འཛམ་གླིང་ཚོགས་གཙོ་ཚོགས་ཆེན་སྐབས་ལྔ་བ་ཅི་ལུང་ཕའོ་ནས་བསྡུས།

2024ལོའི་འཛམ་གླིང་ཚོགས་གཙོ་ཚོགས་ཆེན་སྐབས་ལྔ་བ་ཚེས2ཉིན་མཱ་ལེ་ཞི་ཡཱའི་རྒྱལ་ས་ཅི་ལུང་ཕའོ་ནས་བསྡུས་པ་དང་། ཀྲུང་གོ་དང་མཱ་ལེ་ཞི་ཡཱ་རྒྱལ་ཁབ་གཉིས་ཀྱི་སྲིད་གཞུང་དང་འཛམ་གླིང་ཡོངས་ཀྱི་ཚོང་ཚོགས་མཐུན་ཚོགས་སོ་སོ། ཁེ་ལས་བཅས་ཀྱི་འཐུས་མི700ལྷག་ཚོགས་ཆེན་ལ་ཞུགས་ནས་དཔྱད་གླེང་ལ་ཞུགས།

མཚམས་སྦྱོར་བྱས་པ་ལྟར་ན། སྐབས་འདིའི་ཚོགས་ཆེན་གྱིས་ཉོ་ཚོང་རང་དབང་ཅན་ལ་ཡར་སྐུལ་བྱེད་པ་དང་དཔལ་འབྱོར་འཛམ་གླིང་ཅན་ལ་སྐུལ་འདེད་གཏོང་བ་བརྗོད་སྙིང་དུ་བཟུང་ཡོད་ཅིངི་། འཐུས་མི་དག་གིས་ཚན་རྩལ་གསར་བསྒྱུར་དང་གསར་གཏོད་དཔལ་འབྱོར། དཔལ་འབྱོར་ཉོ་ཚོང་གི་ཚོང་སྐལ། སྦས་ནུས་ཚད་མེད། ཕན་ཚུན་བར་འབྲེལ་བ་བཙུགས་ནས་ལོ་ངོ་ལྔ་བཅུ་འགོར་བ་དང་བརྟན་བརླིང་གི་འཕེལ་རྒྱས་སོགས་གྲོས་གཞིར་དམིགས་ནས་བརྗེ་རེས་དཔྱད་གླེང་བྱས།

མཱ་ལེ་ཞི་ཡཱའི་ཙུང་ལི་གཞོན་པ་ཧྥ་ཏིས་ལཱ་ཡིས་ཚོགས་མགོ་རྩོམ་པའི་མཛད་སྒོའི་སྟེང་ཞུ་ཚིག་འབུལ་སྐབས་བསྟན་དོན། ཀྲུང་གོ་ནི་མཱ་ལེ་ཞི་ཡཱའི་ཆེས་ཆེ་བའི་ཉོ་ཚོང་གྲོགས་པོ་ཡིན་ཞིང་། ཉེ་བའི་ལོ་འགའི་རིང་ལ། ཀྲུང་གོས་མཱ་ལེ་ཞི་ཡཱ་ལ་ཐད་ཀར་དངུལ་གཏོང་བྱས་ཚད་མགྱོགས་མྱུར་ངང་འཕར་སྣོན་བྱུང་སྟེ། བཟོ་སྐྲུན་ལས་རིགས་དང་རྨང་གཞིའི་སྒྲིག་ཆས་ཀྱི་འཛུགས་སྐྲུན། གྲངས་ལྡན་ལག་རྩལ། དག་གཙང་ནུས་ཁུངས་སོགས་གནད་འགག་གི་ཁྱབ་ཁོངས་ལ་ཁེབས་ཡོད། ཉོ་ཚོང་རང་དབང་ཅན་དང་དཔལ་འབྱོར་འཛམ་གླིང་ཅན་དེ་རྒྱལ་ཁབ་གཉིས་ཀྱི་མཉམ་ལས་གཏིང་ཟབ་ཏུ་གཏོང་བའི་སྒུལ་ཤུགས་གལ་ཆེན་དུ་གྱུར་ཡོད་པ་དང་། ཀྲུང་གོའི་བར་གྱི་འཐབ་ཇུས་མཉམ་ལས་ལ་བརྟེན་ནས། མཱ་ལེ་ཞི་ཡཱ་ཡིས་ཀྲུང་གོའི་ལག་རྩལ་ཁྱབ་ཁོངས་ཀྱི་ཁྱད་སྟོབས་ལ་བརྟེན་ནས་རང་སྟེང་གི་རྒྱུན་མཐུད་འཕེལ་རྒྱས་ཇེ་མགྱོགས་སུ་གཏོང་ཐུབ་པ་དང་། དེའི་ཞོར་དུ་རྒྱལ་ཁབ་གཉིས་ཀྱི་གསར་གཏོད་གྲུབ་འབྲས་དང་དཔལ་འབྱོར་གོ་སྐབས་མཉམ་སྤྱོད་བྱེད་ཐུབ་པ་བྱུང་ཡོད་ཟེར།

