ཅཱ་ནཱ་ཡིས་ཙུང་ཐུང་དང་གྲོས་ཁང་གི་འདེམས་བསྐོ་བྱས།

ཅཱ་ནཱ་ཡིས་ཚེས7ཉིན་ཙུང་ཐུང་དང་གྲོས་ཁང་གི་འདེམས་བསྐོ་བྱས་པ་དང་། འདེམ་དམངས་བྱེ་བ་གཅིག་དང་ས་ཡ་བརྒྱད་ཀྱིས་འདེམས་ཤོག་འཕངས་ནས་ཙུང་ཐུང་གསར་བ་དང་གྲོས་ཁང་གི་གྲོས་མི276འདེམ་རྒྱུ་རེད།

ཙུང་ཐུང་གི་འོས་མི་བཅུ་གསུམ་ཁྲོད། སྲིད་སྐྱོང་ཏང་གི་རྒྱལ་གཅེས་ཏང་གསར་བའི་ཙུང་ཐུང་གི་འོས་མི། ཙུང་ཐུང་གཞོན་པ་མཱ་ཧཱ་མའོ་ཏུའུ·པཱ་ཝུའུ་མའེ་ཡཱ་དང་། ཆེས་ཆེ་བའི་ངོ་རྒོལ་ཏང་གི་རྒྱལ་ཡོངས་དམངས་གཙོའི་ཚོགས་ཆེན་ཏང་གི་ཙུང་ཐུང་གི་འོས་མི། ཙུང་ཐུང་ཟུར་པ་མཱ་ཧྭ་མཱ་ནི་ཙུང་ཐུང་གསར་བའི་འགྲན་རྩོད་བྱེད་མཁན་གཙོ་བོ་ཡིན།

སྒེར་ཚུགས་འོས་མི111དང་བཅས་པའི་འོས་མི801གིས་གྲོས་ཁང་གི་གྲོས་མི་ཉིས་བརྒྱ་དོན་དྲུག་གི་གདན་ཐོབ་འགྲན་རྩོད་བྱ་རྒྱུ་རེད། 

ཅཱ་ནཱའི་འདེམ་བསྐོ་ཨུ་ཡོན་ལྷན་ཁང་གིས་བསྟན་དོན། ས་དེའི་སྔ་དྲོའི་ཆུ་ཚོད་བདུན་པ་ནས་བཟུང་འདེམས་ཤོག་འཕེན་པའི་འགོ་རྩོམ་པ་དང་ཕལ་ཆེར་ཕྱི་དྲོའི་ཆུ་ཚོད་ལྔ་པར་མཇུག་བསྒྲིལ་བརེད།

ཅཱ་ནཱའི་རྩ་ཁྲིམས་ལྟར་ན། ཅཱ་ནཱའི་ཙུང་ཐུང་ནི་ཐད་ཀར་འདེམས་ཐོན་བྱུང་བ་དང་། འགན་ཡུན་ལོ་བཞི་རེད། ཐོག་མར་འདེམས་ཤོག་འཕེན་སྐབས་བརྒྱ་ཆའི་ལྔ་བཅུ་ཡན་གྱི་འདེམས་ཤོག་ཐོབ་པའི་འོས་མི་འདེམ་བསྐོ་ལས་རྒྱལ་བ་རེད། གལ་ཏེ་ཐོག་མར་འདེམས་ཤོག་འཕེན་སྐབས་བརྒྱ་ཆའི་ལྔ་བཅུ་ཡན་གྱི་འདེམས་ཤོག་ཐོབ་པའི་འོས་མི་མེད་ཚེ། འདེམས་ཤོག་ཐོབ་པ་ཆེས་མང་པའི་འོས་མི་གཉིས་ཀ་སྐོར་ཐེངས་གཉིས་པའི་འདེམས་བསྐོའི་འགྲན་རྩོད་ཁྲོད་ཞུགས་དགོས།

ཅཱ་ནཱའི་སྲིད་གཞུང་གིས་ཚེས6ཉིན་གྱི་དགོང་མོར་སྐམ་སའི་མཐའ་མཚམས་ཚང་མའི་སྒོ་རྒྱག་པ་ཁྱབ་བསྒྲགས་བྱས་ནས། ཐེངས་འདིའི་འདེམས་བསྐོའི་དྲང་བདེན་རང་བཞིན་ལ་ཁག་ཐེག་བྱས།