ཨུ་རུ་སི་དང་ཨུ་རུ་སི་དཀར་པོའི་རྒྱལ་ཁབ་གཉིས་ཀྱི་འགོ་ཁྲིད་པས་མནའ་འབྲེལ་རྒྱལ་ཁབ་ཀྱི་བདེ་འཇགས་འགན་སྲུང་ཆིངས་ཡིག་ལ་མིང་རྟགས་བཀོད།

ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་ཀྱི་ཆེས་མཐོའི་རྒྱལ་སྲིད་ཨུ་ཡོན་ལྷན་ཚོགས་ཀྱིས་ཚེས6ཉིན་ཨུ་རུ་སི་དཀར་པོའི་རྒྱལ་ས་མེན་སི་ཁི་ནས་གྲོས་ཚོགས་བསྡུས་པ་དང་། ཨུ་རུ་སི་དཀར་པོའི་ཙུང་ཐུང་ལུའུ་ཁཱ་ཧྲིན་ཁི་དང་ཨུ་རུ་སིའི་ཙུང་ཐུང་ཕུའུ་ཅིན་གཉིས་གྲོས་ཚོགས་ལ་ཞུགས་ནས། ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་ཀྱི་བདེ་འཇགས་འགན་སྲུང་ཆིངས་ཡིག་ལ་མིང་རྟགས་བཀོད་པར་མ་ཟད། ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་ཀྱི་བདེ་འཇགས་བསམ་བཀོད་ལ་གྲོས་འཆམ་བྱུང་།

ལུའུ་ཁཱ་ཧྲིན་ཁི་ཡིས་གྲོས་ཚོགས་སྟེང་བཤད་རྒྱུར། བདེ་འཇགས་འགན་སྲུང་ཆིངས་ཡིག་ལ་མིང་རྟགས་བཀོད་ཅིང་བདེ་འཇགས་བསམ་བཀོད་ལ་ཆོག་མཆན་ཐོབ་པ་དང་བསྟུན་ནས། རྒྱལ་ཁབ་གཉིས་ཀྱི་དམག་དོན་ཁྱབ་ཁོངས་ཀྱི་འཐབ་ཇུས་མནའ་འབྲེལ་དང་མཐུན་སྦྱོར་འགུལ་སྐྱོད་དེ་སྔར་མེད་ཀྱི་ཆུ་ཚད་ལ་སླེབས། དེ་ཨུ་རུ་སི་དཀར་པོ་དང་ཨུ་རུ་སིའི་མངའ་ཁོངས་ཆ་ཚང་ལ་བཙན་འཛུལ་མི་ཐེབས་པར་འགན་སྲུང་བྱེད་པ་དང་། རྒྱལ་ཁབ་གཉིས་ཀྱི་བདག་དབང་དང་སྒེར་ཚུགས་ལ་སྲུང་སྐྱོང་བྱས་ནས། རྒྱལ་ཁབ་གཉིས་ཀྱི་མི་དམངས་ཀྱི་ཞི་བདེའི་འཚོ་བར་འགན་སྲུང་འདོན་སྤྲོད་བྱེད་པར་ཕན་པ་ཡོད་ཟེར། 

ཕུའུ་ཅིན་གྱིས་གྲོས་ཚོགས་སྟེང་བཤད་རྒྱུར། ནུབ་ཕྱོགས་རྒྱལ་ཁབ་ཀྱིས་བསམ་བཞིན་དུ་ཛ་དྲག་གནས་བབ་ལ་ཤུགས་བསྣན་ནས་སྐྱོ་གར་བཟོས་ཡོད། དེའི་འགན་མི་ཁུར་བའི་སྲིད་ཇུས་ཀྱིས་འཛམ་གླིང་དེ་གོ་ལ་ཧྲིལ་བོའི་འགལ་བའི་ཕྱོགས་སུ་བརྫངས། ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་ཀྱི་བདེ་འཇགས་འགན་སྲུང་ཆིངས་ཡིག་གིས་ཕན་ཚུན་གྱི་རྒྱལ་སྲུང་གི་མནའ་འབྲེལ་འོས་འགན་འགན་སྲུང་བྱེད་པ་དང་། ཕྱོགས་གཉིས་ཀྱིས་སྟོབས་ཤུགས་དང་བྱེད་ཐབས་ཡོད་རྒུ་སྤྱད་དེ་རྒྱལ་ཁབ་གཉིས་ཀྱི་བདག་དབང་དང་སྒེར་ཚུགས། རྩ་ཁྲིམས་ཀྱི་སྒྲིག་ལམ། དེ་མིན་མནའ་འབྲེལ་རྒྱལ་ཁབ་ཀྱི་མངའ་ཁོངས་དང་མཐའ་མཚམས་ཁུལ་ཆ་ཚང་། བཙན་འཛུལ་མི་ཐེབས་པ་བཅས་ལ་སྲུང་སྐྱོབ་བྱེད་དགོས་པ་གཏན་འབེབས་བྱས་ཡོད་ཟེར།

