དབྱི་རག་དང་སི་རི་ཡ། དབྱི་ལང་བཅས་ཀྱི་ཕྱི་འབྲེལ་དཔོན་པོས་ཞི་བདེའི་ཐབས་ལམ་བརྒྱུད་དེ་སི་རི་ཡའི་གནད་དོན་ཐག་གཅོད་བྱེད་པའི་འབོད་སྐུལ་བཏང་།

དབྱི་རག་གི་ཕྱི་འབྲེལ་དཔོན་པོ་ཧུའུ་སའེ་དབྱིན་དང་སི་རི་ཡའི་ཕྱི་འབྲེལ་དཔོན་པོ་སཱ་པ་ཀི དབྱི་ལང་གི་ཕྱི་འབྲེལ་དཔོན་པོ་ཨ་ལཱ་ཀི་ཆི་བཅས་ཀྱིས་ཚེས6ཉིན་པཱ་ཀི་ཏཱ་རུ་གྲོས་ཚོགས་བསྡུས་ནས། སི་ར་ཡའི་གནད་དོན་ཐད་ནས་བསམ་འཆར་བརྗེ་རེས་ཟབ་མོ་བྱས་པ་དང་། ཞི་བདེའི་ཐབས་ལམ་བརྒྱུད་དེ་སི་རི་ཡའི་གནད་དོན་ཐག་གཅོད་བྱེད་དགོས་པའི་འབོད་སྐུལ་བཏང་།

རྒྱལ་ཁབ་གསུམ་གྱི་ཕྱི་འབྲེལ་དཔོན་པོས་གྲོས་ཚོགས་རྗེས་སུ་མཉམ་འབྲེལ་གསལ་བསྒྲགས་སྤེལ་ནས་སི་རི་ཡའི་བདག་དབང་དང་སྒེར་ཚུགས། གཅིག་གྱུར་དང་མངའ་ཁོངས་ཆ་ཚང་བཅས་ལ་བརྩི་མཐོང་བྱེད་པ་དང་། རྣམ་པ་གང་རུང་གི་འཇིགས་སྐུལ་རིང་ལུགས་ལ་སུན་འབྱིན་བྱས་ཏེ། ཚང་མས་གཅིག་གྱུར་སྒོས་བལྟས་ན་སི་རི་ཡའི་གནད་དོན་ཐད་མུ་མཐུད་དུ་གྲོས་མོལ་དང་མཐུན་སྦྱོར་རྒྱུན་འཁྱོངས་བྱེད་པ་དང་། གནས་བབ་འཕེལ་རྒྱས་ལ་རྒྱུན་མཐུད་སྒོས་དོ་སྣང་བྱས་ནས། མ་འོངས་པའི་གནས་ཚུལ་འགྱུར་ལྡོག་ཐད་གྲ་སྒྲིག་ལེགས་པོ་བྱེད་དགོས་པ་ནན་གྱིས་བསྟན།

གསལ་བསྒྲགས་ལས་བཤད་རྒྱུར། སི་རི་ཡར་འཕྲད་པའི་བདེ་འཇགས་འཇིགས་སྐུལ་གྱིས་དབུས་ཤར་སྤྱིའི་གཏན་འཇགས་དང་ས་ཁུལ་མི་དམངས་ཀྱི་བདེ་འཇགས་ལ་ཤུགས་རྐྱེན་ཐེབས་པ་དང་། མཐུན་སྦྱོར་དང་མཉམ་ལས། ཕྱི་འབྲེལ་བཅས་ཀྱི་ཐབས་ལམ་བརྒྱུད་ནས་གནས་བབ་ཛ་དྲག་ཏུ་གྱུར་བའི་ཉེན་ཁའི་འགྲན་སློང་ལ་ཁ་གཏད་འཇལ་དགོས་ཤིང་། ཕྱོགས་གསུམ་པོས་རྒྱལ་སྤྱིའི་སྤྱི་ཚོགས་ཀྱིས་མཉམ་དུ་འབད་པ་བྱས་ཏེ་དབུས་ཤར་ས་ཁུལ་དང་ལྷག་པར་དུ་སི་རི་ཡར་འཕྲད་པའི་འགྲན་སློང་ཞི་བའི་སྒོ་ནས་ཐག་གཅོད་བྱེད་དགོས་ཟེར།

