ཡོ་རོབ་གླིང་ལས་འཛིན་ལྷན་ཚོགས་ཀྱིས་བཅའ་ཁྲིམས་འཆར་ཟིན་གསར་བར་གྲོས་མཐུན་བཀོད་དེ་དྲ་རྒྱའི་བདེ་འཇགས་ལ་ཤུགས་སྣོན་བྱས།

ཡོ་རོབ་གླིང་ལས་འཛིན་ལྷན་ཚོགས་ཀྱིས་ཚེས2ཉིན་དྲ་རྒྱའི་བདེ་འཇགས་ཀྱི་བཅའ་ཁྲིམས་འཆར་ཟིན་གཉིས་ལ་གྲོས་མཐུན་བཀོད་པ་དང་། དམིགས་ཡུལ་ནི་སྔར་ལས་ལྷག་པའི་སྒོ་ནས་ཡོ་རོབ་གླིང་མནའ་འབྲེལ་གྱིས་དྲ་རྒྱའི་འཇིགས་ཉེན་འགོག་པའི་ནུས་པ་དང་དྲ་རྒྱའི་མཐུན་སྒྲིལ་མཉམ་ལས་ལ་ཤུགས་སྣོན་བྱེད་པའི་ཆེད་དུ་རེད།

བཅའ་ཁྲིམས་དེ་གཉིས་ནི་སོ་སོར་དྲ་རྒྱའི་མཐུན་སྒྲིལ་བཅའ་ཁྲིམས་འཆར་ཟིན་དང་དྲ་རྒྱའི་བདེ་འཇགས་བཅའ་ཁྲིམས་འཆར་ཟིན་གྱི་བཟོ་བཅོས་འཆར་ཟིན་ཡིན་པ་དང་། ཡོ་རོབ་གླིང་མནའ་འབྲེལ་གྱི་དྲ་རྒྱའི་བདེ་འཇགས་ཁྲིམས་འཛུགས་ཀྱི་འཆར་གཞི་རབ་དང་རིམ་པའི་ཁག་ཅིག་ཡིན་པ་རེད།

ཡོ་རོབ་གླིང་ལས་འཛིན་ལྷན་ཚོགས་ཀྱིས་གསལ་སྒྲོག་སྤེལ་ཏེ། དྲ་རྒྱའི་མཐུན་སྒྲིལ་བཅའ་ཁྲིམས་འཆར་ཟིན་གྱིས་ཡོ་རོབ་གླིང་མནའ་འབྲེལ་གྱི་དྲ་རྒྱའི་འཇིགས་ཉེན་ཐག་གཅོད་བྱེད་པའི་ཐད་ཀྱི་ནུས་པ་ལྡན་པར་བྱས་པ་དང་། ཞོར་དུ་མཉམ་ལས་རྐྱེན་སྲོལ་ལ་ཤུགས་སྣོན་བྱས། དཔེར་ན་ཡོ་རོབ་གླིང་མནའ་འབྲེལ་གྱིས་རྒྱལ་ཁབ་དང་ས་ཁོངས་བརྒལ་བའི་དྲ་རྒྱའི་ལྟེ་གནས་ཚན་ཆུང་གིས་གྲུབ་པའི་དྲ་རྒྱའི་བདེ་འཇགས་ཉེན་གཏོང་མ་ལག་བཙུགས་ནས། ཆ་འཕྲིན་མཉམ་སྤྱོད་མངོན་འགྱུར་དང་དྲ་རྒྱའི་འཇིགས་ཉེན་ཚད་འཇལ་ཐག་གཅོད་བྱེད་རྒྱུ་ཡིན་པ་ལྟ་བུ་རེད། བཅའ་ཁྲིམས་འཆར་ཟིན་དེ་ལས་ད་རུང་དྲ་རྒྱའི་བདེ་འཇགས་འཕྲལ་སྒྲུབ་རྐྱེན་སྲོལ་བཙུགས་ནས་ཡོ་རོབ་གླིང་མནའ་འབྲེལ་གྱི་ཐོལ་བྱུང་དོན་རྐྱེན་གྱི་འཕྲལ་སྒྲུབ་ནུས་པ་མཐོར་འདེགས་གཏོང་རྒྱུའི་གྲོས་གཞི་བཏོན་ཡོད། དྲ་རྒྱའི་བདེ་འཇགས་བཅའ་ཁྲིམས་འཆར་ཟིན་བཟོ་བཅོས་འཆར་ཟིན་ལས་བདེ་འཇགས་ཞབས་ཞུ་དེ་དྲ་རྒྱའི་བདེ་འཇགས་དོན་རྐྱེན་སྔོན་འགོག་དང་ཚད་འཇལ། ཐག་གཅོད། སླར་གསོ་བཅས་བྱེད་པའི་གལ་ཆེན་རང་བཞིན་ཉིན་རེ་བཞིན་ཇེ་དྲག་ཏུ་འགྲོ་བཞིན་པ་ཁས་ལེན་བྱས་པ་དང་། བཟོ་བཅོས་འཆར་ཟིན་དེ་བདེ་འཇགས་ཞབས་ཞུའི་སྤུས་ཚད་མཐོར་འདེགས་གཏོང་བ་དང་ཡིད་རྟོན་རུང་བའི་དྲ་རྒྱའི་བདེ་འཇགས་ཞབས་ཞུའི་ཚོང་བ་གསོ་སྐྱོང་བྱེད་པར་ཕན་ཐོགས་འབྱུང་སྲིད།

གསལ་སྒྲོག་ལས་མཚམས་སྦྱོར་བྱས་དོན། བཅའ་ཁྲིམས་འཆར་ཟིན་གསར་བ་དེ་གཉིས་ལ་ཡོ་རོབ་གླིང་ལས་འཛིན་ལྷན་ཚོགས་ཀྱི་ཀྲུའུ་ཞི་དང་ཡོ་རོབ་གླིང་གྲོས་ཁང་གི་གྲོས་དཔོན་གྱིས་མིང་བཀོད་རྗེས། མ་འོངས་པའི་གཟའ་འཁོར་འགའི་ནང་ཡོ་རོབ་གླིང་མནའ་འབྲེལ་གྱི་དཔོན་ཕྱོགས་དུས་དེབ་སྟེང་ཁྱབ་བསྒྲགས་བྱེད་རྒྱུ་མ་ཟད། ཁྱབ་བསྒྲགས་བྱས་ནས་ཉིན20རྗེས་སུ་ནུས་ལྡན་དུ་འགྱུར་སྲིད།