གྲོས་ཚོགས་རྗེས་ཀྱི་གསར་འགོད་པའི་ཚོགས་འདུའི་སྟེང་། ལུའུ་ཁཱ་ཧྲིན་ཁི་ཡིས་ཨུ་རུ་སི་དཀར་པོའི་ནུབ་རྒྱུད་མཐའ་མཚམས་ཁུལ་དང་ཝུའུ་ཁི་ལན་གྱི་གནས་བབ་ཐད་སེམས་ཁུར་བྱེད་ཀྱིན་ཡོད་པར་མ་ཟད། ཕུའུ་ཅིན་ལ་ཨུ་རུ་སི་དཀར་པོའི་ས་ཁུལ་དུ“ཀྲིན་ཧྲུའུ”འཕུར་མདའ་བཀོད་སྒྲིག་བྱེད་མིན་སྐོར་དྲིས། ཕུའུ་ཅིན་གྱིས་བསྟན་དོན། སང་ལོའི་ལོ་སྨད་དུ“ཀྲིན་ཧྲུའུ”འཕུར་མདའ་མ་ལག་གིས་ཨུ་རུ་སིར་ཐོན་ཚད་མངོན་འགྱུར་བྱུང་བར་མ་ཟད་ཨུ་རུ་སིའི་འཐབ་ཇུས་འཕུར་མདའི་རུ་ཁག་ཏུ་དམག་སྐུལ་དང་ལེན་བྱས་པ་བསྟུན་ནས། དེ་ཨུ་རུ་སི་དཀར་པོའི་ས་ཁུལ་དུ་བཀོད་སྒྲིག་བྱེད་ངེས་མོད། འོན་ཀྱང་ད་དུང་བྱེ་བྲག་གི་མ་རྩ་དང་འཕེན་རྒྱང་། རྨང་གཞིའི་སྒྲིག་བཀོད་སོགས་ལག་རྩལ་གྱི་ཞིབ་ཆ་གྲོས་བསྡུར་བྱེད་དགོས་ཟེར།

རྒྱལ་ཁབ་གཉིས་ཀྱི་འགོ་ཁྲིད་པས་གྲོས་ཚོགས་སྐབས་ད་དུང་གཅིག་གྱུར་གྱི་གློག་ཤུགས་ཁྲོམ་ར་འཛུགས་པ་དང་། གློག་འཕྲིན་གྱི་ས་ཁོངས་བརྒལ་བའི་གློག་འཕྲིན་ཞབས་ཞུའི་རིན་པ་མེད་པར་བཟོ་བ། འཛད་སྤྱོད་པའི་ཁེ་དབང་སྲུང་སྐྱོབ་བྱེད་པ་སོགས་ཀྱི་གནད་དོན་སྐོར་ལ་གྲོས་བསྡུར་བྱས་ཤིང་། དེའི་དམིགས་ཡུལ་ནི་ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་ཀྱི་ཕྱོགས་ཡོངས་གཞི་གཅིག་ཅན་གྱི་འཕེལ་རིམ་སྔར་ལས་ཟབ་སྤེལ་བྱེད་ཆེད་ཡིན། 

ཨུ་རུ་སི་དང་ཨུ་རུ་སི་དཀར་པོའི་རྒྱལ་ཁབ་གཉིས་ཀྱིས1999ལོའི་ཟླ12པའི་ཚེས8ཉིན་ཨུ་རུ་སི་དང་ཨུ་རུ་སི་དཀར་པོའི་མནའ་འབྲེལ་རྒྱལ་ཁབ་བཙུགས་པའི་ཆིངས་ཡིག་ལ་མིང་རྟགས་བཀོད་པ་དང་། རྒྱལ་ཁབ་གཉིས་ཀྱིས་སོ་སོའི་རྒྱལ་ཁབ་ཀྱི་བདག་དབང་དང་སྒེར་ཚུགས། རྒྱལ་ཁབ་ཀྱི་ལམ་ལུགས་ལ་སྲུང་སྐྱོབ་བྱེད་པ་དང་མཉམ་དུ་རྒྱལ་ཁག་མཉམ་འབྲེལ་ངོ་བོའི་རྒྱལ་ཁབ་འཛུགས་པ་གཏན་འབེབས་བྱས།