འཇར་པན་གྱི་དབུ་བཞུགས་བློན་ཆེན་གྱིས་ཀྲུང་གོའི་རིམ་པ་སོ་སོའི་བར་འབྲེལ་འདྲིས་བྱེད་འདོད་ཡོད་པའི་ཚུལ་བསྟན།

འཇར་པན་གྱི་དབུ་བཞུགས་བློན་ཆེན་གྱིས་ཀྲུང་གོའི་རིམ་པ་སོ་སོའི་བར་འབྲེལ་འདྲིས་བྱེད་འདོད་ཡོད་པའི་ཚུལ་བསྟན།

འཇར་པན་གྱི་དབུ་བཞུགས་བློན་ཆེན་ཧྲི་ཕོ་མའོ་ཡིས་ཚེས29ཉིན་རྒྱལ་ཚོགས་ནས་སྲིད་སྐྱོང་གཏམ་བཤད་སྤེལ་སྐབས་ཀྲུང་གོའི་རིམ་པ་སོ་སོའི་བར་འབྲེལ་འདྲིས་བྱེད་འདོད་ཡོད་ཅེས་བཤད།

ཧྲི་ཕོ་མའོ་ཡིས་གཏམ་བཤད་སྤེལ་སྐབས་ཕྱི་འབྲེལ་དང་བདེ་འཇགས་འགན་སྲུང་། དཔལ་འབྱོར། ནང་སྲིད་སོགས་ཀྱི་ཐད་ནས་རང་གི་སྲིད་སྐྱོང་འདོད་བློ་རྒྱས་བཤད་བྱས།

ཀྲུང་གོའི་བར་གྱི་འབྲེལ་བའི་གནད་དོན་ཐད་ནས་ཧྲི་ཕོ་མའོ་ཡིས་བཤད་རྒྱུར། ཕྱོགས་ཡོངས་ནས་འཇར་པན་དང་ཀྲུང་གོའི་འཐབ་ཇུས་གཉིས་ཕན་འབྲེལ་བར་སྐུལ་འདེད་གཏོང་བ་དང་། འཛུགས་སྐྲུན་རང་བཞིན་ལྡན་ལ་གཏན་འཇགས་ཡིན་པའི་འཇར་པན་དང་ཀྲུང་གོའི་འབྲེལ་བའི་ཁ་ཕྱོགས་ཆེན་མོ་གཏན་འཁེལ་བྱས་ཏེ། ཀྲུང་གོའི་རིམ་པ་སོ་སོའི་བར་འབྲེལ་འདྲིས་བྱེད་རྒྱུ་ཡིན་ཟེར།

ཧྲི་ཕོ་མའོ་ཡིས་ད་རུང་བདེ་འཇགས་འགན་སྲུང་དང་། འཇར་པན་དང་ཨ་མེ་རིའི་མནའ་མཐུན་སོགས་ཀྱི་ཐད་ནས་བསམ་ཚུལ་བརྗོད་ཡོད་ལ། འཇར་པན་ལ་ཕན་པའི་བདེ་འཇགས་ཁོར་ཡུག་གསར་བསྐྲུན་བྱེད་རྒྱུ་ཡིན་ཟེར།

དཔལ་འབྱོར་ཐད་ནས་ཧྲི་ཕོ་མའོ་ཡིས་བསྟན་དོན། འཇར་པན་དེ་ཟླ་ཕོགས་འཕར་སྣོན་དང་དངུལ་གཏོང་སྒུལ་ཤུགས་འཕར་བའི་རྣམ་པ་ཅན་དུ་བསྒྱུར་རྒྱུ་ཡིན་ཟེར།

ཁོས་ད་རུང་བཤད་རྒྱུར། ཆ་འཕྲིན་ལག་རྩལ་གསར་བ་བེད་སྤྱོད་གང་ལེགས་བྱེད་པ་དང་། ས་གནས་སུ་སྦས་ཤུགས་ཡོད་པའི་ཞིང་ལས་དང་ནགས་ལས། ཉ་གསོ་ལས་རིགས། བཟོ་སྐྲུན་ལས་རིགས། ཞབས་ཞུའི་ལས་རིགས་བཅས་ཀྱི་ཟུར་སྣོན་རིན་ཐང་ཆེན་མོའི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་ཟེར། ཁོས་ད་རུང་བསྟན་དོན། བརྩོན་སེམས་ཆེ་བའི་རྒན་པ་དང་བུད་མེད། དབང་བོ་སྐྱོན་ཅན་མི་སྣ་བཅས་ཀྱིས་ལས་ཞུགས་བྱེད་པར་སྐུལ་མ་བཏང་སྟེ། ལོ་ཚོད་ཀྱི་ཚད་བཀག་མེད་པ་དང་རང་གི་ནུས་པ་འདོན་སྤེལ་གང་ལེགས་ཐུབ་པ། རང་གཤིས་ཅན་གྱི་སྤྱི་ཚོགས་གསར་བསྐྲུན་བྱེད་རྒྱུ་ཡིན་ཟེར།

ནང་སྲིད་ཐད་ནས་ཧྲི་ཕོ་མའོ་ཡིས་ཧུར་ཐག་སྒོས་ཆབ་སྲིད་བཅོས་བསྒྱུར་ལ་སྐུལ་འདེད་གཏོང་རྒྱུ་ཡིན་ཟེར། རང་དབང་དམངས་གཙོ་ཏང་དང་ཀུང་མེན་ཏང་གིས་གྲུབ་པའི་སྲིད་འཛིན་མནའ་འབྲེལ་ལ་ཟླ10བའི་ཚེས27ཉིན་བསྡུས་པའི་དམངས་གྲོས་ཁང་གི་འདེམ་བསྐོའི་ཁྲོད་ཕྱེད་གྲངས་ལས་བརྒལ་བའི་ལས་གནས་ཐོབ་མེད་པའི་དབང་གིས་ཧྲི་ཕའོ་མའོ་ཡི་ནེ་ཀི་དེ་གྲངས་ཉུང་ནེ་ཀི་རུ་གྱུར་སྟབས། ཁོས་སྲིད་དབང་བཟུང་མེད་པའི་ཏང་ཁག་བར་ཐུན་མོང་ལྟ་ཚུལ་རྒྱ་ཆེར་འགོད་པའི་འབོད་སྐུལ་བཏང་ཡོད།