པའེ་ཏིན་གྱིས་ཨ་རིའི་སྲིད་གཞུང་གིས་སི་རི་ཡའི་ཕྱོགས་ཁག་སོ་སོའི་བར་དུ་བར་བརྒལ་འཕེལ་རིམ་སྐོར་ནས་འབྲེལ་གཏུག་བྱེད་རྒྱུ་ཡིན་པར་བསྟན།

ཨ་རིའི་ཙུང་ཐུང་པའེ་ཏིན་གྱིས་ཚེས8ཉིན་བསྟན་དོན། ཨ་རིའི་སྲིད་གཞུང་གིས་སི་རི་ཡའི་ཕྱོགས་ཁག་སོ་སོར་འབྲེལ་གཏུག་བྱས་ནས། མཉམ་འབྲེལ་རྒྱལ་ཚོགས་ཀྱིས་གཙོ་ཁྲིད་བྱེད་པའི་སི་རི་ཡའི་བར་བརྒལ་འཕེལ་རིམ་ལ་ཞུགས་རྒྱུ་ཡིན་ཟེར།

པའེ་ཏིན་གྱིས་ཉིན་དེར་ཕོ་བྲང་དཀར་པོའི་ལཱོ་སི་ཧྥུའུ་ཚོམས་ཁང་དུ་སི་རི་ཡའི་སྲིད་ཇུས་དང་འབྲེལ་བའི་གཏམ་བཤད་སྤེལ་སྐབས་བཤད་རྒྱུར། ཨ་རིའི་སྲིད་གཞུང་གིས་སི་རི་ཡའི་སྲིད་གཞུང་གི་བར་བརྒལ་དུས་རིམ་དུ་ཅོར་ཏན་དང་། ལེ་པཱ་ནོན། དབྱི་རག དབྱི་སི་རལ་སོགས་སི་རི་ཡའི་ཁྱིམ་མཚེས་རྒྱལ་ཁབ་དག་གིས་བདེ་འཇགས་འཇིགས་སྐུལ་ལ་བཀག་འགོག་བྱེད་པར་རྒྱབ་སྐྱོར་བྱེད་རྒྱུ་མ་ཟད། ཐལ་སྤྱོད་རྩ་འཛུགས་དབྱི་སི་ལན་རྒྱལ་ཁབ་ལ་མུ་མཐུད་དུ་རྡུང་རྡེག་བཏང་སྟེ་དེ་སླར་གསོ་འབྱུང་བར་སྔོན་འགོག་བྱེད་རྒྱུ་ཡིན་ཟེར། ཁོས་ཨ་རིའི་དམག་གིས་ཚེས8ཉིན་སི་རི་ཡའི་ས་ཁུལ་གྱི་དབྱི་སི་ལན་རྒྱལ་ཁབ་ཀྱི་དམིགས་འབེན་ལ་ཐེངས་བཅུ་ལྷག་ལ་གནད་འཁེལ་རྡུང་རྡེག་བཏང་ཡོད་ཅེས་བཤད།

པའེ་ཏིན་གྱིས་ད་དུང་བཤད་རྒྱུར། ཨ་རིའི་སྲིད་གཞུང་གིས་སི་རི་ཡའི་ཕྱོགས་ཁག་སོ་སོར་འབྲེལ་གཏུག་བྱས་ནས། མཉམ་འབྲེལ་རྒྱལ་ཚོགས་ཀྱིས་གཙོ་ཁྲིད་བྱེད་པའི་བར་བརྒལ་འཕེལ་རིམ་ལ་ཞུགས་རྒྱུ་ཡིན་པ་དང་། སི་རི་ཡའི་རྒྱལ་ཁབ་སྒེར་ཚུགས་དང་བདག་དབང་ཆ་ཚང་། རྩ་ཁྲིམས་གསར་པ་གཏན་འབེབས་དང་སྲིད་གཞུང་གསར་པ་རྩ་འཛུགས་བྱེད་པར་ཁག་ཐེག་བྱེད་རྒྱུ་ཡིན། མ་འོངས་པའི་ཉིན་འགར། ཁོས་ས་ཁུལ་དེའི་འབྲེལ་ཡོད་རྒྱལ་ཁབ་ཀྱི་འགོ་ཁྲིད་མི་སྣར་ཁ་པར་བཏང་ནས་སི་རི་ཡའི་གནས་བབ་ལ་གྲོས་བསྡུར་བྱ་རྒྱུ་མ་ཟད། ཨ་རིའི་སྲིད་གཞུང་གི་མཐོ་རིམ་དཔོན་རིགས་མངགས་ནས་ས་ཁུལ་དེར་འཚམས་འདྲི་བྱ་རྒྱུ་ཡིན་ཟེར།

སི་རི་ཡའི་ངོ་རྒོལ་ཕྱོགས་ཁག་གི་དྲག་ཆས་མི་སྣ་ཚེས8ཉིན་རྒྱལ་ས་ཏཱ་མཱ་སི་ཁུ་ལ་སོང་བ་དང་། དེའི་རྗེས་བརྙན་འཕྲིན་གཏམ་བཤད་སྤེལ་སྐབས་ཏཱ་མཱ་སི་ཁུ་བཅིངས་འགྲོལ་བྱས་པར་མ་ཟད་ཨ་སཱ་ཏིའི་སྲིད་དབང་རྩ་གཏོར་བཏང་བ་ཡིན་ཞེས་བསྒྲགས། ཨུ་རུ་སིའི་ཕྱི་འབྲེལ་པུའུ་ཡིས་ཉིན་དེར་གསལ་བསྒྲགས་སྤེལ་ནས་བཤད་རྒྱུར། སི་རི་ཡའི་མངའ་ཁོངས་ཀྱི་དྲག་ཤུགས་འཁྲུག་རྩོད་ཀྱི་ཕྱོགས་སོ་སོར་གྲོས་མོལ་བྱས་པར་མ་ཟད་དབང་ཆ་བརྒྱུད་སྤྲོད་ལ་མཛུབ་སྟོན་བྱས་རྗེས། པཱ་ཧྲ་ཨར·ཨ་སཱ་ཏི་ཡིས་སི་རི་ཡའི་ཙུང་ཐུང་གི་འགན་ཁུར་མཚམས་བཞག་ནས་སི་རི་ཡར་ཁ་འབྲལ་རྒྱུའི་ཐག་བཅད་ཟེར།