དབྱི་རག་སྲིད་གཞུང་གིས་སི་རི་ཡའི་མི་དམངས་ཀྱི་འདོད་བློར་བརྩི་འཇོག་བྱེད་དགོས་པའི་འབོད་སྐུལ་བཏང་།

དབྱི་རག་སྲིད་གཞུང་གི་མགྲིན་ཚབ་པ་ཨ་ཝ་ཏིས་ཀྱིས་ཚེས8ཉིན་གསལ་བསྒྲགས་སྤེལ་ནས་བཤད་རྒྱུར། ངེས་པར་དུ་སི་རི་ཡའི་མི་དམངས་ཡོངས་ཀྱི་འདོད་བློར་བརྩི་འཇོག་བྱེད་དགོས། སི་རི་ཡའི་བདེ་འཇགས་དང་། མངའ་ཁོངས་ཆ་ཚང་། རང་བཙན་བཅས་ནི་དབྱི་རག་དང་ས་ཁུལ་ཧྲིལ་པོའི་བརྟན་ལྷིང་ལ་གལ་འགངས་ཤིན་ཏུ་ཆེ་ཞེས་ནན་བཤད་བྱས།

གསལ་བསྒྲགས་ནང་བཤད་རྒྱུར། དབྱི་རག་སྲིད་གཞུང་གིས་སི་རི་ཡའི་གནས་བབ་འཕེལ་རྒྱས་ལ་མུ་མཐུད་དུ་དོ་ཁུར་བྱ་རྒྱུ་དང་། མཛའ་མཐུན་རྒྱལ་ཁབ་བར་གྱི་འབྲེལ་འདྲིས་རྒྱུན་འཁྱོངས་བྱས་ནས་སི་རི་ཡའི་བདེ་འཇགས་དང་བརྟན་ལྷིང་ལ་ཕན་པའི་འབད་བརྩོན་ལ་སྐུལ་འདེད་གཏོང་རྒྱུ་ཡིན། དབྱི་རག་གིས་སི་རི་ཡའི་ལས་རིགས་སོ་སོ་དང་ཕྱོགས་སོ་སོས་གྲོས་མོལ་བྱ་རྒྱུར་སྐུལ་མ་གཏོང་རྒྱུ་དམིགས་ཡུལ་དུ་བཟུང་བའི་རྒྱལ་སྤྱི་དང་ས་ཁུལ་རང་བཞིན་གྱི་འབད་བརྩོན་ཚང་མར་རྒྱབ་སྐྱོར་བྱ་རྒྱུ་ཡིན་པར་མ་ཟད། དེ་ནི་སི་རི་ཡའི་མི་དམངས་ཀྱི་ཁེ་ཕན་དང་མཐུན་ཟེར།

གསལ་བསྒྲགས་ནང་དབྱི་རག་གིས་སི་རི་ཡའི་ནང་སྲིད་ལ་ཐེ་གཏོགས་མི་བྱེད་པའི་གལ་ཆེན་རང་བཞིན་བསྐྱར་བསྒྲགས་བྱས་པ་དང་། ཕྱོགས་གཅིག་ལ་ཕྱོགས་ཞེན་འཛིན་པའི་བྱེད་སྟངས་གང་རུང་ལ་ངོ་རྒོལ་བྱེད་དགོས་པ་ནན་བཤད་བྱས་ཡོད།