མཱ་ལེ་ཞི་ཡཱ་རུ་སྡོད་པའི་ཀྲུང་གོའི་གཞུང་ཚབ་ཁང་གི་གཞུང་ཚབ་པ་ཀྲིན་ཞོས་ཧྥང་གིས་ཞུ་ཚིག་འབུལ་སྐབས་བསྟན་དོན། མིག་སྔའི་འཛམ་གླིང་དེ་ཟང་ཟིང་གི་བཅོས་བསྒྱུར་དུས་སྐབས་གསར་བར་བསླེབས་ཡོད་པ་དང་། དཔལ་འབྱོར་འཛམ་གླིང་ཅན་དེ་བཀག་རྒྱ་ཆེན་པོར་འཕྲད་ཡོད། རྒྱལ་ཁབ་སོ་སོས་གསར་གཏོད་བཅོས་བསྒྱུར་རྒྱུན་འཁྱོངས་བྱེད་པ་དང་། སྒོ་འབྱེད་མཉམ་འདྲེས་རྒྱུན་འཁྱོངས་བྱས་ཏེ། ཀུན་ཕན་དཀྱེལ་ཡངས་ཀྱི་འཛམ་གླིང་ཅན་ལ་སྐུལ་འདེད་གཏོང་དགོས། ཀྲུང་གོས་རྒྱུན་ཆད་མེད་པར་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་རྒྱ་བསྐྱེད་བཞིན་ཡོད། ཀྲུང་གོའི་འཕེལ་རྒྱས་ཀྱིས་མུ་མཐུད་དུ་མཱ་ལེ་ཞི་ཡཱ་དང་བཅས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོར་གོ་སྐབས་གསར་བ་སྔར་ལས་མང་བོ་འདོན་སྤྲོད་བྱེད་ངེས་ཡིན། སྐུ་མགྲོན་དག་གིས་ཐེངས་འདིའི་ཚོགས་ཆེན་ལ་བརྟེན་ནས་ཉོ་ཚོང་རང་དབང་ཅན་ལ་ཡར་སྐུལ་དང་། དཔལ་འབྱོར་འཛམ་གླིང་ཅན་ལ་སྐུལ་འདེད་གཏོང་བའི་བསམ་ཕྱོགས་གསར་བ་དང་བྱེད་ཐབས་གསར་བར་གཏིང་ཟབ་ཏུ་གྲོས་བསྡུར་བྱས་ཏེ། ཞི་བདེ་འཕེལ་རྒྱས་དང་གཉིས་ཕན་མཉམ་ལས། ཐུན་མོང་དར་རྒྱས་བཅས་ཀྱི་འཛམ་གླིང་དེང་རབས་ཅན་མངོན་འགྱུར་བྱེད་པར་བློ་གྲོས་དང་སྟོབས་ཤུགས་འབུལ་དགོས་ཟེར།

