྒྱལ་དམངས་ལ་གཏམ་བཤད་སྤེལ་ཏེ། ཀྲུང་གོའི་སྤྱི་དམངས་ཀྱིས་ཧན་གོའི་བདེ་འཇགས་ལ་འཇིགས་སྐུལ་བཟོས་པའི་གྱོད་དཔེ་གླེང་བ་མ་ཟད། ད་དུང་ཀྲུང་གོས་ཐོན་སྐྱེད་བྱས་པའི་ཉི་ནུས་སྒྲིག་ཆས་ཀྱིས་ཧན་གོའི་ནགས་ཚལ་ལ་གཏོར་བཤིག་གཏོང་བཞིན་ཡོད་ཅེས་བཤད་པར་ཀྲུང་གོ་སྲིད་གཞུང་གིས་ལྟ་སྟངས་གང་ཞིག་འཛིན་གྱི་ཡོད་དམ་ཞེས་དྲིས།

མའོ་ཉིན་གྱིས་བཤད་རྒྱུར།  ཀྲུང་གོ་ཕྱོགས་ཀྱིས་འབྲེལ་ཡོད་གནས་ཚུལ་ལ་དོ་སྣང་བྱུང་ཡོད་པ་དང་།  གོང་གསལ་གྱི་ཧན་གོ་ཕྱོགས་ཀྱི་གཏམ་བརྗོད་དེ་བློ་ཡུལ་ལས་འདས་ཤིང་མི་འདོད་པའི་རྣམ་འགྱུར་འཛིན་གྱི་ཡོད།     ཀྲུང་གོ་ཕྱོགས་ཀྱིས་ཧན་གོའི་ནང་སྲིད་ལ་དཔྱད་གཏམ་སྤེལ་རྒྱུ་མིན།  འོན་ཀྱང་ཧན་གོ་ཕྱོགས་ཀྱིས་ནང་སྲིད་གནད་དོན་དེ་ཀྲུང་གོའི་རྒྱུ་རྐྱེན་དང་འབྲེལ་བ་ཡོད་ཚུལ་བཤད་པར་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་པ་དང་།  ཀྲུང་གོའི་གསང་མྱུལ་བ་ཟེར་ནས་འུད་སྒྲོག་བྱས་ཏེ། རྒྱུན་ལྡན་གྱི་དཔལ་འབྱོར་ཚོང་དོན་མཉམ་ལས་ལ་གནོད་འཚེ་གཏོང་བ་དེ་ནི། ཀྲུང་ཧན་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་འགྲོ་བར་ཕན་པ་མེད་ཟེར།

མའོ་ཉིན་གྱིས་ཀྲུང་གོ་སྲིད་གཞུང་གིས་སྔ་ཕྱི་བར་གསུམ་དུ་ཕྱི་རྒྱལ་དུ་ཡོད་པའི་ཀྲུང་གོའི་སྤྱི་དམངས་ལ་ས་གནས་དེའི་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་བྱེད་དགོས་པའི་བླང་བྱ་འདོན་གྱི་ཡོད། ཀྲུང་གོ་ཕྱོགས་ཀྱིས་ཧན་གོ་ཕྱོགས་ཀྱིས་བཤད་པའི་འབྲེལ་ཡོད་གྱོད་གཞི་སོ་སོར་ད་དུང་མཇུག་འབྲས་བྱུང་མེད་པ་ཤེས་རྟོགས་བྱུང་ཡོད་ཅིང་།  ཀྲུང་གོ་དང་ཧན་གོའི་འབྲེལ་ཡོད་སྡེ་ཁག་གིས་ཐོག་མཐའ་བར་གསུམ་དུ་འབྲེལ་གཏུག་རྒྱུན་འཁྱོངས་བྱས་ཡོད།  ཀྲུང་གོ་ཕྱོགས་ཀྱིས་ཧན་གོ་ཕྱོགས་ལ་ཀྲུང་གོའི་སྤྱི་དམངས་དང་འབྲེལ་བ་ཡོད་པའི་གྱོད་གཞི་དེ་དྲང་བདེན་གྱིས་ཐག་གཅོད་བྱས་ནས། དུས་ཐོག་ཏུ་ཀྲུང་གོ་ཕྱོགས་ལ་གྱོད་གཞི་ཐག་གཅོད་བྱས་པའི་གནས་ཚུལ་བརྡ་ཁྱབ་གཏོང་རྒྱུ་དང་། དོན་དག་དེ་དང་འབྲེལ་བ་ཡོད་པའི་ཀྲུང་གོའི་སྤྱི་དམངས་ཀྱི་བདེ་འཇགས་དང་ཁྲིམས་མཐུན་ཁེ་དབང་འགན་ལེན་ཏན་ཏིག་བྱ་རྒྱུར་སྐུལ་འདེད་བཏང་པ་ཡིན་ཞེས་བསྟན།

མའོ་ཉིན་གྱིས་བཤད་རྒྱུར།  ཀྲུང་གོའི་ལྗང་མདོག་ཐོན་ལས་ཀྱི་འཕེལ་རྒྱས་ནི་འཛམ་གླིང་གི་ཁྲོམ་རའི་དགོས་མཁོ་དང་། ལག་རྩལ་གསར་གཏོད། འགྲན་རྩོད་གང་ལེགས་བཅས་ཀྱི་འབྲས་བུ་ཞིག་ཡིན་ལ། གནམ་གཤིས་འགྱུར་ལྡོག་ལ་ཁ་གཏད་གཅོག་པ་དང་འཛམ་གླིང་གི་ཁོར་ཡུག་བཅོས་སྐྱོང་འཐུས་ཚང་དུ་གཏོང་བར་ལེགས་སྐྱེས་གལ་ཆེན་ཕུལ་ཡོད་ཟེར།