ཧུའུ་སའེ་དབྱིན་གྱིས་མཉམ་འབྲེལ་གསར་འགོད་པའི་ཚོགས་འདུའི་སྟེང་བསྟན་དོན། དབྱི་རག་གིས་ཕྱི་འབྲེལ་བྱེད་ཐབས་སྤྱད་དེ་གནས་བབ་ཇེ་ལེགས་སུ་འགྲོ་བར་སྐུལ་འདེད་གཏོང་རྒྱུ་ཡིན་པར་མ་ཟད། སི་རི་ཡར་མི་ཆོས་རིང་ལུགས་ཀྱི་རོགས་སྐྱོར་འདོན་སྤྲོད་བྱེད་པ་དང་། དེ་དང་མཉམ་དུ་ཨ་རབ་རྒྱལ་ཁབ་མནའ་འབྲེལ་གྱིས་འཕྲལ་མྱུར་པུའུ་ཀྲང་རིམ་པའི་གྲོས་ཚོགས་བསྡུ་བར་འབོད་སྐུལ་གཏོང་རྒྱུ་ཡིན་ཟེར།

སཱ་པ་ཀི་ཡིས་བསྟན་དོན། ཐལ་སྤྱོད་རྩ་འཛུགས་ཀྱིས་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་གྲོས་ཆོད་དང་འགལ་ཞིང་། འཛེམ་བག་མེད་པར་སི་རི་ཡའི་ལས་དོན་ཐད་ཐེ་གཏོགས་བྱས། སི་རི་ཡའི་སྲིད་གཞུང་དམག་གིས་ལས་འགན་ལག་བསྟར་བྱས་ནས། ངོ་རྒོལ་ཕྱོགས་ཁག་དྲག་ཆས་དང་ཐལ་སྤྱོད་རྩ་འཛུགས་ལ་རྡུང་རྡེག་གཏོང་རྒྱུ་ཡིན་ཟེར།

ཨ་ལཱ་ཀི་ཆི་ཡིས་བསྟན་དོན། དབྱི་ལང་གིས་སི་རི་ཡའི་སྲིད་གཞུང་དང་མི་དམངས་ལ་མཐའ་གཅིག་ཏུ་རྒྱབ་སྐྱོར་བྱེད་པར་མ་ཟད། རྒྱལ་སྤྱིའི་སྤྱི་ཚོགས་ཀྱིས་དབུས་ཤར་གྱི་འཇིགས་སྐུལ་རིང་ལུགས་ལ་རྒོལ་བའི་འགུལ་སྐྱོད་ལ་རྒྱབ་སྐྱོར་བྱེད་པའི་འབོད་སྐུལ་བཏང་ཡོད་ཟེར།

ཉིན་དེའི་སྔ་ཙམ་ལ། ཧུའུ་སའེ་དབྱིན་གྱིས་སོ་སོར་སཱ་པ་ཀི་དང་ཨ་ལཱ་ཀི་ཆི་དང་མཉམ་དུ་སི་རི་ཡའི་གནས་བབ་ཐད་ནས་གྲོས་མོལ་བྱས།

ཟླ11པའི་ཚེས27ཉིན་ནས་བཟུང་། སི་རི་ཡའི་སྲིད་གཞུང་དམག་དང་ངོ་རྒོལ་ཕྱོགས་ཁག་དྲག་ཆས། ཐལ་སྤྱོད་རྩ་འཛུགས་མི་སྣ་བཅས་ཀྱིས་སི་རི་ཡའི་ནུབ་བྱང་རྒྱུད་སོགས་ས་ཁུལ་དུ་བསྟུད་མར་གཞི་ཁྱོན་ཆེ་བའི་དམག་འཁྲུག་བརྒྱབ་པས། སི་རི་ཡའི་གནས་བབ་སྔར་ལས་ཛ་དྲག་ཏུ་གྱུར། དབྱི་རག་སྲིད་གཞུང་གིས་དབྱི་རག་དང་སི་རི་ཡའི་མཐའ་མཚམས་ཁུལ་གྱི་དམག་ཤུགས་བཀོད་སྒྲིག་ལ་ཤུགས་བསྣན་པ་ཁྱབ་བསྒྲགས་བྱས་པར་མ་ཟད། ཆབ་སྲིད་དང་ཕྱི་འབྲེལ་གྱི་ཐབས་ལམ་བརྒྱུད་དེ་སི་རི་ཡའི་ཛ་དྲག་གནས་བབ་ཀྱིས་མཐའ་འཁོར་རྒྱལ་ཁབ་ལ་ཤུགས་རྐྱེན་ཐེབས་པར་གཡོལ་དགོས་པའི་འབོད་སྐུལ་བཏང་།