འཛམ་གླིང་ཚོགས་གཙོའི་ཚོགས་ཆེན་སྐབས་ལྔ་བའི་ཀྲུའུ་ཞི། མཱ་ལེ་ཞི་ཡཱ་དང་ཀྲུང་གོའི་སྤྱི་མཐུན་ཚོགས་པའི་ཚོགས་གཙོ་ཝེ་ཅཱ་ཞང་གིས་ཞུ་ཚིག་འབུལ་སྐབས་བསྟན་དོན། ཉིན་རེ་བཞིན་ཛ་དྲག་ཏུ་འགྱུར་བཞིན་པའི་འཛམ་གླིང་ཡོངས་ཀྱི་དཔལ་འབྱོར་འགྲན་རྩོད་མདུན་ནས། ཀྲུང་གོ་ནི་གོ་སྐབས་ཡིན་པ་ལས་འཇིགས་ཉེན་མ་ཡིན། ཀྲུང་གོ་འགྲན་ཡར་བརྩི་བ་ལས་མཉམ་ལས་གྲོགས་པོར་བརྩིས་ན་བཟང་། རྒྱུད་གཅིག་ལམ་གཅིག་མཉམ་འཛུགས་བྱེད་པའི་གྲོས་འགོའི་སྐུལ་འདེད་འོག མཱ་ལེ་ཞི་ཡཱ་དང་ཀྲུང་གོ་རྒྱལ་ཁབ་གཉིས་ཀྱི་རྨང་གཞིའི་སྒྲིག་ཆས་དང་མཉམ་འབྲེལ་གཅིག་བརྟེན། རྒྱུན་མཐུད་འཕེལ་རྒྱས་སོགས་ཁྱབ་ཁོངས་ནས་གྲུབ་འབྲས་མངོན་གསལ་བླངས་ཡོད། ཀྲུང་གོའི་བར་གྱི་མཉམ་ལས་ཇེ་ཟབ་ཏུ་བཏང་སྟེ། མཱ་ལེ་ཞི་ཡཱ་སྔར་ལས་ལྷག་པའི་སྒོ་ནས་འཛམ་གླིང་ཡོངས་ཀྱི་མཁོ་འདོན་མུ་འབྲེལ་ནང་འདྲེས་སུ་བཅུག་པར་མ་ཟད། རྒྱལ་ཁབ་གཉིས་ལ་སྔར་ལས་མང་བའི་གཉིས་ཕན་མཉམ་རྒྱལ་གྱི་དཔལ་འབྱོར་གྲུབ་འབྲས་གསར་གཏོད་བྱེད་ཐུབ་ཟེར།

འཛམ་གླིང་ཚོགས་གཙོའི་ཚོགས་ཆེན་རྩ་འཛུགས་ཨུ་ཡོན་ལྷན་ཁང་གི་ཀྲུའུ་ཞི། ཧང་ཀྲིག་གྲོང་ཁྱེར་སྤྱི་མཐུན་འབྲེལ་བའི་མཐུན་ཚོགས་ཀྱི་ལག་བསྟར་ཚོགས་གཙོ་ལིའུ་ཅང་གིས་ཞུ་ཚིག་འབུལ་སྐབས་བསྟན་དོན། ད་ལོ་ནི་འཛམ་གླིང་ཚོགས་གཙོའི་ཚོགས་ཆེན་ཐོག་དང་པོར་ཀྲུང་གོ་ནས་བུད་དེ་མཱ་ལེ་ཞི་ཡཱ་རུ་བསྐྱོད་པ་ཡིན། ཀྲུང་གོ་དང་མཱ་ལེ་ཞི་ཡཱའི་བར་འབྲེལ་བ་བཙུགས་ནས་ལོ་ངོ50འགོར་བའི་སྐབས་སུ་འཁེལ་ཡོད། དེ་གོ་སྐབས་སུ་བྱས་ཏེ་ཀྲུང་གོ་དང་མཱ་ལེ་ཞི་ཡཱ་རྒྱལ་ཁབ་གཉིས་ཀྱི་མཛའ་མཐུན་དེ་སྔར་ལས་ཇེ་ཟབ་ཏུ་འགྲོ་བར་རོགས་འདེགས་བྱེད་འདོད་ཡོད་ལ། ཚོགས་ཞུགས་མི་སྣ་དག་གིས་སྐབས་འདིའི་ཚོགས་ཆེན་གྱི་བརྗོད་སྙིང་ལ་དམིགས་ཏེ། གོ་སྐབས་ཡང་དག་པར་འཚོལ་བ་དང་སྔར་ལས་ལྷག་པའི་སྒོ་ནས་འཛམ་གླིང་གི་དཔལ་འབྱོར་འགྲན་རྩོད་ཐག་གཅོད་བྱེད་པ་དང་། སྲོལ་རྒྱུན་ཐོན་ལས་དང་གསར་དར་ཚན་རྩལ་གྱི་ཐོན་ཁུངས་ལེགས་སྒྲིག་དང་རོགས་ལས་གསར་གཏོད་ལ་སྐུལ་འདེད་གཏོང་དགོས་པར་མ་ཟད། སྔར་ལས་བརྩོན་སེམས་ཆེ་བའི་རྣམ་འགྱུར་གྱིས་སྤྱི་ཚོགས་འགན་འཁྲི་ལག་བསྟར་བྱས་ཏེ། དཔལ་འབྱོར་ཁེ་ཕན་འཚོལ་བསྙེག་བྱེད་པའི་ཞོར་དུ། འཛམ་གླིང་གི་ཞི་བདེ་དང་ཁོར་ཡུག་སྲུང་སྐྱོབ། སྤྱི་ཚོགས་འདྲ་མཉམ། དམངས་འཚོའི་ཕན་བདེ་བཅས་ལ་དོ་སྣང་བྱེད་དགོས་ཟེར།

ཚོགས་ཐོག་ནས་འཛམ་གླིང་གི་ས་ཁུལ་སོ་སོའི་ཚོགས་གཙོའི་འཐུས་མིས་འཛམ་གླིང་ཚོགས་གཙོའི་ཅི་ལུང་ཕའོ་ཡི་བསྒྲགས་གཏམ་མཉམ་དུ་སྒྲོག་འདོན་བྱས་ཤིང་། ཉོ་ཚོང་རང་དབང་ཅན་དང་དཔལ་འབྱོར་འཛམ་གླིང་ཅན་ལ་རོགས་འདེགས་གང་ལེགས་བྱས་ཏེ། སྔར་ལས་མཛེས་སྡུག་ལྡན་པའི་མ་འོངས་པ་གསར་བཞེངས་བྱེད་རྒྱུའི་ཚུལ་བསྟན།

སྐབས་འདིའི་འཛམ་གླིང་ཚོགས་གཙོའི་ཚོགས་ཆེན་ནི་མཱ་ལེ་ཞི་ཡཱ་དང་ཀྲུང་གོའི་སྤྱི་མཐུན་ཚོགས་པ་དང་། མཱ་ལེ་ཞི་ཡཱ་དང་ཀྲུང་གོའི་མཛའ་འབྲེལ་མཐུན་ཚོགས། མཱ་ལེ་ཞི་ཡཱའི་ཀྲུང་གོའི་དངུལ་གཏོང་ཁེ་ལས་སྤྱིའི་ཚོང་ཚོགས་བཅས་ཀྱིས་མཉམ་དུ་གཙོ་སྒྲུབ་བྱས་པ་ཡིན་ལ། མཱ་ལེ་ཞི་ཡཱ་དང་ཀྲུང་གོའི་སྤྱི་མཐུན་ཚོགས་པ་དང་ཧང་ཀྲིག་གྲོང་ཁྱེར་སྤྱི་མཐུན་འབྲེལ་བའི་མཐུན་ཚོགས་ཀྱིས་སྒྲུབ་འགན་ཁུར་བ་རེད།